Kujataani aalisartut piniartullu nipaat nutaaq

Kujataani aalisarnermik piniarnermillu inuussutissarsiuteqarnerup iluani atugassarititaasut pitsaanerulernissaannik qaqilerisarnermigut ilisimaneqarluartoq, Qaqortumi umiatsiaararsortuullunilu namminersorluni piniariartitsinermik aallutaqartoq, aamma aalisartut piniartullu peqatigiiffianni QAPP-mi ukiuni arlalinni siulittaasuusoq, 66-inik ukiulik Jens Peter Kielsen piffissami aggersumi annertuumik suliassaqarpoq. 

Taannami Kalaallit Nunaani Aalisartut Piniartullu Kattuffiata KNAPK-p Ilulissani oktobari aallartilaartoq ileqquusumik ataatsimeersuarneranut atatillugu siulersuisuunernik qinersinermi qinerneqarluarluni kattuffimmi siulittaasup tulliatut qinigaavoq. Kujataani aalisartut piniartullu nipaasa ersarinnerulernissaat suliassaminut pingaarnernut ilaasoq taassuma Sermitsiamut oqaatigaa.

Pilersaarutaanngikkaluartoq

Jens Peter Kielsenip KNAPK-p Ilulissani ataatsimeersuarnissaanut QAPP sinnerlugu peqataajartorami, kattuffimmi siulersuisuunernut ilanngunnissani takorloorsimanngikkaluarpaa. 

Ataatsimeersuarnerulli ingerlanerani aalisartut piniartullu Kalaallit Nunaani sumiiffinni assigiinngitsuneersut oqaloqatigisarnerini siulersuisuunernut sassarnissaanik kaammattuisut arlaqarsimapput, tamannalu tunngavigalugu eqqarsaatigilluareerlugu qinigassanngortissalluni aalajangerpoq.

- Siulittaasumut qinigassanngorteqquneqaraluarama naaggaarpunga, peqquneqarnerali malillugu siulittaasup tullissaatut sassarlunga. Ukioqqortusilaareerama siulersuisuunernut qinigassanngortinnissara pilersaarutaasimanngikkaluarpoq, oqarpoq.

KNAPK-p siulersuisuunerini Kujataaneersumik ilaasortaqarnissaa pingaaruteqarluinnartoq taanna isumaqarpoq.

Kujataa eqqumaffigineqarnerulissasoq

Ukiuni kingullerni sisamani KNAPK-miit Kujataa tikinneqarpiarneq ajortoq, taamaattumillu Kujataani immikkoortortaqarfiit maannakkornit annertunerusumik pitsaanerusumillu sullinneqarnissaat suliassaminut pingaarutilinnut ilaasoq Jens Peter Kielsen oqarpoq.

- Immikkoortortaqarfinnut pitsaasumik attaveqarnissaq pingaaruteqartorujussuuvoq. Kattuffiup siuttui nunatsinni siammasissorujussuupput, tamannalu ilaasortat assigiinnerusumik sullinneqarnissaannut qulakkeerinnittuussaaq.

- Kujataanut tunngatillugu suliassat arlaqarput piffissamilu tulliuttumi immikkoortortaqarfiit naapissavakka, oqarpoq.

Aammali aalisarnermut inatsimmi piumasaqaatit assigiinngitsut maannakkut nalornissutaasut qaammarsaatiginissaat suliassanut ilaasoq Jens Peter Kielsen erseqqissaavoq.

Naligiinnerusumik sullissineq 

Avannaani aalisartut tulaattagaat Kujataani tulaanneqartartunut naleqqiullugit amerlanerujussuupput, taamaakkaluartoq KNAPK-p ilaasortaanut tamanut assigiinnerusumik sullissineq anguneqartariaqartoq siulittaasup tullia isumaqarpoq.

- Tamatta assigiimmik suliaqarpugut, taamaakkaluartoq Kujataani aalisakkanik tunisinermi akigitinneqartartut Avannaanut naleqqiullugit appasinnerupput, tamatumunngalu Avannaani unammilleqatigiinnerup annertunerunera peqqutaavoq.

- Taamaattumik nunatsinni aalisartut sumiikkaluarunilluunniit assigiinnerusumik atugassaqartinneqarnissaat suliassatsinnut ilaavoq, oqarpoq.

Jens Peter Kielsenip suliffeqarfik tammajuitsussarsiniartitsinermik ingerlataqartoq Hunters Eye in South Greenland ingerlappaa, taassumalu saniatigut piniarneq aalisarnerlu pillugit meeqqanut inuusuttunullu paasititsiniaanermik ingerlataqartarpoq.

KNAPK-mi siulersuisuunerit nutaat piffissami matumani Nuummiipput, tassungalu atatillugu Inatsisartut Aalisarnermut Piniarnermut Nunalerinermullu Ataatsimiititaliaat ataatsimeeqatigineqarpoq.