KL

DK

KNR: Tamakkiisuunngitsumik sarfalersuisoqarnera radiomut attaveerutsitsivoq

Nuup innaallagiaarunnerani tamakkiisuunngitsumik sarfalersuisoqarnera radiomut TV-mullu attaveerutsitsipput.

Direktør i KNR, Annga Lynge, fortæller, at der er fokus på arbejdsmiljøet i mediehusets forskellige afdelinger.
Thomas Munk Veirum
Tusagassiortoq
Saqqummersinneqarpoq

KNR-radio ajornartoortoqartillugu ikinneqartassasoq innuttaasut ilitsersorneqarnikuupput, oqartussammi upalungaarsimanermut nalunaarutinik tusarliussisartussaammata.

Nuummili arfininngornermi decembarip 28-ani innaallagiaaruttoqarnerani nalunaaquttap akunnerini pingasungajanni radiokkut aallakaatitsisoqanngilaq.

Innaallagiaaruttoqarnerani Utoqqarmiut Kangerluarsunnguanni naammanngitsumik sarfalersuisoqarnera pissutaasoq KNR nittartakkamini paasissutissiivoq:

- Ilaannakoortumik sarfaqarneq patsisaalluni KNR-ip sarfaliuutaa sarfalersuilluni aallartinnginneranik kinguneqarpoq. KNR-ip systemiisa ingerlanissaannut naammanngitsumik. Sarfaarutivissimasuuppat sarfalersuilersimassagaluartoq. Taamaattoqarnerani attaveqaatit ajutoorput radiolu qamilluni. Radio nal. 10:00-miit 12:50-ip tungaanut qaminngavoq.

TV aamma attaveeruttoq

- Ikeqqimmallu teknikkikkut ajutooqqasoqarneranik tusarnaartartut ilisimatinneqarput nipilersukkanillu aallakaatitsisoqarluni. Innaallagialerisut attavigineqarput atortumillu taarsiisoqareermat sarfaliuut KNR-ip illorsuanut Issortarfimmut 1-miittumut sarfalersuilerpoq, KNR-ip qamittoorneq pillugu paasissutissiivoq.

KNR-ip illorsui marluupput. Illorsuup aappaa aamma ilaannakortumik sarfalersorneqalermat serverit qamipput taamaammallu KNR-TV nalinginnaasumik aallakaatitsisinnaajunnaarluni:

- Sarfaaruttoqartillugu sarfaliuut Issortarfik 9-miittoq nammineerluni aallartissinnaasimanngilaq, illorsuaq suli innaallagissamik annikikkaluamik pilersorneqarsimammat. Ikinniarsarineranilu paasinarsivoq aallartittaataata batteeria qerisimasoq. Kissasserneqarpoq, nal 14:30 missaani ikilluni taamaalineranilu attaveqaativut ikeqqipput.

- Tamatuma kingorna nal. 15.00 missaani radio, TV 1, 2-lu aallarteqqipput nalinginnaasumillu ingerlasinnaaleqqillutik., KNR allappoq.

Ajornartoornermi innaallagissiuutit marluk misissorneqassasut

KNR-ip paasissutissiinera naapertorlugu Kalaallit Nunaanni Upalungaarsimasut KNR-imi pisut pillugit nal. 13:06 ilisimatinneqarput nal. 14.00-lu upalungaarsimasut aggersarneqarlutik. Radiomi pisortaq, TV-mi pisortaq aamma Nutaarsiassaqartitsivimmi pisortaagallartoq nal. 14.00, 16.30 aamma nal 19:00  KNR-ip aallakaatitsisinnaaleqqinnissaa ataqatigiissarneqarluni upalungaarsimasuni ataatsimiipput.

Siunissami taama pisoqaqqinnginnissaa anguniarlugu maanna misissuisoqassaaq:

- Piffissami aggersumi innaallagissiuutit KNR-imiittut ilisimasallit peqatigalugit naliersorneqassapput siunissamilu assingusumik pisoqassappat ajornartoortoqannginnissaa anguniarlugu aaqqiissutissanik ujartuisoqassalluni., tusagassiorfimmi kiffartuussisup allappoq.

Naammanngitsumik sarfalersuisoqarnera, Nukissiorfiit taasaattut "equngasutut ittumik sarfap sakkortussuseqarnera", pissutaalluni arlallit pilersorneqartarput allalli pilersorneqarunnaarlutik.

Utoqqarmiut Kangerluarsunnguani erngup nukinganik nukissiorfimmit sarfap aqqutaani ingerlatsissutip nakkarnera pissutaalluni Nuuk innaallagiaaruppoq.

- Sarfap equngasutut ittup nassatarai pumpit, serverit, aammalu innaallagissamik atuisutut atortut allat ingerlasinnaajunnaarneri, taamaalillunilu suliffippassuarnik, aammalu inunnik innaallagissamik atuisartunik akornusersuivoq, Nukissiorfiit ilisimatitsinikuupput.

nuuk nukissiorfiit knr inuiaqatigiit samfund strømafbrydelse nødgenerator

ATORFIIT Se alle jobs

Powered by Labrador CMS