Kunngikkormiut Sisimiunut tikipput

Kunngikkormiut Sisimiunut ullaaq qulit qeqqa qaangilaaraa tikimmata innuttaasut isaanni nuannaarneq takuneqarsinnaavoq.

Kunngikkut kunngikkormiut umiarsuaannut Dannebrogimut ilaallutik Sisimiunut tulammata nunarsuarmi erfalasut amuaat.

Sila nuialluni nillataalaaraluartoq, tikilluaqqusineq kialaarpoq.

Dronning Mary kalaallisoorluni kusanarpoq, Kunngilu Frederik qaqortumik annoraaqarluni qaqortumaarluni.

Qeqqata Kommuniani kommunalbestyrelsi borgmesteri kommunaldirektørilu ilagalugit kalaallisoorlutik tikilluaqqusipput.

Andrea Sørensen aamma Uno Bourup naasunik nunatsinneersunik kusanangaaqisunik, Tina Ingemannimiit suliarineqarsimasunik tikeraanut kunngikkormiunut tunniussipput. Naasut kunngikkormiunit nuannaarutigineqarput.

Assaalerpoq

Emma Jensen kunngikkormiunik nuannarisaqarluartunut ilaavoq, taannalu kunngikkormiut meeraalu tikilluaqquniarlugit peqataavoq. Tikilluaqqusiniarluni ulloq ataaseq sulinngiffeqartariaqarsimalluni oqaluttuarpoq. 

Dronning Mary assammillugu ilassigamiuk immikkuullarissumik misigisaqarpoq. Taassumammi maluginiarpaa dronninngi assaalertoq, sila nillermat.

- Assaalerpoq, aaqqatikka atortariaqarpai, Emma Sermitsiamut qungujulluni oqarpoq.

Kunngikkut meeqqatik marluk ilagalugit utoqqaat utoqqaat angerlarsimaffianneersut tikilluaqqusiartortut ilassiorpaat, utoqqaat ilaat ilassineqarami killitsilluni qullilivoq.

Pilersaarut

Kunngikkut marlunngornerup ilaani illoqarfiup katersugaasivianut pulaassapput, ilaatigut Aasivissuit Nipisat pillugit saqqummiisoqassalluni. Tamanut aamma arpatsitsisoqassaaq, tassani arpanneq kunngip aallartissavaa.

Borgmesteri aamma asanninnerup aqqutaani pisuttuaqatigineqassaaq, tassani naluttarfissaq eqqartorneqassalluni.

Pilersaarutip sinnera Qeqqata Kommuniata Facebookiani takuneqarsinnaavoq.