Kalaallit Nunaanni suliffeqarfiit siuttuanni annertuumik siuttuiaaneq

Kalaallit Nunaanni suliffeqarfiit annersaani, suliffeqarfissuarmi Royal Greenlandimi, pisortaqatigiit piffissami kingullermi sakkortuumik ilanngartorneqarput.

Pisortaanermik Susanne Arfelt Rajamandimik, pisortaanerullu tulliata tunisassiornermilu pisortap Lars Nielsenip piffissami kingullermi suliunnaaqqammernerani, Royal Greenlandip siulersuisuisa ingerlatseqatigiiffik tamakkiisoq qarasaarpaat.

Susanne Arfelt Rajamand, ukiorpassuarni inuussutissalerinermi aqutsinermik misilittagaqartoq, aalisarnermut inuussutissarsiortuni ataqqineqartuuvoq. Lars Nielsen Royal Greenlandimi tunisassiornermi pisortatut ukiut 18-it sinnerlugit misilittagaqarpoq. Pisortallu taakku marluk ingerlatseqatigiiffimmeersunik taartissaqarsorinanngillat.

Taamaammat ingerlatseqatigiiffissuaq annertuumik ajornartorsiortoq, tusarfik issuarneqarumanngitsoq Sermitsiamut oqarpoq.

Qaammatit sisamat affarlu ingerlanerinnaanni Royal Greenlandip pisortaqatigiinniittunik sisamaasunit pingasut inuulluaqquai. Taamaalilluni ingerlatseqatigiiffimmi Namminersorlutik Oqartussanit tamakkiisumit pigineqartumi Royal Greenlandimi ulluinnarni aqutsineq sakkortuumik sanngiillivoq.

2024-mut naatsorsuutit pitsaannginnissaat ilimagineqartoq

Royal Greenland Namminersorlutik Oqartussat kalaalerpassuillu tulluusimaarutigaat. Kalaallilli Nunaata inuussutissarsiornermi siuttua, ukiumut 5,8 mia. koruuninik kaaviiaartitsisartoq 2.3000-nillu sulisulik annertuumik ilungersunartorsiorpoq. Pisortat aningaasaqarnerlu kusanartorsuunngillat.

Siulersuisut Susanne Arfelt Rajamandimik soraarsitsinerat Lars Nielsenillu kingorna suliunnaarnera misissoqqissaaraanni, tamanna siulersuisut Maliina Abelsenimit siulersorneqartut Royal Greenlandip 2024-mut angusaanik taakkunannga marlunnik pisuutitseriarnerattut isikkoqarsinnaavoq. Angusallu pitsaanngissorinartut, aaliarnermi inuussutissarsiortut naliliipput. Naatsorsuutit qaammatit marlussuit ingerlaneranni saqqummiunneqarnissaat naatsorsuutigineqarpoq.

Norgemik suleqateqarneq akisooq

Norgemik Tromsømi aalisartitseqatigiiffimmik Maniitsoq A/S-imik amigartooruteqartumik suleqateqarneq Royal Greenlandip akisunaarpaa. Kalaallit aalisartitseqatigiiffissuat aalisartitseqatigiiffimmut koruuninik untritilinnik millionilikkaanik taarsigassarsisitsivoq, Royal Greenlandillu aningaasat taarsigassarsiarititani tamakkiisumik takoqqissagunanngilai.

Aalisariutaatillip Bengt Are Korneliussenip saattuarniutini Maniitsup, Oslomi Nærings- og Fiskeridepartementip inuussutissarsiorsinnaanermut akuersissummik, saattuarniarnermullu akuersissut inaarutaasumik itigartissappagu tunisariaqassavaa. Aalisariut maanna Tromsømi taleqqavoq. Taamatuttaaq Royal Greenland raajat qaleruallit akiisa 2024-mi apparujussuarnerannit aamma eqqugaavoq.

Pisortaanerup najugaa saqitsaassutaasoq

Sermitsiap sapaatit akunnerani kingullermi allaaserisaatut, piffissami pisortaanerit Kalaallit Nunaannut nuunnissaannik, Nuummilu najugaqarnissaannik Royal Greenlandip siulersuisui Naalakkersuisunit sivisuumik tatineqarput, ilami piumasaqarfigineqarlutik. Taamatullu piumasaqartoqaraluartoq pisortat Danmarkimi Sverigimilu najugaqartunik ilaqutaqartut Kalaallit Nunaannut nuunngillat.

Pisortammi Kalaallit Nunaanniittorujussuusarput.

Pisortallu piffissap ilaani nunarsuarmi piffinni allaniinnerminni ingerlaavartumik Kalaallit Nunaanni, Canadami Tysklandimiluunniit qullersaqarfimmik tunisassiorfinnillu attaveqartarput, tusarfik alla aamma issuarneqarumanngitsoq oqarpoq.

