ULLOQ UNNUARLU NALUNAARUSIAQ
Kujataani umiatsiaaraq kinngusimasoq nassaarineqarpoq, hashimillu nassaartoqareersoq angut tigusarineqarpoq
Kujataani umiatsiaaraq kinngusimasoq nassaarineqarmat, pingasunngormat ujaasineq annaassiniarnerlu aallartinneqarput.
Angut 19-inik ukiulik Nuummi hashimik poortukkamik aallerniartilluni pingasunngormat tigusarineqarpoq.
Toqqorsivimmit assi: Leiff Josefsen
Pingasunngormat nal. 09.23 politiit nalunaarfigineqarput umiatsiaaraq kinngusimasoq Qaqortup eqqaani nassaarineqartoq.
Umiatsiaaqqap nassaarineqarnera tunngavigalugu umiatsiaaqqami ilaasimasinnaasut ujaarineqarput.
Taama pigaartut pisortaat Jeppe Andsager Sermitsiamut oqaluttuarpoq.
- Naluarput umiatsiaaraq saaviinnarsimanersoq imaluunniit inuttaqarsimanersoq, taanna oqarpoq.
Piginnittoq sumiissusersineqartoq
Umiatsiaaqqamik piginnittoq pingasunngormat politiit attaveqarfigigamikku paasivaat ajunngitsoq, umiatsiaaqqaminilli maqaasisaqartoq.
Politiit Issittumilu Sakkutooqarfiup umiarsuaat ujaasinermut atorneqarsimasut, oqartussalli inunnik nassaarsinnaasimanngitsut, Jeppe Andsager nangilluni oqaluttuarpoq.
Umiatsiaaraq kinngusimasoq qaqinneqarpoq, sisamanngornermilu misissuineq nanginneqarpoq.
Nuummi tigusarinninneq
Kujataani ujaasinerup saniatigut Nuummi aamma nal. 12.30-p missaani tigusarinnittoqarpoq.
Tassani nassiussat ilaanni akitsuuserisut hashimik nassaarsimapput, angutillu poortugaq aaniarlugu takkummat politiit aggersarneqarput.
Angut 19-inik ukiulik tigusarineqarpoq suliamilu unnerluunneqarluni. Kingorna angut iperagaasoq pigaartut pisortaat oqaluttutarpoq, nassiussamilu hashi qanoq annertutigisimanersoq oqaatigisinnaanngilaa.
