Siunnersuisoqatigiit suaaruteqarput — siulittaasoq tunuarpoq

Inuit Pisinnaatitaaffii Pillugit Kalaallit Nunaanni Siunnersuisoqatigiit (IPPS) ulluinnarni aqutsisuisa, Inatsisartut kajumissaarpaat ilaasortat inuiaqatigiinnik sullissinertut atugaqalernissaat qulakkeeqqullugit. Peqatigisaanik siunnersuisoqatigiit inatsisaasa ullutsinnut naleqqussarneqarnissaat, pisariaqarpoq.

Siunnersuisoqatigiinni ulluikkut ilaasortat, inatsisitigut pisinnaatitaaffeqannginnerat ataatsimiinnerni suliassaminnik suliaqarniarlutik sulinerminnit sulinngiffeqarsinnaannginnerat, ataatsimiititaliap ajornartorsiutitut isigaa.

Taamaattumik peqataanissaq sulisitsisup piumassuseqarneranut apeqqutaagajuppoq, tamannalu aningaasarsianik annaasaqarnermik kinguneqarsinnaavoq, Inuit Pisinnaatitaaffii pillugit Kalaallit Nunaanni Siunnersuisoqatigiit ulluinnarni aqutsisui, tusagassiuutinut nalunaarummi allapput.

Siulittaasoq tunuarpoq

Siunnersuisoqatigiit ilisimatitsissutigaat Tukumminngiaq Olsen Lyberth perulunnartumik napparsimareerluni meeqqanilu pingasut mikisut, ilaquttani sulininilu pingaarnerpaatinniarlugit siulittaasutut tunuarniarluni aalajangertoq. Siunnersuisoqatigiinni siulittaasup tullia inuiaqatigiinnut sullissinermut atukkat amigaateqarnerat, aningaasatigullu suleqataanermi kingunerlutsitsisinnaanera pissutigalugit tunuarniarluni aamma aalajangerpoq.

- Ukiuni 14-ini Kalaallit Nunaanni inuit pisinnaatitaaffiinik suliaqarnerup ineriartortinnissaanut suleqataasimavugut, kisianni siunnersuisoqatigiit sulinerminni atugassarititaat naammattumik ineriartortinneqarsimanngillat. Ilaasortat inuiaqatigiinnik sullissinertik pissutigalugu isertitassaminnik annaasaqarsinnaappata, politikkikkut iliuuseqarnissaq pisariaqarpoq. Inuiaqatigiinnik sullissinertut ilaatinneqalernissaq Inatsisartut maanna minnerpaamik qulakkeertariaqarpaat, peqatigisaanillu siunnersuisoqatigiit inatsisaat ullutsinnut naleqqussarneqartariaqarpoq. Inuit Pisinnaatitaaffii pillugit Kalaallit Nunaata Siunnersuisoqatigiivisa ulluinnarni aqutsisui, tusagassiutitigut nalunaarutaanni taama allaqqavoq. 

Ataatsimiisitaliaq: Kingunerineqarsinnaasut Naalakkersuisut misissussavaat

Inuit Pisinnaatitaaffii pillugit Siunnersuisoqatigiinnut ilaasortat ombudsmandimut maleruagassanit pineqarnissaannut kingunerineqarsinnaasut Naalakkersuisut, misissussavaat. Siunnersuut Inatsisartut marlunngornermi oqaluuserissavaat.

Inatsisinut Atuutsitsinermut Ataatsimiititaliap isumaliutissiissutaa Inatsisartuni amerlanerussuteqartunit taperserneqarpat Inuit Pisinnaatitaaffii Pillugit Kalaallit Nunaanni Siunnersuisoqatigiit siunnersuisoqatigiillu assingusumik ittut ilaasortaasa sulinngiffeqarsinnaanerannik aningaasatigut qanoq kinguneqartoqarsinnaanera Naalakkersuisut misissussavaat.

Misissuinerup inernera kingusinnerpaamik 2027-mi ukiakkut ataatsimiinnermi Inatsisartunut saqqummiunneqassaaq inatsisissatut siunnersuutigineqarsinnaasumut isummernissaq siunertaralugu.