Kommunip Munckip ineqarfiutai pisiarinialersaarai

Munck Gruppenimi sulisut Ilulissani ukiuni kingullerni mittarfissualiorneranni sumiiffik annertooq ineqarfittut atorpaat.

Sanaartorneq naammassiartulerpoq, mittarfillu aappaagu atorneqalissasoq naatsorsuutigineqarluni.

Sulisut ineqarfiat 98-inik initalinnik, allaffilik, igaffeqarlunilu nerisarfilik Avannaata Kommuniata pisiarissanerlugu eqqarsaatersuutigaa.

Borgmesterip Lars Erik Gabrielsenip (S) siunnersuut kommunalbestyrelsimut saqqummiuniaraa Avannaata Kommunia nittartakkamini allappoq.

Ineqarfiit ilinniartunut ininngorlugit piffissami sivikitsumi suliarineqarsinnaasut borgmesterip periarfissatut isigaa.

- Inuusuttatta allamut ilinniariartorlutik aallanngikkaluarlutik Ilulissani ilinniagaqarsinnaanissaat kissaatigaarput. Taamaattumik ilinniartunut inissianik pilersitsinissaq pimoorullugu suliniutigaarput, borgmester Lars Erik Gabrielsen oqarpoq, nangillunilu:

- Munckip maannakkut sulisunut tammaarsimaarfiata tigunissaa periarfissatsialaavoq, pisariitsoq akisoorujussuunngitsorlu.

Ineqarfiit ataatsimut tunineqarnissaat atortullu illoqarfimmut innuttaasunullu iluaqutaanissaat Munckip nalunaarutigigaa kommune nittartakkamini allappoq.