Kommune Qeqertalimmi eqqakkanik ammaannartumi ikuallaasoqarsinnaalertoq

Kommune Qeqertalik eqqakkanik ammaannartumi ikuallaanissamut decembarip 31-ata 2025-p tungaanut immikkut akuersissummik tunineqarallartoq, Naalakkersuisut aalajangerput.

Avatangiisinut Naalakkersuisoqarfik nittartakkamini ilisimatitsivoq, ammasumik ikuallaanissamut immikkut akuersissummik tunineqartut tassaasut Qasigiannguit, Kangaatsiaq, Attu, Ikerasaarsuk, Iginniarfik, Niaqornaarsuk, Kitsissuarsuit, Ikamiut, Akunnaaq aamma Qeqertarsuaq.

- Eqqagassalerinermi unammilligassanut aaqqiissutissat pitsaanerpaat attanneqarsinnaanerpaallu tamatta peqqinnitsinnut avatangiisitsinnullu iluaqutaasumik pilersinniarlugit, Naalakkersuisunit kommunit qanimut iliuuseqarfiusumillu oqaloqatigineqarput. Naalakkersuisuni isumaqarpugut, ammaannartumi ikuallaasarnerit sapinngisamik pinngitsoortinniarneqartassasut. Nuummi Sisimiunilu nuna tamakkerlugu ikuallaaviit, marluullutik maanna ingerlasut, sanaartornerisigut eqqortup tungaanut siumut alloriarpugut, Isumaginninnermut, Suliffeqarnermut, Nunamut Namminermut Avatangiisinullu naalakkersuisoq Bentiaraq Ottosen oqarpoq.

Kommunit akisussaaffigigaat

Eqqagassalerineq kommunit suliassaraat. Eqqakkanik ikuallanneqarsinnaasunik ikuallaanermi ikuallaaviit avatangiisinut akuerisat atorneqassapput. Taamaattorli Naalakkersuisut kommunalbestyrelsit qinnuteqarnerisigut 2025-mi decembarip 31-ata tungaanut eqqakkanik ikuallanneqarsinnaasunik nukinginnartunik ammaannartumi ikuallaasarnissaminnut immikkut ittumik akuersissuteqarallarsinnaapput. Kommune Qeqertaliup qinnuteqaatini 2025-mi aggustip aallaqqaataanni nassiussimagaa, Naalakkersuisoqarfiup ilisimatitsissutigaa.

- Nuummi Sisimiunilu nuna tamakkerlugu ikuallaaviit, marluullutik maanna ingerlasut sananerisigut siumut eqqortumik alloriarpugut. Kisiannili najukkani suli eqqagassalerinerup unammillernartoqartinneqarnera paasisinnaavarput, taamaattumillu Naalakkersuisut nakkutigisamik ammaannartumik ikuallaasarnissamut immikkut ittumik akuersissuteqarallarsinnaanermut periarfissaqarput, tamannalu Kommune Qeqertalimmut maanna nalunaarutigineqarluni, Bentiaraq Ottosen oqarpoq.