Københavnip Kommuneani ingerlatsiviit meeqqat kalaallit savalimmiormiullu Danmarkimi najugaqartut ilitsoqqussaralugu oqaatsiminnik ilinniartinneqarsinnaanersut misissussavaat.
Tamanna Københavnimi Innuttaasut Sinniisoqarfianni politikkerit pingasunngornermi januaarip 29-anni akuersissutigaat.
Københavnip Kommuneani ingerlatsiviit meeqqat kalaallit savalimmiormiullu Danmarkimi najugaqartut ilitsoqqussaralugu oqaatsiminnik ilinniartinneqarsinnaanersut misissussavaat.
Tamanna Københavnimi Innuttaasut Sinniisoqarfianni politikkerit pingasunngornermi januaarip 29-anni akuersissutigaat.
- Kommunimit meeqqat angerlarsimaffiup avataanut inississimagutsit taakkua paarilluarneqarnissaat pisussaaffigaarput, siunnersuuteqartoq Gyda Heding Enhedslistenimeersoq oqarpoq.
Meeqqat oqaatsit ilitsoqqussatik atorlugit oqalussinnaannginnertik kulturimut ilaquttaminnullu attaveqarnerannik sanngiillisitsisinnaasiq Gyda Hedinginip tunngavilersuutigaa.
– Ataatsimiititaliami sulininni kalaallit meeqqat inuusuttullu oqaatsiminnik annaasaqarsimanerminnik oqaluttuartut naapissimavakka. Taamaattumik tupigusuutigaara taakkua ilitsoqqussaralugu oqaatsiminnik ilinniartinneqarnissaat siunertaralugu immikkut suleqatigiissitaliortoqarsimannginnera.
Ujartorneqarpallaanngitsoq
Meeqqat kalaallit savalimmiormiullu, aamma qallunaatut innuttaassuseqaraluarlutik, ilitsoqqussaralugu oqaatsitik atorlugit ilinniartinneqarsinnaatitaapput.
Meeqqanut Inuusuttunullu Ingerlatsiviup 2017-imiilli ilitsoqqussaralugu oqaatsit atorlugit ilinniartitaanissamik innuttaasumit ataasiinnarmit kissaateqartoqarsimasimasoq ilisimatitsissutigaa.
Allatut oqaatigalugu ujartorneqarpiarneq ajornera pissutaalluni suleqatigiinnik pilersitsisoqarsimanngilaq.
Periarfissap pisariaqartinneqarnera ilisimaneqarnerulerneralu ilutigalugu pisariaqartinneqarnerulerumaartoq Gyda Hedingip ilimagaa.
- Ilimagaara ikittuinnaat taamatut periarfissaqarneq pisinnaatitaaffeqarnerlu ilisimagaat, taamaattumillu inuit immaqa taama pisoqartannginnera sungiusimallugu, Gyda Heding oqarpoq.
Inatsimmi nutaami meeqqat angerlarsimaffiup avataanut inissinneqarsimasut namminneq oqaatsitik atorlugit qanoq ilinniartinneqarsinnaanerannik pilersaarusiornissaannut oqartussaasut pisussaaffilerneqarput, assersuutigalugu kommuninik allanik suleqateqarnermikkut imaluunniit qarasaasiakkut aaqqiissutissat atorlugit.
Siunnersuut Enhedslistenip partiit SF, Radikale Venstre aamma Alternativet peqatigalugit saqqummiuppaat, innuttaasullu sinniisaanni taasititsineq pisariaqartinnagu akuerineqarpoq.
Savalimmiormiut oqaasii atorlugit ilinniartitsisarneq ukiualunni holdit marluk ingerlasut Københavnip Kommunea ilisimatitsivoq.
