KL

DK

Takornariaq, influenceri politikikkullu oqariartortitaq: Donald Trump Jr. Hans Egedemut pulaartoq

Nuummut tikeraap oqallisigineqaqisup illoqarfiit pingaarnerannut tikeraarnini politikikkut mianernarnerpaami aallarnerpaa. Qattunermiinneq politikimut tunnganani SoMe-mut tunnganeruvoq, taamaattorli natsat aappalaartut MAGA-t saqqumitinneqarput.

Donald Trump inuusukannersoq nuummi Hans Egedep eqqaassutissaata saavani. Jørgen Boassen, Donald Trump Jr-p tikeraarnerani pulaarsaasoq qiterliuvoq.
Morten Okkels Tusagassiortoq
Saqqummersinneqarpoq

Donald Trump Jr-ip aquttulerluni biilini qaqortuni Nuup mittarfia qimakkamiuk biilerpaalunnik malitseqalerpoq. Biilit allat Trumpimik illersuisut, tusagassiortut soqutiginnittullu allat susoqarneranik alapernaaserlutik malinnaapput.

Ingerlaaqatigiit Annaassisitta Oqaluffiata eqqaani unimmata, Trump Jr-p qattunermut qaqilluni Hans Egede takusarniaaraa paasinarsivoq. Eqqaassutissaq maanna Trumpip utoqqaanerup oqallisigitiligaanik amerlasuunut naalagaaffeqatigiinnermik takutitsisoq. Arlaliulluta qummukajaakkut tuaviorluta arajutsinianngippugut. Præsidentinngortussap ernera qattornup qaavanit politikikkut nalunaaruteqalernerpa?

Naagga, taamaattoqannginnera paasinarsivoq. Taamaaliornianngilaq. Qanoq innermisut takornariatut influenceritullu pissusilersorneruvoq. 

– Tassa aana ajoqersuiartortoq 1721-mi maanga tikittoq. Super cool stuff, Donald Trump Jr. assiliissummut Trump Force Onemilu angalaqatiminut saalluni oqarpoq. 

– Piffik assaa kusanaq. Maanga piniariarusuppunga...

– Floridamit qiianarneruvoq. Inuit ukiut untritillit matuma siorna Kalaallit Nunaanni najugaqarsinnaanerat tupinnaqaaq, taanna nangilluni oqarpoq.

Arlaliusugut ilavut politikikkut soqutiginartunik oqartoqarnissaa neriuutigigaluarparput, taakkunanngalu oqartitsiniaalluta, taamaattunilli oqartoqarpallaanngilaq. 

Taamaallaat Trump Jr-p ataatami malinnaanera oqaatigaa, inuulluaqqussutaalu apuullugu. 

Taavalu ingerlaaqatigiit tassa ammut aallaannaqaat.

Naqqanullu apuunnermi oqaluffiup saavani angalanerup qanoq politikimut attuumassuteqartiginera erseqqisseqqippoq. Tamanna angutip qattunermiittumik ataaniit malinnaasimasup Trump Jr-p qanoq Hans Egedemik isumaqarneranik aperinerani pivoq.

Trump Jr. Toqqaannartumik akinngilaq, immaqa apeqqut tusaarpiannginnamiuk. Kalaallilli Nunaanni nutaanik ikinngutiminik naapitsisimanini eqqortumik paasivaa. Maannalu taakku immikkuullarissunik tunissutisisussanngorput. 

Ikiortaasa ilaat karsimik natsanik aappalaartunik ilisimaneqarluartunik Make America Great Again-inik ikinngutinut agguaavoq, natsallumi atineqapallapput. 

Trump Jr-p eqimattat assilerusunneqarnerat erngertumik maluginialertorpaa. 

– Utaqqilaaritsi, assimi peqataasariaqavippunga, taanna oqarpoq, assiliseqatigiillu qeqqannut imminut inissilluni. Ingerlaqqinnitsinni angutit assiliseqataasut Trumpimik nuannarinnittuiunersut nuannariinnarluguluunniit taamaaliornersut aperivagut. 

– Nuannarinnittuuvugut, ilaat Trump Jr-mik illoqarfimmi malinnaaniarluni biilinut isinnginnermini akivoq. Amerlasuullumi aamma malinnipput. Nalunaaquttallu akunnerata qaangiunnerani Trump Jr-ip qattunermit Hans Egede pillugu ilanngutaa Instagramimi 25.000-nik likerneqarpoq.

donald trump jr. nuuk hans egede inuiaqatigiit samfund

ATORFIIT Se alle jobs

Powered by Labrador CMS