KNR: Sulinerup unitsinneqarnissaa taamaatinneqarpoq
KNR-ip HR-imut immikkoortortaqarfia tusagassiutinut naatsumik nalunaaruteqarluni ilisimatitsivoq KNR-imi sulisut sulinerminnik ataasinngornermi aamma marlunngornermi unitsitsinissartik taamaatikkaat. Tamassuma saniatigut allanik nalunaaruteqartoqanngilaq, suliaq sulisoqarnermut tunngasuummat.
Foto: Leiff Josefsen
Tusagassiortut, teknikerit aamma sulisut allat KNR-ip nutaarsiassaqartitsiviani, radiop aamma TV-p immikkoortortaqarfiani sulisut, ataasinngornermi nalinginnaasumik suliartussapput.
Sulinerup unitsinneqarnissaa taamaatinneqarpoq. KNR-imi HR-imut immikkoortortaqarfik tusagassiorfinnut taama sapaatikkut ualilluinnartoq nalunaaruteqarpoq.
-KNR-imi sulisut sinnissaat ataatsimeeqatigisareerlugit nalunaarutigisinnaavarput ataasinngornermi juulip aallaqqaataanni aamma marlunngornermi juulip aappaani sulinerup unitsinnissaannik aalajangerneq atorunnaarsinneqarmat. Tamassuma saniatigut allanik oqaaseqartoqassanngilaq, suliaq sulisoqarnermut tunngassuteqarmat, nalunaarummi allassimavoq.
Sulinermik unitsitsiinissaq tallimanngormat nalunaarutigineqartoq
KNR-imi nutaarsiassaqartitsivimmi, radiop kiisalu TV-p immikkoortortaqarfiani sulisut juullip aallaqqaataani aappaanilu sulinerminnik unitsitsissallutik tallimanngormat nalunaaruteqarput. Nutaarsiassaqartitsivimmi pisortaq suliinnartinneqassappat taamaaliortoqassasoq tallimanngormat aarlerisaaruteqarput.
Sulisut sinnerlugit oqaaseqartoq, KNR-ip nutaarsiassaqartitsiviani nittartakkami aaqqissuisuugallartoq, Hanna Hviid, Sermitsiamut uppernarsaavoq sulisut ataasinngornermi suliartussasut:
- Sulisut sinniisaat aqutsisullu ataatsimeeqatigeereerneranni aalajangerpugut ataasinngornermi aamma marlunngornermi suliartussalluta, taanna oqarpoq.
