Kommunimi atorfilittat qullersaat ukiaru taamaatissasoq
Avannaata Kommuniani atorfilittat qullersaat, Nick Nielsen soraarniuteqarsimalluni nalunaarpoq.
Nick Nielsenip kommunimi atorfilittat qullersaattut ukiaru tunuarniarluni nalunaarutigalugu kommunip nittartagaani allappoq.
Assi: Leiff Josefsen
Avannaata Kommunia nutaamik qullersartaassaaq.
Maanna kommunimi atorfilittat qullersarisaat Nick Nielsen ukiaru atorfimminit tunuarniarluni kommunip nittartagaani nalunaarpoq.
Naak ukiumi ataatsimut atorfinitsitsineq naammassigaluartoq februaarimilu ukiunik pingasunik sivitsorneqaraluartoq tunuarpoq.
- Sulinngiffeqaqqammerpunga, sulinngiffeqarnermalu nalaani piffissaqarsimavunga nalilersuilluarnissannut. Malungisinnaavara piffissanngorsimasoq ingerlariaqqinnissannut, taamaattumillu qinerpara ukiamut atorfinnit tunuassallunga, Nick Nielsen Avannaata Kommuniata nittartagaani allappoq.
Nick Nielsen soraarniuteqarsimalluni, pisortassamilli nutaamik ujaasineq aallartitsinnagu kommunalbestyrelsi nutaaq inissititertariaqartoq Sermitsiamut allakkatigut akissuteqarluni ilisimatitsivoq.
Nick Nielsen oqaluttuarpoq nuliani takornarialerinermi suliffeqarfimmi Inuk Adventuremi piginnittuusoq, kommunimiluatorfilittat qullersaattut suliunnaaruni taanna suliffeqarfimmik ingerlatsinerani ikiorniarlugu.
Nick Nielsen 2019-imi kommunimi atorfilittanut qullersanngorpoq, kingullertullu Palle Jerimiassenip borgmesteriunerani sulivoq.
Palle Jerimiassenili Demokraatit sinnerlugit kommunimut qinigassanngortikkami 104-innarnit qinerneqarluni borgmesterinngoqqinngitsoorpoq. Palle Jerimiassen 2021-mi qinersinermi Siumut sinnerlugu qinigassanngortikkami 338-nit qinerneqarpoq.
Lars Erik Gabrielsen kommunimi borgmesterinngussangatinneqarpoq. Siumut Nalearlu kommunalbestyrelsimi naalakkersuisooqatigiilernissamik isumaqatigiissuteqarput, tassanilu Lars Erik Gabrielsen borgmesterinngussaaq.
