Kalaallit Nunaanni politikerit sunniuteqarnerpaat pissaaneqarnerpaallu ilaat Lars Emil Johansen, taamani 71-inik ukioqarluni, Inatsisartuni siulittaasutut 2018-imi marsip 13-ianni kingullermik sianerpoq.
- Soorunami killitsisimanarpoq. Inersimasuunerami tamaat atuuffigaara. 24-nik ukioqarlunga aallartippunga, maannalu 71-inik ukioqarlunga, KNR-imut oqarpoq.
Kalaallit Nunaanni politikerit sunniuteqarnerpaat pissaaneqarnerpaallu ilaat Lars Emil Johansen, taamani 71-inik ukioqarluni, Inatsisartuni siulittaasutut 2018-imi marsip 13-ianni kingullermik sianerpoq.
- Soorunami killitsisimanarpoq. Inersimasuunerami tamaat atuuffigaara. 24-nik ukioqarlunga aallartippunga, maannalu 71-inik ukioqarlunga, KNR-imut oqarpoq.
Politikkikkut misilittagartooq, ilaatigut Jonathan Motzfeldtimik Moses Olsenimillu maanna toqukkut qimagussimasunik Siumumik pilersitseqataasoq, ukiuni amerlasuuni nunatsinni politikkikkut qaffasissumik inissisimasimavoq. 1971-imi 24-nnarnik ukioqarluni Landsrådinut qinigaavoq.
Politikkikkut nuimasoq, arnaata ernisussiortuuffigisimasaani Uummannap eqqaani Illorsuarneersoq, ukiuni 50-ingajanni politikkimik suliaqareerluni tunuarpoq.
Eqqartuussinerit qulingiluanut aallartissasut
Ataasinngornermi ullunilu marlunni tulliuttuni Eqqartuussisuuneqarfik Sermersuumi Jens Kreutzmannip Aqqutaani 1-imi 1. sal-imi, Lars-Emil Johansenimut Kommuneqarfik Sermersuumilu pisortaanerusimasumut Lars Møller-Sørensenimut suliami unnerluussisut illersuisullu aalajangiisuusumik unammissapput. Eqqartuussinerit ullut tamaasa nal. qulingiluanut aallartittassapput.
Taakku marluk peqquserluttutut unnerluutigineqartut Sermitsiap pingasunngornermi allaaserai. Unnerluussut naapertorlugu Lars Emil-Johansen ukiuni marlunni siunnersortitut Kommuneqarfik Sermersuumit 730.000 koruuninik pissarsisimavoq. Naak sulianik naammassimananigooq. Taakkununnga marlunnut unnerluussummi atuarneqarsinnaavoq.
Sermitsiamili allaaserisami “Lars-Emil kommunimut aningaasarsiutigilluakkaminik isumaqatigiissuteqarsimasoq”-mik qulequtalimmi marsip sisamaani 2022-mi saqqummertumi Lars-Emil Johansenip aamma Lars Møller Sørensenip immikkut ittumik siunnersortitut isumaqatigiissutaat pillugu allaaserineqartumi Lars Møller-Sørensenimut sullissisimalluni politikeriusimasoq nuimasoq oqarpoq.
Tasiilami Kofoeds Skolemi
Lars-Emil Johansen nassuiaavoq ilaatigut Tasiilami Kofoeds Skolep immikkoortortaqarfianik pilersitsinermut suleqataasimalluni.
– Gujo Thorsteinsson (Nuummi Kofoeds Skolep pisortaa, aaqq.) Tasiilamut angalaqatigisimavara. Tassani kommunip sinniisuinik telemillu ataatsimeeqateqarpunga atuarfimmut ininik pissarsiniarneq siunertaralugu.
- Aamma Danmarkimut angalasimavunga ilaatigullu Københavnimi Kofoeds Skole pulaarsimallugu aqutsisut ataatsimeeqatigiartorlugit inunnillu aningaasaateqarfinnut qinnuteqarnermik immikkut ilisimasalinnik oqaloqateqarsimallunga, Kofoeds Skolit aningaasaateqarfiit tapiissutaannik aningaasalersugaammata, Lars-Emil Johansen allaaserisami nassuiaavoq.
Allaaserisami tassani Kommuneqarfik Sermersuumi pisortaanerup tullia Marie Fleischer ima oqarpoq:
– Imaanngilaq Lars-Emil Johansenip piginnaaneri nalornissutigigikka, kisianni Lars Møller-Sørensenip sumut atorsimaneraa naluara.
Lars-Emilimut isumaqatigiissut taamaatinneqartoq
Lars-Emil Johansenip kommunaldirektøriusimasullu Lars Møller-Sørensenip 2019-imi oktobarip 22-ani isumaqatigiissutigisimasaat 2021-mi juunip 29-ani kommuni sinnerlugu taamaatippaa.
- Kommuneqarfik Sermersuup piffissami isumaqatigiissuteqarfiusumi suliannut qujaffigaatit.
Marie Fleischerip Lars-Emil Johansenip isumaqatigiissuteqarfigiunnaarnerani allataa Sermitsiap 2022-p aallartinnerani pissarsiaani allassimavoq.
Tamatuma kingorna Kommuneqarfik Sermersuup Lars-Møller Sørensen maajip 18-ani 2022-mi Kalaallit Nunaanni Politiinut tunniuppaa. Kommunip Sermitsiaq ullualuit qaangiuttut paasitippaa.
Suli oqaaseqarnianngikkallartoq
Lars Møller-Sørensen unnerluutigineqarmat Lars-Emil Johansen suliamut akuliutinneqarpoq. Kalaallit Nunaanni Politiit suliaq Københavns Vesttegns Politiinut, misissuisussatut toqqarneqartunut, tunniunniarlugu aalajangerput.
Lars-Emil Johansen unnerluussut qanoq isumaqarfigineraa aperigatsinni sms-ikkut ima akivoq:
- Eqqartuussineq aallartitsinnagu suliaq oqaaseqarfigissanagu aalajangerpunga. Tusagassiortut eqqartuussineq malinnaaffigisinnaassagaat naatsorsuutigaara, tassanilu illuatungeriit oqaaseqaataat tusagassiuutitigut saqqummiunneqarsinnaassallutik. Ilimanarpoq eqqartuussinerup ingerlanerani aamma oqaaseqarumaartunga imaluunniit illersuisora taamaalioqqullunga, Lars-Emil Johansen Sermitsiamut sms-ikkut allappoq.
Lars-Emil Johansenip Ulrik Blidorf illersuisoraa.
Lars Møller-Sørensenip unnerluutigineqarnini oqaaseqarfigerusunnagu Sermitsiamut oqaatigaa.
