Kommunit eqqagassalerinermut katillugit 15 millionit koruuninnassinnaasut
Nunatsinni kommunit tamakkerlutik eqqagassalerinermut atugassanik aningaasanik Avatangiisinut Aningaasaateqarfimmut katillugit 15 mio. kr.-nik qinnuteqarnissamut periarfissinneqarsimapput, kommuni ataaseq 3 mio. kr.-nik pissarsisinnaasunngorlugu. Kommunit arlallit periarfissaq atorluarsimavaat.
Assiliisoq: Leiff Josefsen
OBS: Allaaserisaq qulequtaa aallaqqaasiutaalu avatangiisinut naalakkersuisoqarfiup saaffiginnereerneratigut naqqinneqarput. Naalakkersuisoqarfik ilisimatitsivoq kommunit tallimaasut tamakkerlutik avatangiisinut aningaasaateqarfimmut eqqagassalerinermut aningaasartuutinut atorsinnaasunik aningaasanik qinnuteqarsinnaatinneqarsimasut. Periarfissaq kommunit arlallit atorluarsimavaat.
Avatangiisinut Aningaasaateqarfik suliassanut 14-inut agguaaqqammerpoq.
Suliniutit tapersersorneqartut pingaarnertut ukuupput:
- Eqqagassanik immikkoortiterinermik, atueqqinnermik issunngortitsinermillunniit suliat siuarsaaffiusut
- Kommunini eqqagassalerineq
- Aalisakkanut qassutikunik/piniariartarfinnik isumaginninneq
- Avatangiisinut Aningaasaateqarfik ukioq manna aammaloorluni nuna tamakkerlugu avatangiisit pillugit sulianut pissanganartunut tapersiisinnaammat nuannaarutigaara. Suliniutitut nutaatut kommunit eqqagassalerinermi piorsaanissamut katillugit 15 millionit koruuninik, 2024-mut aamma 2025-mut agguarneqartussanik taperserneqartussaapput. Suliat avatangiisinut innuttaasunullu sunniuteqartumik ineriartornissaasa sunniutissaasalu malinnaaffiginissaat qilanaaraara, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund ilaatigut tusagassiuutinut nalunaarummi oqarpoq.
Suliniutit taakku 14-it ukuupput:
Kommuninut immikkut ittumik tapersiissutit:
- Avannaata Kommunia: Upernavimmi eqqagassalerinermut maskiinanik pisinissaq
- Qeqqata Kommunia: Kangerlussuarmi inersuarmut kiassagaanngitsumut neriorsuutip aappaata annertusarneqarnissaa
- Kommuneqarfik Sermersooq: Imermut uuliakunik akulimmut aalannguutsitsisarfimmik pisinissaq
- Kommune Kujalleq: Tasiusami aamma Narsarmijini inersuup kiassagaanngitsup ikkussornissaa
- Kommune Kujalleq: Narsarmijini aamma Alluitsup-Paani eqiterissummik, palle-nik kivitsissutinik generatorimillu pisinissaq
- Kommune Kujalleq: Sequtserummik pisinissaq aamma windrows atorlugit misileraalluni suliniutissaq
Aalisarnermut atortunik katatanik annaasanillu isumaginninneq:
- Ole Egon Møller: Uummannap eqqaani aalisarnermut atortunik eqqakkanillu saliineq
- Lenanguaq Hammond: Innalimmi aalisarnermut atortunik eqqakkanillu katersuineq
- Jan Banemann: Sisimiut eqqaanni aalisarnermut atortunik saliineq
- Hotel SØMA: Aasianni hotel SØMA-p eqqaani eqqaaveqarfissamik nutaamik ikkussuineq
- Qillaq Enok Kuulu Ole Kristiansen: Eqqaavissuarmit aalisarnermut atortunik eqqakkanillu saliineq
- Josef Petersen: Narsami eqqakkanik katersuineq
- Cecilie Vahl: Nuussuarmi saliinissamik suliniut
- Helene Abdali Jensen: Atortunik elektroniskiusunik immikkoortiterinerit atueqqinnerillu – RUC-mit misiliilluni suliniut
Tapiiffissatut innersuussat:
- ESANI A/S: Sanaartornermut tapiissutit
- Innuttaasunut tapersiissutit : Kalaallit Nunaanni eqqugaanerlunnerpaat
Avatangiisinut Aningaasaateqarfik 2018-imi pilersinneqarpoq, ukiullu tamaasa Kalaallit Nunaanni avatangiisinik pitsaanerulersitsisunik suliniutinik aningaasatigut tapersersuisarpoq.
