Kissalaartumik mianersortunnguamilli Trump Jr. tikilluaqquneqarpoq

Kalaallit Nunaanni Danmarkimiillu politikerit qaangiuttoorlutik sulisariaqalerpasipput USA-p Kalaallit Nunaannut soqutiginninnera aallaavigalugu.

Sermitsiap mittarfimmi naapitai Kalaallit Nunaanni inuiaqatigiit ataatsimut qanoq ilisimasaqartiginerannik sinniisuussagaluarpata, taava inerniliisoqarsinnaassagaluarpoq Kalaallit Nunaanni innuttaasut piareersimanngitsut nunap siunissaa pillugu aalajangiinissaminnut, maannakkutut inissisimanera eqqarsaatigalugu, aammali siunissami pisussanut tunngatillugu.

Donald Trump Jr.-ip nammineerluni Kalaallit Nunaannut tikeraarnermi isumaa annikillisinniarsarigaluaraa, taamaattoq tikeraarnerup immikkut ittumik pissutaa tassaavoq ataatami, USA-mi præsidentinngortussap, USA-p Kalaallit Nunaata pigilernissaa aqulernissaalu anguniarmagu. Aammalu ernerata tikeraarnera præsidentinngortussap suliassap pingaaruteqassusianik ersersitsivoq.

- Danmarkip ajortumik pinikuuaatigut

Malo Reimer, ullumikkut teqqialik MAGA atorlugu, Trumpip qanillattornermini siunertaa pillugu sukumiinerusumik paasisaqarusuppoq.

Naak massa teqqialimmik atuinermini Trumpimut illersuisutut  takussutissiigaluarluni, Trumpimut illersuinanilu illuatungiliuttuunngilaq:

- Pisut suli nalileruminaatsippakka, taamaattumik oqarsinnaanngilanga Trumpimut illersuisuunerlunga illersuisuunnginnerlungaluunniit, kisianni pissanngatigara qanoq  ineriartortitsisoqassanersoq, Malo Reimer oqarpoq.

Illimmi aalajangiisuussagaluaruit Danmarkimut atanerput ingerlaannassava imaluunniit USA-p ataaniilissaagut, suna toqqassaviuk?

- Kingumut qiviaraanni Danmarkip qanoq pisarsimaneraatigut, taava alloriartariaqarpugut, aamma amerikamiut naligaluta suleqatiginnikkusussappata, taava periarfissaqarsinnaavoq. Taama oqarpunga uppernarsaatit suli takkuttarmata Danmarkip qanoq pineqaatigut, aamma Naalakkersuisut qanoq Danmarkimit pineqarnersut arajutsisimannginnakku, takuneqarsinnaavorlu naligiittoqanngitsoq.

Taava isumaqarpit USA-mut Kalaallit Nunaata siunissami atassuteqarnerunissaa aqqutissaasoq?

- Tamanna suli akissutissaqartinngilara, aamma maluginiartariaqaratsigu Alaskami naggueqatigut qanoq pineqarsimanersut, Inuttut oqaatsitik kulturertillu qangali annaanikuuaat, taamaattumik sunaluunniit anngaaginnarsinnaanngilarput, kisianni naligiissumik pineqassagutta, taava aap!

- Tupinnaqaaq kisianni ilumoortoq!

Inutsiaq Lassen Kramerip USA-p soqutiginninneranut qanoq isummernissaminik nalornivoq, manna tikillugu tigussaasunik isummernissaminut tunngavissaaleqigami:

- Tupinnaqaaq Donald Trump Jr. maanna Kalaallit Nunaannut tikeraartoq isigalugu, kisianni tassa ilumoorpoq, tamannalu eqqarsaatigalugulu isummerfigisariaqassavarput, maannami nammineq isitsinnik takusinnaagatsigu soqutiginninneq ilumoortoq.

Inuusuttuuvutit inuunerillu tamaat siunitsinniippoq, qanoq isumaqarpit Kalaallit Nunaata siunissaa pillugu, Danmarkimik suleqateqarneq ingerlaannassava imaluunniit USA-mik suleqateqarnissaq toqqarusunneruiuk?

