Kommune Kujallermi 2022-imut naatsorsuutit maanna matuneqarput
Kommunalbestyrelsip immikkut ittumik ataatsimiinnerani ullumi ataasinngornermi, 2022-imut naatsorsuutit matuneqarput. Naatsorsuutit 2023-mili upernaakkut matuneqarnissaat naatsorsuutigineqarsimaluartut, 32,5 millionit koruuninik amigartooruteqarfiupput tamatumalu saniatigut 15 millioner koruuninit amerlanerusunik aningaasanik tigoriaannarnik amigaateqarnermik kinguneqartitsillutik.
Assiliisoq: Kommune Kujalleq
Kommune Kujalleq aningaasaqarnikkut ajornartorsiuteqarpoq. Ajornartorsiorneq ima annertutigaaq allaat kommuni 100 millionit koruuninik kassekreditimik qaffaasariaqarluni.
Borgmesteri Stine Egede nassuiaavoq aningaasaqarnikkut ajornartorsiutit annersaa "Kujallermi Illuutit"-imit peqquteqartoq, taanna ingerlatseqatigiiffik qinigaaffimmi siuliani pilersinneqarnikuuvoq.
Kujallermi Illuutit aningaasarliorujussuarnermut pisooqataavoq
Suliffeqarfiit ingerlatseqatigiiffiillu pillugit nalunaarsuiffik, CVR, naapertorlugu ingerlatseqatigiiffik taanna 2018-imi pilersinneqarnikuuvoq "namminerisamik imaluunniit ingerlatseqatigiiffiit aqqutigalugit, piginnittuusinnaaneq, aningaasalersuinissaq, sanaartornissaq, ingerlatsinissaq, attartortitsineq, attartugassanngortitsineq, aammalu inissianik, inuussutissarsiornermut, pisortat siunertanut atorneqartussanik tuniniaanissaq" siunertaralugu pilersinneqarluni.
Suliffeqarfik taamanikkut borgmesteriusimasumit, Kiista P. Isaksenimit, kommunaldirektøriusimasumit Kim Dahlimit aammalu aningaasaqarnikkut siunnersortiusimasumit Carsten Frank Hansenimit pilersinneqarpoq. Kingulleq taaneqartoq ingerlatseqatigiiffimmi pisortaanertut atorfinitsinneqarpoq, ingerlatseqatigiiffik pilersinneqarmat.
Kommune Kujallermi aningaasat tigoriaannaat ukiuni qulini kingullerni ineriartorsimanera.
Tusarfik: Kommune Kujalleq
Taamaakkaluartoq 2021-imi, tassa ingerlatseqatigiiffiup ukiuisa pingajussaa ingerlasimalereersoq ilungersunartumik aningaasarliulerpoq, tamatumalu kingorna Carsten Frank Hansen tunuarpoq aggustimi 2021. Kingorna ingerlatseqatigiiffik annaanniarlugu sulissutigineqarpoq, ilaatigut kommunip karsia ingerlatseqatigiiffiup pisussaaffiinik akiliisillugu ingerlatseqatigiiffik atorunnaarsinneqartussanngormat.
- Tassani kommunep karsia ingerlatseqatigiiffiup pisussaaffiinik matussusiiniarnermi akiliisissimassanngikkaluarparput, paarlattuanillu taarsigassarsiniarnissatsinnik ujartuisariaqarsimagaluarluta, borgmester Stine Egede (IA) kommunalbestyrelsimut nassuiaavoq.
2023-imi naatsorsuutit matuneqarnissaat qanillivoq
Ingerlatseqatigiiffiup pinngitsaaliissutaasumik matuneqarsimasup taassuma saniatigut aamma isumaginninnikkut immikkoortortami, pingaartumik angerlarsimaffiup avataanut inissiisarnerit aammalu utoqqarnik isumaginninneq pissutaaqataapput naatsorsuutit 32,5 millionit koruuninik amigartooruteqarlutik naammassinerannut.
Qanittukkut naatsorsuutit 2023-imut matuneqassapput, taamaalillunilu kommunalbestyrelse naatsorsuutigaa kommunep karsia pitsaanerusumik aqunneqartoq qinigaasunut tulliuttunut qinigaaffimmi nutaami iserumaartunut tunniunneqarsinnaassasoq, kommunalbestyrelsimut qinersinerup 1. april 2025-mi ingerlanneqartussap kingorna aallartikkumaartunut.
Sermitsiamit sulissutigaarput borgmester Stine Egede (IA) sukumiinerusumik itisiliitinniarlugu, aaqqissuisoqarfiullu matunerani suli ataatsimiimmat iluatsinngikkallarparput.