Pisortaaneq nunarsuarmiluunniit suliffeqarfissuarmi Royal Greenlanditut ittumi pisortat ilaat alla ajornartorsiutitaqanngitsumik, assersuutigalugu Aalborgip eqqaani Svenstrupimi Royal Greenlandip ingerlatseqatigiiffiani issiasinnaavoq, aammali Københavnimi, Newfoundlandimi nunarsuarmiluunniit sumiiffimmi allami. Pisortat ajornartorsiutitaqanngitsumik assersuutigalugu Nuummi qullersaqarfimmik, piginnittuminik Namminersorlutik Oqartussanik ingerlaavartumik attaveqarsinnaavoq, tusarfik ilassusiivoq.

Aqutsisut, tassani pisortaaneq ilanngullugu, sumi najugaqarnissaat politikikkut Royal Greenlandimilu aalassassimaartitsisarpoq. Tamanna ilaatigut Sermitsiami atuarneqarsinnaallunilu KNR-ip radioaviisiani tusarneqarsinnaasarpoq.

Sivisuumik aalatsassimaarneq naatsunngorlugu oqaatigissagaanni, Kalaallit Nunaanni najugaqarnissamik politikikkut sakkortuumik piumasaqarnerup malitsigisaanik pisortat naggataagut soraarsinneqarlutilluunniit namminneerlutik tunniutiinnarput.

Pisortaanerugallartoq

Ukiorpassuarni aningaasaqarnermut pisortaasimasoq Niels Duus Kinnerup, 2025-p naanera tikillugu ingerlatseqatigiiffimmi siunnersortaasussaq, siorna oktobarimi soraarniuteqarmat, Royal Greenlandip pisortaanerini saleersuarnertut taaneqarsinnaasoq aallartippoq.

Aalisartitseqatigiiffissuup pisortaanermi sisamat akornanni pingasunik inuulluaqqusinera aalassassimaarnertut nipeqarsinnaavoq. Oqaatigineqareersutut Susanne Arfelt Rajamand soraarsitaavoq. Siulersuisunut ilaasortaq Preben Sunke taartissamik nassaarnissap tungaanut suliffeqarfissuarmi pisortaanerugallartutut ivertinneqarpoq.

Nils Duus Kinnerupip ukiuni 17-ini tunniusimalluni sulereerluni aningaasaqarnermut pisortatut atorfini qimakkaa Royal Greenlandip tusagassiuutinut nalunaarutaani allassimavoq. Oqaatigineqareersutullu tamanna oktobarimi pivoq.

Pisortaanerlu Susanne Arfelt Rajamand, atorfininnermini ingerlatseqatigiiffimmit pavungarsuaq ilillugu nersualaarneqartoq, qaammatip kingulliup qiteqqunnerani ukiut marluinnaat sulereerluni tassanngaannaq soraarsitaavoq. Maannalu pisortaanerup tullia tunisassiornermilu pisortaq Lars Nielsen tassanngaannaq ingerlatseqatigiiffimmi suliunnaarpoq. Tallimanngormat Royal Greenland tusagassiorfinnut nalunaarummik naatsumik nassiussivoq:

- EVP aamma COO Lars Nielsen illuatungeriilluni isumaqatigiissuteqarnikkut Royal Greenlandimi atorfimminit tunuarpoq. Lars Nielsen ullumi ulloq 28. februar kingullermeerluni sulissaaq. Periarfissaq atorlugu Lars Nielsenip ukiuni 30-ngajanni tunniusimalluni Royal Greenlandimut Kalaallillu Nunaanni aalisarnermik inuussutissarsiortunut sulisimanera siulersuisut qujassuteqarfigaat.

Bodil Marie Damgaard suliinnassaaq

Pisortat tunuaraangata, illuatungeriillunilu isumaqatigiissuteqartoqarsimagaangat, amerlanertigut soraarsitsineq pineqartarpoq. Pisortaanerulli tullianut maanna pisumi ilumut soraarsitsisoqarnersoq ilisimaneqanngilaq. Tamanna immaqa paasinavianngilarput.

HR-imut attaveqarnermullu pisortaq Bodil Marie Damgaard, Nuummi najugaqartoq, Royal Greenlandip aqutsisoqatigiinni kisiartaalluni suliinnarpoq.

Pisortaaninngortussaq pisortaanertut sulinermi annertuumik misilittagaqartuussasoq, ajornanngippallu ingerlatamik misilittagaqartuussasoq, Kalaallillu Nunaanni najugaqartuussasoq Royal Greenlandip nalunaarutigaa.

Jan Harald Lynge-Pedersen, Kalaallit Nunaanni najugaqartoq, Royal Greenlandimi aningaasarnermut pisortatut marsip aallaqqaataaniatorfinippoq. Taanna KNI-mi aningaasaqarnermut pisortatut atorfeqarsimavoq, ukiunilu arlalinni Royal Greenlandimi siulittaasumut tulliusimalluni.