EU-PARLAMENTSVALG
Leyen: Talerperliunerpaat EU piuneerutitinniarsaraat
EU-mi qinersinissamut naggataasersornermi kommissionsformandip mianersoqqussivoq, aatsaat taamak annnertutigisumik ingasattajaarnianit EU unammillerneqarnerarlugu.
EU-Kommissionip siulittaasua, Ursula von der Leyen, Münchennimi qinersinermi oqalugiarnermini Europami talerperliuniat akerlilerpai aamma neriorsuivoq akiorniassallugit.
Assiliisoq: Lukas Barth/Reuters
Europa-Parlamentimut qinersineq aqagu pisussaq sioqqullugu, EU-Kommissionip siulittaasuata aarlerisaarutigaa, partiit talerperlerpaat EU-mik atorunnaarsitsinissaq siunertaralugu suleqatigiinneq sequminniarsarigaat.
Münchenimi oqalugiarnermini Ursula von der Leyen oqarpoq, aatsaat taamak sakkortutigsumik Europa "populistinit (nuannareqqqusaartut), ekstremistinit (ingasattajaarniat) demagoginillu (paatsiveerusaaniat) unammillerneqartoq".
Europa-Parlamentimut qinersinermut paasissutissat
Europa-Parlamentimut ilaasortanik qinersineq ukiut tallimakkaarlugit maajimi imaluunniit juunimi nunani EU-p ilaasortaqarfiini ingerlanneqartarpoq.
Europa-Parlamentimut tulliani qinersineq Danmarkimi ingerlanneqassaaq sapaat 9. juuni 2024, tassani tamakkiisumik ilaasortassat akornanni 720-uisuni Danmark sinnerlugu ilaasortassat 15-it qinerneqassapput.
Paasissutissat: Danskit nunami namminermi ministeriaqarfiat
Ursula von der Leyen EU-qinersereernerup kingorna, EU-Kommissionip siulittaasuattut ingerlaqqinnissaminik siunertaqarluni taanna sassaqqippoq.
- Ullumikkut Europap aaqqissuussaanera tunissutisiaavoq annertooq, taanna oqalugiaammini tallimanngornermi unnukkut oqarpoq, tyskit konservativiusut partiivisa CDU aamma CSU qineqqusaarneranni. Von der Leyen nammineq CDU-meersuuvoq.
Europami politikkikkut talerperliuniarnerpaat, ataatsimoorluni iluaqutissioqatigiissimanermik navianartorsiortitsisinnaanerat takuneqarsinnaavoq, taanna tikkuaavoq. Mianersoqqusinermini pisai tassaapput tyskit Alternativ für Deutschland (AfD), Marine Le Pens franskinit National Samling (RN) allallu talerperliit partiiusut.
- Taakku ingasattajaarniat ataatsimooruteqarput: Europa ineriartortitarput akerlilersorpaat, kissaatigivaat sequmiinissartik suleqatigiinnerullu aserorneqarnissaa, taanna oqarpoq aamma neriorsuivoq, nammineq "qaquguluunniit tamanna iluatsinneqassanngitsoq". Tamanna nutaarsiassaqartitsivinnit dpa-mit aamma AFP-mit allaaserineqarpoq.
Qinersisartunik isumasiuisarnerit naapertorlugit Europami nunat EU-mi ilaasortat akornanni arlallit talerperlermut saanneq annertussangatinneqarput, sapaammi unnukkut qinersinerup kingorna inerneri kisinneqalerpata tamanna paasinarsisussaavoq.
Von der Leyenip kommissionsformanditut piffissani atuuffimmini annertuunik ajornartorsiuteqartarsimavoq. Tamatumani ilaapputtaaq Tuluit Nunaata EU-mit aninera, coronavirusip nalaani ajornartorsiutit aamma Ruslandip Ukrainemi saassussinera.
Kisianni taassuma qinigaaffimmi nutaami siulittaasutut ingerlaqqissinnaanissaa ajornakusoorsinnaavoq. Tassami amerlanerussuteqartut tapersersortiginissaat pisariaqartippaa, qinersinerup kingorna Europaparlamentinngortup siulittaasussamik qinersinerani.
Münchenimi oqalugiarnermini oqarpoq, kissaatigigini peqatigiilluni siammasissumik tunngavilimmik tapersersorneqarnissani, taakkulu inatsisitigut ataatsimoornerat inerisarneqassasoq, Ukrainemut tapersersuineq ingerlaqqissasoq aammali Europap nukittorsarnissaanik tapersersuisumik annertuumik suleqateqarnissamik kissaateqarluni.
