Aput aappoq: Arctic Circle Racernissaanut Avannaata Qimussersuarnissaanullu apeqqissanerpa?
Arctic Circle Racertoqarnissaanut Avannaata Qimussersuartoqarnissaanullu Sisimiuni piareersaleruttorput, kisiannili sila kiattaqattaarmat aput aappoq. Ivikkat qorsooqqissiartorput, niviukkallu uummaqqipput. Apeqqut maanna saqqummerpoq: Apeqqissamaarpa?
Assi: Tôrtia Reimer-Johansen
Sisimiuni ilagaakkut silammut itsuaraanni aputaarukkiartortoq arajutsisassaanngilaq.
Arctic Circle Race aamma Avannaata Qimussersua piviusunngussappata aput pinngitsoorneqarsinnaanngilaq.
Apeqqissava?
Tamanna pillugu Sermitsiaq DMI aperaa. Silasiortut nassuiaataat naapertorlugu kitaata sineriaa piffissami kingullermi kiarujuppoq.
Narsarsuarmiit Upernavimmut Kap Farvelip Islandillu akornanni naqitsiniisaffiup qaffasissup silaannaq kissartoq nunatsinnut ingerlateqqippaa. Sisimiunilu sila ulluni tallimani kingullerni tulleriinni tallimat sinnerlugit kiattaqattaarpoq, siornamut sanilliullugu kiannerulluni.
Ukiorli suli qaangiutinngilaq. DMIp nassuiaataa naapertorlugu silaanna nillertoq kujataaniit avannamukaarujoorpoq:
- Aqagu (tallimanngorneq marsip 14-anni) sila quliniit 15-inut ississangatinneqarpoq, sapaatip akunneratalu missaa qerinnassaaq, taamaattumik ilimanarpoq nittaallilaartarsinnaassasoq.
Naak silassaq piffissaq ungasinnerusoq takuneqarsinnaavallaanngikkaluartoq, sila issileqqissangatinneqarpoq - immaqalu nittaalaartassalluni.
- Ernumanngilagut
Naak Sisimiuni aput aakkaluartoq, Qimusseq Sisimiuni siulittaasoq Avannaata Qimussersuartoqarnissaanut aput ernumaginngilaa.
- Nunap timaani pinngortitami pissutsit allaanerusarput, taamaattumik ernumanngilagut, Susanne Berthelsen Sermitsiamut naatsumik oqarpoq.
- Ernumavugut.
Arctic Circle Racertoqarnissaanulli siulittaasoq ernumavoq.
- Taqqama aputeqarpianngilaq...
- Ilumuut...? Jens Klaus Lennert Sermitsiamik attavigineqarami illalaarluni akivoq.
Nalunnguarfiup Tasiani siku aappoq taseqqerlunilu. Tassani Arctic Circle Race aallartillunilu naammassisarpoq. Taamaattumik siulersuisuni ernumasoqarpoq.
- Soorunami ernumavugut, kisianni suli ataatsimiinngilagut, taamaaliussaagulli.
Taassuma Sermitsiamut nassuiaatigaa ingerlaarfissat allannguuteqarsinnaasut, silali avatangiisillu apeqqutaapput. Aputit aannera aallaavigalugu aalajangiiumaartut, Jens Klaus Lennert oqarpoq.