- Tamanna suli akissutissaqartinngilara, kisianni Danmarkimik ingerlaannartumik suleqatigiinnissaq orniginneruara, Inutsiaq Lassen Kramer akivoq.

- Soorunami pissanganarpoq

Inuuteq Aronsenip aamma ajornartorsiutigaa Kalaallit Nunaata, USA-p aamma Danmarkip akornanni pisut qanoq isummerfigissanerlugit.

Taamaakkaluartoq mittarfimmut Donald Trump Jr. tikilluaqqujartorlugu najuuppoq:

- Soorunami pissanganarpoq Amerikamiit tikeraartoqarnerput. Kisianni isummerfigiuminaatsippara, pissutsinik malinnaarpiannginnama.

Kisianni illit nammineq aalajangiisussaagaluaruit, Kalaallit Nunaata suna siunnerfigissavaa?

- USA!

Tassa isumaqarpit nunarput USA-mut ilanngunneqassasoq?

- Aap!

Danmarkimik suleqatigiinneq naammagisimaarpaa

Ullaaq aatsaat Anna Heilmannip paasivaa Donald Trump Jr. Nuummut tikeraassasoq, taannalu suleqatini ilagalugit mittarfimmukarsimapput pisoq malinnaaffiginiarlugu.

- Ullaaq aatsaat tusarpara taanna Kalaallit Nunaannut tikeraalersoq, suleqatikkalu mittarfimmut pisunut malinnaajartorniarlutik isumaqatigiimmata, aalajangerpunga ilagissallugit, nammineq isinnik Donald Trump Jr.-imik takuniarlugu.

USA-p Kalaallit Nunaannut qanillattornera qanoq isumaqarfigaajuk?

- Siusinnerusukkut tusareerparput Trumpip Kalaallit Nunaat pisiarerusussimagaa, tamanna ajunngitsoq isumaqarfigisinnaagaluarlugu, nalornivunga suut tunngavigalugit tamanna pissagaluarnersoq, taamaattumik apeqqut taanna qanoq akissallugu nalugallarpara.

Illimmi aalajangiissagaluaruit, qanillattortoqarneranut Kalaallit Nunaat qanoq qisuariassava?

- Danmarkimik suleqateqarnerput naammagisimaarpara, kisianni USA-p ataani Kalaallit Nunaat qanoq inissisimanersoq takorlooruminaappoq, taamaattumik Kalaallit Nunaata pitsaanerpaamik qanoq inissisimalerumaarnissaa nalileruminaatsippara.

Kalaallit Nunaata Trumpimik nuannarinninnerpaat ilaat: - Trumpip nalunaarutai qanoq paasineqartariaqarnersut ilinniartariaqarparput

Jørgen Boassen tassaavoq Kalaallit Nunaata Trumpimik nuannarinninnerpaat ilagaat. Taanna Trumpimut qaninnerpaanut ilanngussimavoq. Tamanna takuneqarsinnaavoq Donald Trump Jr.-ip nunatsinnut tikilluaqqugamiuk inuiattut assuutinik atorluni, aammalu Juniorip Boassenillu akornanni ikinngutigiinneq tatigeqatigiinnerlu annertooq takuneqarsinnaammat.

Tamanna tunngavigalugu isumaqartoqarsimassagaluarpoq Boassenip Kalaallit Nunaat USA-p ataani inissisimalernissaa tapersersoraa, kisianni taassuma erseqqissumik oqaatigaa nammineq tapersersuinermigut siunertarigaa USA-mut suleqatigiinnerup qaninnerulernissaa, nunarsuarmi nukittunerpaamut pinngitsuuisinnaannginnissaq pinnagu:

- USA-p Kalaallit Nunaat pigilernavianngilaa, tassami nammineq pigaarput, kisianni suleqatigisinnaavaatigut, aammalu isumaqarpunga pingaaruteqartorujussuusoq siunissami qaninnerusumik annertunerusumillu suleqatigiinnissamut aqqutissiuussinissaq, tassami nunatta inuisa 75 procentiisa missaanniittut atugarliorput aammalu nunarput siuarsagassarujussuuvoq. Taamaattumik pingaaruteqartorujussuuvoq suleqatigiinnerup attatiinnarneqarnissaa ineriartortinneqarnissaalu, pingaartumik USA-p peqatigineratigut.

