Taarsiornermi ilorrisimaarneq

Siusinnerusukkut allaaserisanni, »Ajoqusernermik kingunerlutsitsivipalaaq«-mik qulequtaqartumi, sammisamik politikerit aalajangiisartullu suliassarpassuaqarnerminni puigorsinnaasaannik eqqumaffiginnilernissaat anguniarpara.

Innuttaasut peqqissuunngippata atugarissaarnatillu, suliassat allat tamarmik pingaaruteqanngitsutut isikkoqalersinnaapput. Taamaattumik qulequtaq piaaralunga sakkortuujutippara, sammisap eqqumaffigineqarnerulernissaa anguniarlugu.

Maanna allaaserisanni sammerusuppakka politikerit aalajangiisartullu iliuuserisinnaasaat, atugarliornerup, kingunerluutip tarnikkullu ajornartorsiutit akiorniarneranni atorneqarsinnaasut.

Ukiuunerani taaq issilu illoqarfitsinnut nunaqarfitsinnullu apuupput. Amerlasuut aamma tarnikkut oqimaatsunik misigisaqartarput. Ilaat ukiut ingerlanerini kingunerluuteqalerput, aliasullutik misigissutsinillu artorsaateqarlutik. Ullup qaamanera annikilligaangat nukissaarunneq aamma nuannaarniarnerup appariarnera misigineqarsinnaapput. Sininneq allanngorsinnaavoq, ulluinnarnilu suliassat mikisut allaat ajornakusoortunngorsinnaallutik.

Isumatsassimanermik nalaataqaraanni, imminut sakkortunerusumik iliuuseqaqqulluni oqarfigineqarneq qaqutiguinnaq iluaqutaasarpoq. Nukissaarukkaanni, siunnersuutit pitsaasut soorlu timersorneq nerisassallu peqqinnartut pillugit, suliassatut allatut artornartutut misinnarsinnaapput.

Kisianni Finlandimiunit, ukiuunerani sivisuumik taaruteqartartunut, isumassarsiorfigisinnaasatsinnik peqarpoq. Sauna finlandimiut ulluinnarni ileqquinut pingaaruteqartunut ilaavoq, ukiukkullu imermut nillertumut kininneq aamma nuannarineqarluni. Timersorneq, ullup qaamanera sinilluartarnermullu ileqqut pitsaasut atugarissaarnermut iluaqutaasinnaapput. Sauna imermullu nillertumut kininneq inuit ilaannut ilorrisimaarnermik pilersitsisinnaapput, naak isumatsannermut katsorsaatitut uppernarsarneqarsimanngikkaluartut.

Ilorrisimaarneq tassaasariaqanngilaq akisusoq immikkut ittorlu

Timigissarneq, pisunneq, fiberinik, vitamininik mineralinillu akoqarluartunik nerisaqarneq imaluunniit asasatsinnik peqateqarneq iluaqutaasinnaapput. Ilaannikkut silamut anillanneq imaluunniit seqernup qaamaneranik pissarsineq naammattumik alloriarnerusinnaavoq.

Periarfissalli assigiinngillat. Kalaallit Nunaanni nunaqarfinni mikinerusuni timersortarfeqarnissamut, saunaqarnissamut allanullu periarfissaqarsinnaaneq killeqarsinnaapput.

Aamma kalaallisut paasissutissat ilisimasallu amigaatigivagut. Taartup sininnermut nuannaarniarnermullu qanoq sunniuteqartarnera ilisimavarput? Timersorneq, nerisaqarneq ullullu qaamanera tarnikkut peqqissutsimut qanoq pingaaruteqartigippat? Ilisimasat pingaaruteqarput atugarliornerup pinaveersaartinnissaanut. Taamaattumik kalaallisut paasiuminartunik paasissutissiinernik, paasititsiniaanernik tamanullu ammasumik
oqallinnernik amerlanerusunik pisariaqartitsivugut, taamaalilluni inuit tamarmik imminnut allanullu paarsinissaminnut pitsaanerusumik periarfissaqarsinnaaniassammata

Taartup peerneqarnissaa pisinnaanngilaq, pitsaasumillu inuulluataarniarneq ajornartorsiutinik tamanik aaqqiissutissaanngilaq. Kisianni ukiuunerani atugarissaarnerunissamut periarfissanik pitsaanerusunik pilersitsisinnaavugut.
Pitsaasumik inuulluataarniarneq imminut qanilaartumik pissuseqarfiginninnermik aallartippoq. Oqaluuserineqarnissaanik kanngusuutigisartakkavut oqaluuserisigit, ilisimasagut avitseqatigiissutigalugit, taarnerullu nalaani immitsinnut ikorfartoqatigiitta