Kristian Jeremiassen:
- Pakatsinngilanga kisianni ugguarpunga
Politikeri nuimasoq Qasigiannguaninngaanneersoq Inatsisartunut isinngitsoorpoq.
- Qinersisartut taasinerat ataqqineqartariaqarpoq. Allaffimmiutut aqqutissiuussisutullu ilinniagaqarpunga taakkulu atorlugit ingerlariaqqissaanga, Kristian Jeremiassen, ippassaq Inatsisartunut qinersinermi 61-inik taaneqarluni iseqqinngitsoortoq oqarpoq.
Asseq nammineq pigisaq
Inatsisartunut ilaasortaq
politikkikkut saqqumilaartoq Kristian Jeremiassen, Inuit Ataqatigiit,
Inatsisartunut qinigaaqqinngilaq, tamannali pakatsissutiginagu oqarpoq.
- Politikkimi
ajugaasoqarlunilu ajorsartoqartarpoq aamma inuuneq tamarmi politikkiunngilaq.
- Qinersinerup
inerneranut pakatsinngilanga, kisianni ugguarpunga. Ukiorpassuarni
politikeriunikuuvunga maannakkullu ilaquttanut piffissaqarnerulissaanga,
tamannalu aamma nuliama nuannaarutigaa, taanna oqarpoq.
Siorna Inatsisartut upernakkut
ataatsimiinnerata nalaani aalisarnermut inatsisip akuersissutigineqarnerata
nalaani, Kristian Jeremiassen Aalisarnermut Piniarnermut Nunalerinermullu
Ataatsimiititaliami siulittaasuuvoq, inatsisissarlu oqallisaaqisoq Inatsisartut
oqaluttarfianiit arlaleriarluni illersorlugu oqaaseqartarpoq.
- Aalisarnermut
inatsisissaq aqqutigalugu Inuit Ataqatigiinniit aalisartut illersorsimavagut,
taamaattumik uanga qinigaaqqinnissanniik aalisartut pitsaasumik atugaqarnissaat
pingaarneruvoq, taanna oqarpoq.
Kristian Jeremiassen
katillugit ukiuni 13-ini Inatsisartunut ilaasortaavoq, ukiunilu 24-ni
kommunalbestyrelsimut ilaasortaasimavoq. Taanna Kommune Qeqertalimmi
kommunalbestyrelsimut aamma qinigassanngortippoq.
