Illoqarfiit nunaqarfiillu Nunatsinni
isorliunerusuniittut kommuninit sumiginnarneqarput.
Taama isumaqarpoq Panigpak
Daorana, Avannaata Kommuniani Siumut sinnerlugu kommunimut
qinigassanngortittoq.
Illoqarfiit nunaqarfiillu Nunatsinni
isorliunerusuniittut kommuninit sumiginnarneqarput.
Taama isumaqarpoq Panigpak
Daorana, Avannaata Kommuniani Siumut sinnerlugu kommunimut
qinigassanngortittoq.
Taanna Qaanaami najugaqarpoq, kommunillu avannarpasissuani
politikkikkut sinniisoqannginnera ernumassutigalugu oqarpoq.
- Qinigaaffimmi kingullermi
Qaanaamit kommunalbestyrelsimi ilaasortaatitarput ataasiinnaavoq, tamannalu
naammanngilaq. Pissutsit allanngortissagutsigit amerlanerusut taaseqataanissaat
suleqatigiinnerulernissaallu pisariaqartippagut, Panigpak Daorana oqarpoq,
taassumalu inissaaleqineq angerlarsimaffeqannginnerlu kommunip
sumiginnaanerannut takussutissatut eqqaavai.
- Isorliunerusutut
inissisimanitsinni tarnikkut, ineqarnikkut isumaginninnikkullu
sumiginnagaavugut. Ernguttarneq, angerlarsimaffeqannginneq kommunimiillu
periusissatut pilersaaruteqannginnera tamatumunnga ersarissumik
takussutissaapput, Siumup qinigassanngortitaa oqarpoq.
Attassiinnarneq ukkataralugu
Panigpak Daoranap qineqqusaarnermini
kulturimik oqaatsinillu attassiinnarnissaq kiisalu nunap inoqqaavisa
naleqartitaminnik inooriaasiminnillu attassiinnarnissamut pisinnaatitaaffiat
pingaartippai, taamatuttaarlu ileqquusumik naleqartitat ingerlateqqinneqarnissaat
- ingammik piniarnermut, qimeqarnermut pinngortitammillu ataqqinninnermut
ilisimata - pingaartippai.
- Pinngortitaq nerisassatsinnik
pilersuisuugami uagutsinnut illernartuuvoq. Qimussertarpugut ukiukkut
piniariarsinnaaniassagatta. Sakkuuvoq pingaarutilik, kingornussarlu
naleqangaartoq kinguaariinnut tulliuttunut ingerlateqqitassarput.
Panigpak Daorana naapertorlugu illut
oqaluttuarisaanermut tunngassuteqartut kulturikkut kingornussassanut ilaagamik
pingaarnerutinneqartariaqarput.
- Inuit kulturikkut
sunniuteqarsimasut illuisa ilaat maannakkut aserfallakkiartorput, tamannalu
uagutsinnut annaasaqarfiungaarpoq. Inuusuttatta oqaluttuarisaanerput
kulturerpullu ilisimasariaqarpaat. Aserfallatsaaliineq kommunit
akisussaaffigaat, oqarpoq.
Navianartoqartoq
Panigpak Daorana USA-p præsidentiata Donald
Trumpip Kalaallit Nunaannik ilanngussinissamik oqariartuuteqartuarnera
akerleralugu qanittukkut Qaanaami akerliussutsimik takutitsinermik suliniuteqarpoq.
Panigpak Daoranamut politikkikkut oqaaseqaatit kisimik pineqanngillat, aammali
Avannaani innuttaasunut, immikkut
ulorianartorsiortinneqartunut aarlerinartorsiortitsineq piviusoq pineqarpoq.
- Nunanit allanit
soqutigisaqartuniillu allaneersunit akornusersorneqarsinnaavugut.
Inooriaaserisarput annaasinnaavarput. Inuit ikittuinnaat maani najugaqaratta
tamanna uagutsinnut immikkut ulorianarpoq.
- Nammineq
aalajangiisinnaatitaanerput ineriartornissamullu periarfissavut annertuut
siornatigut annaanikuuagut. Soorunami tamanna eqqarsaatigikulasarparput,
ingammik avataanit soqutigineqaleriataaraangatta. Pisinnaatitaaffigummi
annaagutsigit erlinnartumik annaasaqassalluta nalunngilarput. Inuiaqatigiit
ikittuinnaavugut nammineq oqaaseqarlutalu kultureqartut.
Oqaluttuarisaanermi pisut pingaarutillit
ilagaat 1950-ikkut aallartinneranni Pituffimmi sakkutooqarfiup sananeqarnera,
Panigpak Daoranallu tamanna inuiaqatigiit suli anigornikuunngisamik
kingunerluuteqarfiattut taavaa.
- Ullualuinnaat periarfissaralugit
nunaqarfitsinniit qimagutsinneqarsimanerput siusinnerusukkut oqaatiginikuuara.
Tamanna puigunngisaannassavarput. Qimagutsinneqarpugut, tamannalu pissutigalugu
suli aaqqinneqarsimanngitsumik tarnikkut ajornartorsiuteqarpugut. Taama pisoqaqqissinnaanera
ernummatigaarput. Pissutsit ajorsipallassappata kommunimit iliuusissatut
pilersaarusiortoqartariaqarpoq.
