Kunngi Frederik: Kalaallit Nunaannut tikeraarnerit tamaasa nuannaartarpunga

Kunngi Frederik Naalakkersuisullu siulittaasuat Jens-Frederik Nielsen (D) Nuup kangerluani umiatsiamik angalaassallutik nal. 11.40 missaani avalapput.

Kunngi umiatsiamik avalannginnini sioqqullugu tusagassiortunut naatsumik oqaaseqarpoq. Angalanermini aalajangersimasumik anguniagaqarnerluni aperineqarami taamaattoqanngitsoq oqarpoq:

- Aalajangersimasumik anguniangaqanngilanga. Kalaallit Nunaannukarpunga, Kalaallit Nunaannullu tikinnerit tamaasa nuannaartarlunga. Nuummilu silaginnera eqqorluarpara, kunngi oqarpoq.

Kunngip tikeraarnera USA-mut nunallu præsidentianut Donald Trumpimut oqariartuutaasoq aammalu Kunngeqarfimmi ataqatigiilluartoqarluarneranik ersersitsiniarnerusoq immikkut ilisimasalinnit nalilerneqarnikuummat tusagassiortoq taama aperaaq. Præsidentimmi Kalaallit Nunaat USA-mit aqunneqartariaqarlunilu pigineqartariaqartoq arlaleriarluni oqariartuutigisarpaa.

Jens-Frederik Nielsen: Kunngip Kalaallit Nunaat uummateqafigisorujussuuaa

Naalakkersuisut siulittaasuat Jens-Frederik Nielsen (D) Qinngorpumi umiatsialiviup eqqaani tusagassiortut apeqqutai aamma akivai.

- Kunngip Kalaallit Nunaat uummateqarfigisorujussuugaa maluginiartuaannarsimavara, tamanna takuneqarsinnaajuaannarsimavoq. Ukiorpassuarni aamma taamaappoq - aamma ataqqinartorsuaq dronning Margrethe taamaappoq.

- Taamaammat nunatsinnut uummateqarnerat apeqquserneqarsinnaanngilaq, qaaqqusisinnaaneralu nuannaarutigaara, Jens-Frederik Nielsen oqarpoq.

Kunngip tikeraarnera qanoq isumaqarnersoq aamma apeqqutigineqarpoq:

- Kunngip Kalaallit Nunaannut soqutiginnilluinnarneranik ersersitsisoq isumaqarpunga, aamma Kalaallit Nunaat nuannarilluaraa. Kiisalu kalaallit innuttaasuisa kunngikkormiullu akornanni ataqatigiinneq suli nukittusoq.

- Kunngip nunatsinnut uummateqarnini takutinniarlugu tikissinnaammat nuannaarutigaara. Maanna umiatsiarluta nuannisaaqatigiissaagut, Jens-Frederik Nielsen oqarpoq.