Københavnimi illu oqaluttuarisaanermut tunngasuusoq ikuallattoq
Københavnimi illu oqaluttuarisaanermut tunngasuusoq Børsen ikuallappoq. Illu Christiansborgip ungasinngisaaniippoq.
Københavnimi 2024-mi apriilip 16-iani Børsen ikuallattoq. (Assi: Mathias Sørensen/Ritzau Scanpix)
Mathias Sørensen/Ritzau Scanpix
Københavnimi Børsenip napasuliaa ikuallappoq. Tamanna sumiiffimmi assilisanit takuneqarsinnaavoq.
Nalunaaqutaq arfineq-pingasut qaangilaaraa illup napasuliaa pujorluinnarpoq, eqqaanilu innerujussuaqarpoq.
Nalunaaqutaq 8.30 missaani napasuliaa uppissimasoq assini takuneqarsinnaavoq.
Aamma illup iluanit qaarpallannerit tusarsaapput.
Ungalulersuinerit
Børsenimi ikuallattoqarnera pissutigalugu Københavnip qeqqani politiit amerlasuut angalaartut, Københavnimi politiit inuit attaveqaqatigiittarfiatigut X-ikkut allapput.
Illup eqqaani sumiiffik politiinit ungalulersorneqarsimavoq. Knipplesbromi Christiansborg Slotpladsimilu aamma ungalulersuisoqarpoq.
Sumiiffiup tamatuma sivisuumik ungalulersoqqanissaa Københavnimi Politiit ilimagigaat, X-imi allassimavoq. Biilertut allatigut angallaffissarsiornissaannik kajumissaarneqarput.
Københavnimiut ullaaq manna tupannartumik takusaqarput, tassami Børsen, Københavnimi illut pisoqaanersaata ilaat, ikuallammat.
Ida Marie Odgaard/Ritzau Scanpix
Qalianit pujuliortoqarneranik nalunaaruteqartoqareersorlu qatserisartut amerlasuut Slotsholmsgademut ingerlaartut, illoqarfiit pingaarnersaanni upalungaarsimanermut pisortaqarfik nalunaaqutaq arfineq-pingasut sioqqullugit allappoq.
Nalunaaqutaq arfineq-pingasut qaangilaaraa upalungaarsimasut takkussimasut assini takuneqarsinnaavoq.
Ikuallannermut pissutaasoq ilisimaneqanngilaq
Ikuallanneq qanoq aallartissimanersoq marlunngormat ullaakkut suli ilisimaneqanngilaq.
Københavnimi Slotsholmimi Børsen ippoq. Illu taanna napasulialerlugu 1625-mi sananeqarpoq, Københavnimilu illut pisoqaanersaannut ilaalluni.
Københavnimi marlunngornermi apriilip 16-ianni 2024-mi Børsenimi pujuliortoqarlunilu ikuallattoqarnera nalunaarutigineqarpoq.
Ida Marie Odgaard/Ritzau Scanpix
Børsen maanna iluarsaanneqarpoq, taamaattumillu illu ikaaqarpoq.
1800-kkunni naleqqutinngitsumik iluarsaanneqarsimanera iluarsiniarlugu, illulu isikkutoqaatut isikkoqalersinniarlugu iluarsaanneqarpoq. Tamanna A.P. Møller Fondenip nittartagaani atuarneqarsinnaavoq. Iluarsaaqqinnermut aningaasatigut aningaasaateqarfik tapersersuisuuvoq.
