KL

DK

Kunngip Mútellu ullorsiutaat naapisitsiuminaatsitsisut – Trumpillu ernera nunatsinnukalerneragaalluni

Danskit tusagassiorfiini isummersuutit imaaginnavipput sooq Mútip Kunngimut tikeraarnissaa taamaatiinnarneqarsimanersoq. - Tassaana ullorsiutaat ajornartorsiortitsisut, Naalakkersuisut siulittaasuata naalakkersuisoqarfiani pisortaaneq nassuiaavoq. Tamatuma ilutigisaanik aamma Trumpip ernera Kalaallit Nunaannut tikeraartussaaneragaavoq.

Frederiup Kunnginngorneranit ukioq ataaseq qaangiutilersorlu, Kunngip aamma Naalakkersuisut siulittaasuata, Múte Bourup Egedep naapinnissaat pilersaarutigineqaraluarpoq. Kisianni piffissamik kipusoorneq pissutigalugu, taakkua ullorsiutaasa assigiinngissuteqarnerat pissutigalugu, Kunngi aamma Múte piffissami allami naapittariaqarput.
Jensine Berthelsen
tusagassiortoq
Thomas Munk Veirum Tusagassiortoq
Saqqummersinneqarpoq

Danskit tusagassiorfiini eqqoriaasoqaqattaarpoq sooq Naalakkersuist siulittaasuata, Múte Bourup Egedep Kunngi Frederikimut pulaarnissaa taamaatiinnarneqarsimanersoq.

Tassunga atatillugu annikigisassaanngitsumik ilimasuutigineqarpoq Kalaallit Nunaata politikkikkut pilersaarutai taamaatitsinermut pissutaasimassanersut, tamatumalu qaavatigut USA-p, pingaartumillu Trumpip Kalaallit Nunaannut soqutiginninnerujussua ilanngullugu taputartuunneqarluni.

Naalakkersuisut siulittaasuat aamma naalakkersuisoqarfiani pisortaaneq eqqoriaasaqattaarnernut pissutissaqannginneraapput.

Naalakkersuisut siulittaasuat, Múte Bourup Egede Sermitsiamut ilisimatitsivoq ajornarsimasoq nammineq ullorsiutiminik Kunngillu ullorsiutaanik naapisitsiniaaneq, taamaammallu naapinnissartuk kinguartikkallarneqartariaqarsimasoq aammalu erseqqissaateqarpoq pisoq politikkimut attuumassuteqanngilluinnartoq.

Naalakkersuisut siulittaasuata naalakkersuisoqarfiani pisortaaneq, Hans Peder Barlack Christensen aamma uppernarsaavoq "ullorsiutinik naapitsitsiuminaanneq" pineqartoq.

Kunngi Frederikip aamma Naalakkersuisut siulittaasuata, Múte Bourup Egedep naapinnissaat piffissaq naleqquttoq nassaarnissaa sulissutigineqartoq ilanngullugu ilisimatitsissutigineqarpoq.

Trumpip meerai Kalaallit Nunaannut tikeraassappat?

Amerikami præsidentinngortussap, Donald Trumpip ernerata Kalaallit Nunaannut tikeraarnissaanik aamma tusatsiakkat ingerlarsorput.

Sermitsiamiit periarfissaq iluatsillugu apeqqutigaarput USA-meersunik tikeraartoqalernersoq:

- Taamaattoqarsimassappat tamanna Naalakkersuisut ilisimasaqarfiginngilaat. Kalaallit Nunaata namminersornerullutik oqartussanut USA-meersunik tikeraarnissamik nalunaaruteqartoqarnikuunngilaq, taamaattumik præsidentinngortussamut attuumassuteqartunik tikeraartoqassappat, namminerisamik aaqqissuunneqarsimassaaq, Namminersorlutik Oqartussanit erseqqissaatigineqarpoq.

Taamaattorli Nunanut Allanut Naalakkersuisoqarfimmit ilumoorneragaavoq , marlunngornermi Donald Trump Jr. Kalaallit Nunaanut tikittussaasoq, tikeraarnerlu taanna nammineq aaqqissuussaasoq ilanngullugu erseqqissaatigineqarluni.

Ullumikkorpiaq Donald Trump præsindentimut qinersinermi ajugaasimasutut suaarutigineqarpoq, alaatsinaattunillu nalilerneqarpoq taanna 20. januar præsidentinngoruni annertuumik pissaaneqartussaasoq.

Taamaammallu uissuumminarpoq maluginiarnarlunilu, Donald Trumpip Kalaallit Nunaat pillugu oqaaseqaqattaariitsiaannartoq ernera Kalaallit Nunaannut tikeraartussanngoriataarmat.

Nunanut allanut ministeriaqarfik: Oqaaseqarfiginianngilarput

Donald Trump siusinnerusukkut oqarnikuuvoq Kalaallit Nunaata aqullugulu piginissaa USA-mut isumannaallisaanikkut isumalerujussuusoq pingaaruteqarluinnartorlu.

Naalakkersuisutulli danskit nunanut allanut ministeriaqarfik tikeraarnissaq pillugu oqaasissarpassuaqanngillat.

TV 2-mut nunanut allanut ministeriaqarfimmit erseqqissaatigineqaqqippoq tikeraarnissaq matumani pineqartoq pisortatigoortumik tikeraarnerussanngitsoq:

- Maluginiarparput Donald Trump Jr.-ip Kalaallit Nunaannut tikeraarnissaa pilersaarutigineqartoq. Matumani pisortatigoortumik amerikamit tikeraartoqarnissaa pineqanngilaq. Tamanna pillugu Nunanut Allanut ministeriaqarfik tikeraarnissaq taanna pillugu allamik oqaaseqarsinnaanngilaq.

donald trump múte bourup egede kong frederik samfund inuiaqatigiit

ATORFIIT Se alle jobs

Powered by Labrador CMS