Inatsisartunut ilaasortaq Kuno Fencker, Naleraq, Facebookimi
politikeritut quppernermi nunaqarfiit ineriartortinneqarnissaat pillugu,
nunaqarfimmiunik oqaloqatissarsiorluni 6. februar allappoq.
Siunissamilu
Kalaallit Nunaat USA-lu qaninnerusumik suleqatigiilissappata, nunaqarfiit
ineriartortinneqarnerannut amerikamiut aningaasaliisinnaalernissaat periarfissaalersinnaasoq
pillugu oqaloqateqarnermi ilaani oqarsimanerarneqarpoq.
Inatsisartunut ilaasortaq Kuno Fencker, Naleraq, Facebookimi
politikeritut quppernermi nunaqarfiit ineriartortinneqarnissaat pillugu,
nunaqarfimmiunik oqaloqatissarsiorluni 6. februar allappoq.
Siunissamilu
Kalaallit Nunaat USA-lu qaninnerusumik suleqatigiilissappata, nunaqarfiit
ineriartortinneqarnerannut amerikamiut aningaasaliisinnaalernissaat periarfissaalersinnaasoq
pillugu oqaloqateqarnermi ilaani oqarsimanerarneqarpoq.
Tamannali
ilumuunngitsoq, pasilliutigineqartullu inuttut malersuinermik siunertaqartut,
taanna oqarpoq.
Nunaqarfimmiunut saaffiginnittoq
Nunaqarfiit ineriartortinneqassappata suut
pisariaqartinneqarnersut pillugu Kuno Fencker annertunerusumik
paasisaqarumalluni, februari aallartisimalaartoq Facebookkikkut
nunaqarfimmiunik oqaloqatissarsiorpoq.
- Nunaqarfimmiut amerlasuut angerlarsimaffinni
atugassaminnik imertakatapput, aqqusernit
illullu sanaartorneqarnissaat pisariaqarpoq aamma nunaqarfinnut angallannikkut
pitsanngorsaasoqartariaqarpoq, taakkulu nunaqarfinni ajornartorsiutit
amerlaqisut ilagiinnarpaat.
- Nunaqarfinni innuttaasut taamatut
atugassaqartinneqarsinnaanngillat, taakkulu periarfissaat maannakkorniit
pitsaanerujussuusariaqarput, taanna oqarpoq.
Nunaqarfinni innuttaasut peqatigalugiit nunaqarfiiit
ineriartortinneqarnissaat pillugu 2050-ip tungaanut pilersaarummik suliaqartoqartariaqartoq,
Kuno Fencker aamma isumaqarpoq.
Nunaqarfinnut aningaasaliineq
Kalaallit Nunaat naalagaaffinngorpat nammineerlunilu
aningaaserivittaarpat, nunatsinni pisuusssutit uumaatsut, assersuutigalugu
guldi, qularnaveeqqutitut atorlugu ilaatigut Verdensbanken-imut, Den
Internationale Valutafond-imut, Den Nordiske Investeringsbank-mut
assigisaannullu aningaasanik attartornissamut periarfissat atorlugit,
illoqarfinni nunaqarfinnilu ineriartortitsinermut aningaasaliisoqarsinnaasoq,
Kuno Fencker isumaqarpoq.
- Taamaattumik nunatta naalagaaffittut
ingerlanissaa akissaqartissagutsigu, aatsitassarsiorfiit nunatsinni
ingerlassinnaasagut aalluttariaqarpagut, taanna oqarpoq.
Isornartorsiorneqartoq
Siunissami Kalaallit Nunaata USA suleqatigilissappagu,
nunaqarfiit ineriartortinneqarnerannut atatillugu anigaasartuutit ilaasa
amerikamiunit matussuserneqartalernissaat periarfissanut ilaalersinnaasoq
pillugu Kuno Fencker oqarsimasoq, avannaani nunaqarfiit ilaanni innuttaasoq kinaassutsiminik
isertuussisoq, Kuno Fenckerillu oqarasuaatikkut oqaloqatigisimasaa oqarpoq.
- Nunaqarfitsinni pisariaqartinneqartut
assigiinngitsut pillugit paasisaqarusummat paasissutissanik tuniorarpara.
- Taavalu USA-mut atalissagutta nunaqarfitsinni
amigaatigut amerikarmiut akiligaannik pigilersinnaagigut Kuno Fencker
oqaluppoq, tamannalu soorunami tupaallaatigaara, kinaassutsiminik isertuussisoq
Siumumullu ilaasortaasoq, Sermitsiamut taama oqarpoq.
Sermitsiamut oqaaseqartup kinaassusaa aaqqissuisoqarfimmiit ilisimaneqarpoq.
Kommune Qeqertalimmi Siumup immikkoortortaa uani pineqartoq
pillugu Sermitsiamut saaffiginnissuteqarpoq, tamannalu Kuno Fenckerip inuttut
malersorneqarnissaanik siunertaqanngitsoq, Kommune Qeqertalimmi Siumup
immikkoortortaani siulittaasoq aamma nuna tamakkerlugu Siumup
siulersuisuunerini ilaasortaq, kommunalbestyrelsimullu ilaasortaq, Frantz
Lundblad oqarpoq.
Taamaattoqanngilluinnartoq
Taamatut oqarneq Siumup tungaaniit inuttut malersuinertut
isigiineqartariaqartoq, Kuno Fencker isumaqarpoq.
- Ataasiarlungaluunniit taamatut
oqaaseqarnikuunngisaannarpunga, taamatullu oqarneq uannut inuttut
isigineqarninnut ajortisaarinissamik siunertaqarpoq.
- Siumumiit Naleqqamut nuunnikuugama
seqqutserniarsaralunga pivaannga, taamatullu pissusilersortoqarnera
tupaallannarpoq.
- Nunaqarfiilli aningaasalersorneqarsinnaanerannut
periarfissat assigiinngitsut siuliani taakkartukkakka, imaassinnaavoq uani paatsoorneqarsimasut,
Kuno Fencker oqarpoq.
Nunaqarfinni pissutsit pillugit inuit 40-missaat Kuno
Fenckerimut saaffiginnissimasut, taakkunanngalu arlallit oqaloqatigisimagini, taanna
oqarpoq.
