Kunngip kaffillernera soqutigineqarluartoq: - Tikeraarneq pingaaruteqarluinnarpoq, kaffisoriaq oqarpoq

Nuup Kangerluani umiatsiamik angalareernerup kingorna Katuami kaffillertoqarpoq, tassanilu Nuummi innuttaasut kunngi naapissinnaavaat.

Inuppassuit Katuap iluani Nuummilu aqquserngit sinaanni kunngi takusinnaajumallugu utaqqipput.

Pissangalluni utaqqisoqareersorlu kunngi takkuppoq.

- Isilerpoq! kunngi Frederik inuppassuit akornanni takuneqarsinnaanngormat meeraq nuannaarluni nillerpoq.

Inuppassuit kunngip isernerani ersaattaallutillu hurraartorput.

Inuit qungujulluni ilassiorpai, Jens-Frederik Nielsenilu Juaaka Lyberthilu nerriveqatiginiarlugit ingikkiartorluni.

- USA-miittup nakkutigigaatigut qularinngilara

Kaffisoriartortut ilagaat Rebecca Olsvig, taassumalu kunngip Kalaallit Nunaannut tikeraarnera nuannaarutigeqaa:

- Tikilluaqqorusuppara, Kalaallit Nunaannukarneralu nuannaarutigeqaarput. Kalaallit Nunaat uummateqarfigaa uagullu aamma nuannaraarput. Kalaallit Nunaat pillugu ilisimasaqarluarpoq tamatigullu tikilluaqqusaasarluni. Piffissami assoralisimaarfimmi takkummat aamma nuannaarutigeqaara.

Tikeraarneq USA-mut ersarissumik oqariartuuteqarfiussasoq Rebecca Olsvigip neriuutigaa:

- Qanoq inissisimanerput sorusunnerpullu nunarsuup sinneranit paasineqassasoq neriuutigaara. Danmarkimut Europamullu atassuteqarusuppugut.

- USA-miittup nakkutigigaatigut qularinngilara. Takku peqatigissanngilagut, Europamut atavugut.

- Isumaqaqaaq

Lisa Borrisip kaffillerneq aamma peqataaffigaa.

Sooq kaffisoriarpit?

- Kunngip takunissaa nuannarisarakku.

Kunngi takusareernikuuaa, ullumilu aamma takullugu. Kusanartunik aamma assiliisimavoq.

USA-mik politikkikkut isumaqatigiinngiffiusumi tikinnera qanoq isumaqarsoraajuk?

- Sunik tamanik.

Oqariartuuteqartoqarsoraajuk?

- Neriuppunga. Politikkeqqusaanngilaq, takkutiinnarpoq, ilaagaativut. Isumaqaqaaq.

Kunngi sivikitsumik najuutereerluni pilersaarutaasumut tullernguuttumut ingerlaqqippoq: Hans Egedep illuani unnugu nereqatigiinnissaq sioqqullugu nunami pisuttuarneq.