Naalakkersuisut nunarsuarmi oqaluttuarisaanermi piffissami ajornartorsiorfioqisumiipput

Naalakkersuisut nutaat pingaarutilimmik suliassaqarput: Trumpip soqutiginninnera Kalaallit Nunaannut iluaqutaasumik atorniartariaqarpaat.

- Trumpip Kalaallit Nunaannut soqutiginninnera Kalaallit Nunaat nammineq aalajangiisinnaassuseqarnerulerneranut qanoq atorneqarsinnaava? Amerikamiut soqutiginninnerat qanoq ililluni Kalaallit Nunaata aningaasaqarnikkut ineriartorneranut iluaqutaasinnaasumik allanngortinneqarsinnaava? Tamanna Naalakkersuisut siullertut misissortariaqarpaat, Dansk Institut for Internationale Studierimi (DIIS) ilisimatusartuuneq Ulrik Pram Gad oqarpoq.

Trumpillu qanoq ilioriataarsinnaanera nalunartarmat susoqassanersoq siulittoruminaatsoq ilanngullugu oqaatigaa.

Nunat tamarmik assigiimmik suliassaqarput

Suliassarli kisermaatinngilaat. Naalakkersuisunngortussat suliassaat USA-p avataatugaani naalakkersuisut suliassaannut assinguvoq. Europami nunat naalakkersuisui sapaatip-akunnerini kingullerni Bruxellesimi Londonimilu immikkut ittumik ataatsimeersuarput. USA isumannaallisaanermik qulakkeerinnikkunnaarmat Europami nunat isumannaallisaanerat illersorneqarnerallu nukittorsarniarlugu USA-millu suleqatigiinneq qanoq ingerlassanersoq paasiniarlugit ataatsimiittoqarluni, Ulrik Pram Gad naliliivoq.

- Naalakkersuisut suliassaat annertooq nunanut tamanut Europamiittunut, Canadamut, Australiamut, New Zealandimut nunanilu killerniittunut USA-p eqqaaniittunut allanut assinguvoq. Trumpip aqutsinerani USA-mullu qanoq suleqateqarnissaq tamatta paasiniartussaavarput. 

-Piffissami USA sungiusimasatsinnit allaanerulluinnartumik pissusilersoraluartoq isumannaatsuuneq eqqissisimanerullu attanneqaannarnissaa qanoq qulakkeerneqassanersoq paasiniartussaavarput, sapinngisamillu kiffaanngissuseqarneq. Suliassaq ataatsimoorussassaavoq Naalakkersuisut kitaani naalakkersuisut allat peqatigalugit suliassaat. 

-Nunat tamalaat akornanni malittarisassat attatiinnarnissaat aamma inuiaat inatsisaat attatiinnarnissaat pineqarput, Ulrik Pram Gad Inatsisartunut qinersinissaq aqaguttoq Sermitsiamut oqarpoq.

Trumpip siumut oqaatigineqarsinnaannginnera

Trumpip nunani tamalaani politikkimik sungiusimanngisatsinnik ingerlatsinera unammilligassaavoq. Inuit qulaatiinnarlugit iliorsinnaasorisoq Ulrik Pram Gad oqarpoq:

- Ukraine qulaatiinnarlugu Putin eqqissineq pillugu isumaqatigiissusiorfigerusuppaa. Palæstinamiu qulaatiinnarlugit Gazami eqqissisoqarnissaa angorusuppaa. Inuit tunngaviusumik isumaat soqutigivallaanngilai. 

-Soorunami ajornannginnerussaaq inunnik nuannarineqalerluni neqerooruteqarfigisinnaappagit tamaalilluni pilersaarutiminut ilaatikkusulersinnaallugit. Tamannali iluatsinngikkaangat sioorasaarisarpoq inunnillu naveersipallalluni, Ulrik Pram Gad oqarpoq.

Trumpip periaasia pissutaalluni naalakkersuisut tamarmik USA-mik suleqateqarnissaat ajornakusoorpoq, maannakkullu ukiuni 100-ngajanni nunanut allanut politikkimik ingerlatsineq aatsaat taama ajornakusoortigaaq, ilisimatusartuuneq naliliivoq:

- Nunarsuarmi oqaluttuarisaanermi piffissaq nunat tamalaat akornanni unammillernarnerpaat ilagivaat, pissutigalugu iliuuserineqartartut qanittukkut atuuttut allanngorput.

- Nunat tamarmik USA-mik silatusaartumik oqaloqateqarnissamut sungiusimagaluagartik allanngormat ajornartunngorpoq. Maanna pillarneqanngikkaluarluni imaluunniit nakkarsarneqanngikkaluarluni killiliisinnaaneq ajornakusuulerpoq. 

- Taava Trumpip nuannarisaanik sunik neqeroorfigisinnaanerlugu paasiniaanissaq suliassanngorpoq. Trumpip iliuuseqariasaartarnera siornatigullu periusaasimasut atorunnaarlugit periuseqalernera nunanut mikisunut ajornakusoortitsivoq. Tamanna naalakkersuisut tamarmik, allaat naalakkersuisut pissaanillit annerpaat, Trumpimut qanoq iliuuseqarniarniarnertik paasiuminaatsippaat.

Naalagaaffeqatigiit aaqqissuusaanerat nutaaq

Qineqqusaarnermi partiit namminersorneq pillugu inatsimmik allannguinissaq eqqartorpaat, soorlu aatsitassarsiornermit isertitat imaluunniit nammineq aalajangiisinnaanerulernissaq nunanullu allanut politikkimut tunngatillugu iliuuseqarnissamut periarfissaqarnerulernissaq.

Tamanna Naalakkersuisut suliassaannik ajornakusoornerulersitseqqippoq, tassami suliassaq tamanna USA-p Kalaallit Nunaannik soqutiginninnera inissinneqartussaammat.

- Namminersorneq pillugu inatsit Naalagaaffeqatigiinnerluunniit allanngortikkusukkaanni, suna kissaatigineqarnersoq Danmarkimut saqqummiunneqaqqaartariaqarpoq. 

- Aatsitassarsiornermit isertitat agguataarneqarnerat nunanullu allanut politikkimi suliassat immikkoortiterneqarnerat allatut agguataarneqarnissaat kissaatigineqartoq qineqqusaarnermi paasinarsivoq. Tamannali Danmarkimik isumaqatiginninniartoqartinnagu aalajangersimasumik oqaasertalerneqaqqaartariaqarpoq. 

- Apeqqut siulleq tassaavoq nunanut allanut politikkimi naligiimmik inatsit tunngaviusoq aallaavigalugu Kalaallit Nunaata Savalimmiullu iluarisaannik pisoqarsinnaanersoq. Apeqqut tulliuttoq tassaavoq kalaallit namminneerlutik nunanut allanut politikkeqarnissaat USA-p toqqissisimanartissaneraa, Ulrik Pram Gad oqarpoq.