Lastbiilit pisuullutik biilit arlallit aportut
Tallimanngormat ullaap tungaani Nuummi biilertut arlallit ajutoorput.
Assiliisoq: Leiff Josefsen
Tallimanngormat ullaap tungaani nal. 09.31 Nuummi Nuussuarmi aqqusinermi angallannermi ajutoortoqarneranik Kalaallit Nunaanni Politiit nalunaarfigineqarput.
Ajutoornermi biilinik arlalinnik ajutoortoqartoq, lastbiilillu pisuullutik biilit arlallit aporsimasut, pigaartut pisortaat Jeppe Andsager Sermitsiamut oqaluttuarpoq.
Lastbiilit teknikkikkut ajoquteqarnerat pissutigalugu biilinut aporsimasut, taakkulu biilit nermallammi naluttarfiup Maliup eqqaani ingerlaqqinnissamut utaqqisunut biilinut allanut ajatsissimasut, politiit ajutoorneq pillugu naliliipput.
Inuk ataaseq ajoqusersimanersoq misissorniarlugu nakorsiartarfiliaanneqartoq, pigaartut pisortaat oqaluttuarpoq.
Ajutoornermut pissutaasoq misissoqqissaarneqartariaqartoq taanna naqissusiivoq.
