Kommune Kujalleq aningaasaqarnikkut annertuumik ajornartorsiorpoq. Tassunga pissutaasut pingaarnerit ilagaat kommunip akileraarutit A-t 40 millionit koruunit sinnerlugit akilinngitsoorsimammagit.
Aningaasaqarnermut pisortap Arne Ørbæk Skifte Andersenip aningaasaqarnikkut inissisimasoq saqqummiuppaa.
Maannakkut piffissami aningaasanik 33 millionit koruunit 2024-mi missingersuutinut sanilliullugu sippuisoqalereersimavoq - maannalu taarsigassarsianit 19 millionit koruunit aningaaserivimmi atorneqarsimapput. Aningaasaqarnermut pisortap naqissuserpaa aningaasatigut atugassarititaasut pitsaanngitsut.
Naatsorsuutit 2021-mut tunngasut naammassineqarsinnaalerput
Akileraarutit A-t akilersorneqarsimannginnerisa saniatigut kommunip naatsorsuutaasa matuneqarnissaat suli amigaataavoq.
Ullormut oqaluuserisassani takuneqarsinnaavoq naatsorsuutit 2021-mut maannakkut naammassineqarsimasut, kisitsisinik paasissutissanillu naatsorsuutinillu oqaaseqaateqarnerit ilanngullugit.
Erseqqissaatigineqarpoq kukkunersuisut misissuinerminnit nalunaarusiaat kingusinnerpaamik 28. juuni 2024 naammassineqassasoq, taava naatsorsuutit revisorimit atsiorneqassapput.
Naatsorsuutit revisorimit atsiorneqareerpata, aningaasaqarnermut Inuussutissarsiornermullu Ataatsimiititaliamut siullermik saqqummiunneqassapput kingornalu Kommunalbestyrelsimut.
Kommunip naatsorsuutigaa 2021-mi naatsorsuutit matuneqassasut ukioq manna septembarip 18-iani, tamatuma kingorna naatsorsuutit 2022-mut 2023-mullu piareersarneqassapput.
Paasissutissat amigaataapput aningaasat sumut atorneqarsimanersut
Borgmesteri Stine Egede (IA) kingumut erseqqissaateqarpoq kommunalbestyrelsemi ilaasortat uterneqartuartumik paasitinneqartarsimasut "aningaasaqarnermik ingerlatsinermi suut tamarmik ajunngillat aningaasaqarnerlu peqqinnartuuvoq", taamaattumik nammineq aamma kommunalbestyrelsemi ilaasortatulli tupaallatsitaasimalluni akileraarutit A-t akilinngitsoorneqartarsimasut.
Aamma taassuma kingumut erseqqissaatigaa kommunip aningaasaqarnera annertuumik unammilligassaqartoq, tamatumani isumaginninnikkut ikiorsiissutit annertusiartuinnarnerat pingaartumik pissutaasoq.
- Apeqqutigineqartumut, aningaasat akileraarutinut A-nut akiliutigineqanngitsut sumut atorneqarsimanersut, erseqqissaatigineqassaaq pingaartillugu paasissutissiissutigineqassaaq "karseqanngimmat" aningaasat 40 millioner koruunit "tammarfigisaannik".
- Kommune Kujalleqip aningaasaatai annertuumik tatineqarput aningaasat 31,7 mio. kr.-nik ataatsikkut akilerneqarsimammata Kujallermi Illuutit ataani inissianik aningaasalersuinermut.
- Aningaasaqarnermi ajornartorsiutit annertusineqarput missingersuutit 2023-mi 2024-milu sippuilluni atuisoqarneranit. Tamatuma saniatigut ukiumut affarmullu akiliutit decembarimi 2023-mi/januaarimi 2024-mi ingerlanneqartut.
Kommunalbestyrelsimut ilisimatitsissutigineqarpoq aningaasartuutit annertuut tassani akilerneqartut, uku erseqqissaatigineqarput:
- Sillimmasiinermut aningaasartuutit (7 mio. kr.-nik amerlassusillit 2024-mut),
- ESANI-mi isumaqatigiissut (1,2 mio. kr.-nik amerlassusillit 2024-mi affarmut)
- ISG-mi tapiissutit (3,7 mio. kr.-nik amerlassusillit 2024-mi affarmut)
- Kommunalbestyrelsi aalajangerpoq 2022-mi, INI-mi ukiumoortumik aningaasaliissutit 4-6 mio. kr.-nik amerlassusillit 2023-mut 2024-mullu kommunimut akilerneqassanngitsut, INI-mi inissianik iluarsartuussinermut atugassanngorlugit. Tamanna aamma ukiup aallartinnerani aningaasaqarnermut sunniuteqarpoq.
