KNR-imi tusagassiortunut isumaqatigiissut nutaaq: Akissarsiat qaffanneqassapput atugassarititaasullu pitsaanerulerlutik
2024-mi februaarip 28-ani pisortani sulisut kiisalu KNR-imi sulisut ilaasortat akissarsiaannik isumaqatiginninniarnerit Dansk Journalistforbundip aamma Tusagassiuiermi Sulisut Peqatigiiffiata aallartippaat. Sapaatiummat Nuummi isumaqatigiinniarnerit ilungersunartut kingorna kiisami isumaqatigiissutit inissipput.
Isumaqatigiissummik nutaamik KNR isumaqatigiissutiginnereersorlu KNR-imi tunngaviusumik akissarsiat ilinniartullu akissarsiaat qaffanneqarput, soraarnerussutisiaqalernissamut atugassarititaasut tapiissutillu assigiinngitsut pitsanngorsarneqarlutik.
Leiff Josefsen
Sapaatip-akunnerata naanerani maajip 25-ani 26-anilu Dansk Journalistforbundip aamma Kalaallit Nunaanni Tusagassiuinermi Sulisut Peqatigiiffiata ukiuni sisamani atuuttussamik Namminersorlutik Oqartussat isumaqatigiissuteqarfigivaat.
Pisortani tusagassiortunut kiisalu tusagassiivimmi innuttaasunut kiffartuussisumi KNR-imi sulisunut pitsaanerusumik atugassaqartitsinissaq, isumaqatigiissutip qulakkeerpaa.
Isumaqatigiissut nutaaq 2024-mi apriilip aallaqqaataanit 2028-mi marsip 31-anut atuuttoq ataatsimut aningaasanik sinaakkutissanik 8,149 procentimik qaffaanermik imaqarpoq. Tunngaviusumik akissarsianut, ilinniartut akissarsiaannut, soraarnerussutisiaqalernissamut atugassarititanut pitsanngorsaanernut assigiinngitsunullu tapiissutinut aningaasat taakku agguaanneqarput.
Piffissami sivisuumi KNR-imi sulisunik attassiinnarnissap ajornakusoortinneqarneranik, ilaatigut akissarsiat immikkut ajornartorsiutitut oqaatigineqartarnerannik nalunaaruteqartoqareersorlu, akissarsiat qaffanneqarnissaat pillugu nutaarsiassaq saqqummiunneqarpoq.
Erninermut atatillugu sulinngiffeqarnermut ilinniaqqissinnaanermullu atugassarititat pitsaanerulersinneqarput
Isumaqatigiissut nutaaq erninermut atatillugu sulisunik sulinngiffeqarsinnaanerulersitsivoq.
Tusagassiortut piginnaanitik nutartertuarsinnaaniassammatigik suliatigullu ineriartorsinnaajuarniassagamik, ilinniaqqinnissamut periarfissaat aammattaaq pitsanngorsarneqarput.
Kingusinnerusukkut isumaqatigiissut nutaaq pillugu paasissutissanik annertunerusunik saqqummiussisoqarumaartoq nalunaarutigineqarpoq.
Isumaqatiginninniartuusut tassaapput isumaqatiginninniarnermut aqutsisoq aamma DJ-mi isumaqatiginninniarnermut pisortaq Marianne Molin, TP-mi siulittaasoq aamma KNR-imi aaqqissuisoq Arnaq Nielsen, FTR-imi aamma Allorfimmi paasissutissiinermik suliaqartoq Kathrine Kruse, TP-mi siulersuisunut ilaasortaq aamma KNR-imi atuaasartoq Erik Olsen.
