Kommunalbestyrelsi Qeqqata Kommuniani: Atuartunut angajullernut immikkut nutaamik atuarfiliortoqassanngilaq
Maniitsumi atuartunut angajullernut immikkut nutaamik atuarfiliornissamik siunnersuut Qeqqata Kommuniani kommunalbestyrelsimi ataatsimiinnermi oqaluuserineqarpoq. Karl Lyberthip (N) siunnersuutaata akuersissutigineqarnissaanut suliniutit aallaqqaataaneernissaat piviusorsiortuunngimmat itigartitsissutigineqarpoq.
Foto: Dorthea Reimer-Johansen
Maniitsumi innuttaasut atuartunut angajullernut immikkut atuarfiliortoqarnissaa kissaatigaat. Tamanna tunngavigalugu kommunalbestyrelsimi ilaasortaq Karl Lyberth Naleqqameersoq kommunalbestyrelsimut siunnersuuteqarpoq.
Siunnersuut kommunalbestyrelsimi sisamanngornermi oqaluuserineqarpoq. Inernerusorlu ataasiinnaavoq; piviusorsiortuunngilaq, taama isumaqarput kommunalbestyrelsimi suleqatigiit, Siumut, Inuit Ataqatigiit Atassullu.
Karl Lyberthip siunnersuutimi itigartinneqarmat uggoraa, suleqatigiillu Maniitsumi innuttaasut kissaataannut tusarnaannginnerarlugit isornartorsiorlugit.
Isornartorsiuineq borgmesterip akivaa, tikkuarlugu kikkut tamarmik kissaataat imaaliallaannaq piviusunngortinneqarsinnaanngitsut, kommunip aningaasaqarnera killeqarmat.
- Erseqqissaatigissavara kissaatit suminngaanneerneri apeqqutaatinneqarneq ajormata, imatut
nipeqartinneqarmata Maniitsormiut suleqatigiit itigartippaat, tassami
kissaateqaannarnissaq imminermini ajornanngitsuararsuuvoq oqarluni
"nutaamik pitaarusuppugut", aningaasat atorsinnaasagut tamatta killeqartut
nalunngilarput, borgmesteri Malik Berthelsen kommunalbestyrelsi sisamanngormat ataatsimiimmat oqarpoq.
Siunnersuut kommunalbestyrelsimit itigartitsissutigineqarnera Karl Lyberthimit uggorineqarpoq.