Kisiannimi præsidentinngortussap Kalaallit Nunaat pigilerusuppaa aqulerusullugulu?

- Tamanna Trumpip kissaatigaa, tassami Kalaallit Nunaat Amerikap avannaani nunavissuup ilagaa, tamannalu pillugu aamma Trumpip naalagaaffiit allat Kalaallit Nunaannut isertinneqannginnissaat kissaatigaa, pingaartumik Kina Ruslandilu, tassalu tamanna Trumpip oqariartuutaa. Angut taanna eqqarsaatersornermik pikkorippoq qarasarillunilu, tamannalu isumaqarpoq oqariartuutai qanoq paasissanerlugit isumaliutigineqaqqaartariaqartoq.

Qanormi isumaqarpit USA-p qanillattorneranut tunngatillugu qanoq iliortoqartariaqartoq?

- Tamanna Kalaallit Nunaanni innuttaasut aalajangigassaraat.

Illimmi inuttut nammineq qanoq isumaqarpit?

- Pingaaruteqarpoq neqeroorutip sukumiisumik misissorneqarnissaa, periarfissat tassunga attuumassutillit qulaajarneqarnissaat, kisianni ilisimavarput periarfissaq taama annertutigisoq suleqatigiinnissamut nunatsinnilu illersuinissamut maangaannartissinnaanngikkipput. Assersuutigalugu Danmarkip USA-mut suleqatigiinnerminni ukiut 75-it sinnerlugit suleqatigiipput, ukiunilu amerlasuuni Danmarkip Kalaallit Nunaat qulaatiinnarlugu USA-mut isumaqatigiissusiortarpoq. Maanna inuiaqatigiittut ingerlaqqikkusuppugut, pisinnaalluarpugut pingaarutilinnik aalajangiinissatsinnut, tamannalu iliuuseqarfigisariaqarparput.

- Aamma maanna USA toqqaannartumik Kalaallit Nunaannut saaffiginnippoq Danmark aqqutiginagu, periarfissarlu taanna pingaaruteqarpallaarpoq iliuuseqarfigineqartariaqarlunilu. Periarfissaq taanna siornatigut pigisimanngilarput, tassami USA-mi præsidentiusarsimasut, pingaartumik demokratiusut ukiut ingerlanerini Danmarkimut saaffiginnittarsimapput uagutsinnut toqqaannartumik saaffiginninnatik, danskillu tungaannit uagut inuiaqatigiittut iliuuseqarsinnaanngitsutut isigineqartarnerput annertoorujussuarmik alliseequtaasunut ilaanikuuvoq, tamannalu qaangerlugu ingerlaqqittariaqarpugut.

Jørgen Boassen naggasiivoq kaammattuuteqarluni Kalaallit Nunaanni inuiaqatigiit tamarmik isumaqatigiinngissuteqarsinnaagaluarunilluunniit ataatsimoortariaqartut, Kalaallit Nunaat ataatsimoorluni nunamut iluaqutissat annertunerusut angusinnaassammagit.

- Assersuutigalugu Harris-ikkormiunut nuannarinnittuunngilanga, kisianni nukikka atunngilakka isumaqatiginngisakka isornartorsiorlugit akeqqersimaarfigalugillu. Uagut Kalaallit Nunaanni inuiaqatigiinni tamanna ilikkalaartariaqarparput, akerartuineq akeqqersimaarnerlu aqqutissaanngitsut paasisariaqarparput nunatsinnullu iluaqutissat eqqarsaatiginerulerlugit. Oqareernittut, innuttaasut 75 procenti atugarliorput, pisariaqarporlu atugarissaarnerulersitsinissap aqqutissiuunneqarnissaa, siunissami kinguaariit ataatsimoorfiusumik nukittullutillu nunatsinnik aqutsilerumaarnissaat qulakkeertariaqaratsigu.