Løkkep aallartitaq Kalaallit Nunaanni kilitsissiaqarsinnaanera pillugu ataatsimeeqatiserigaa

Nunanut allanut ministerip Lars Løkke Rasmussenip (M) USA-p aallartitaa Kalaallit Nunaanni kilitsissiaqarsinnaanera pillugu nunanut allanut ministeriaqarfimmi oqaloqatiginiarlugu qaaqquniarpaa.

Løkke Warszawami nunanut allanut ministerit pingasunngornermi ataatsimiinnissaannukalerluni oqarpoq.

USA Kalaallit Nunaanni kilitsissiaqarnerulernialersaartoq amerikamiut aviisianni Wall Street Journal-imi pingasunngornermi allaaserineqareersoq taama oqarpoq.

Aviisi Wall Street Journal naapertorlugu paasissutissat taakku pisumut ilisimasallit marluk oqaasiinit aallaaveqarput.

- Ikinngutigiit akornanni kilitsissiaqartoqartanngimmat tamanna ernumassutigeqaara.

- Aviisimi allaaserisaq ilumoornersoq naluara, taamatulli oqaaseqartut akerlilerneqarpasinnginnerat ernumassutigaara, Lars Løkke Rasmussen oqarpoq.

Taamaattumik suliaq maanna atorfilittat aqqutigalugit qisuariarfigineqarniarpoq. Paasissutissat ilumoornersut paasiniarlugit Amerikamiut aallartitaat Danmarkimit qaaqquneqarpoq, Amerikamiullu paasitinniarlugit Danmarkip nuna qanimut suleqatigisani kilitsissiaqarfiunissaa akueriuminaatsinneqartoq.

- Paasissutissat tamakku ernumanartut ilumoornersut paasiniarlugit USA-p aallartitarigallagaa aggersassavarput. Qanorlu isumaqarnerput anngunniarlugu.

- Ernumanartorujussuuvoq isumaqartoqarpat Danmarkimi Kalaallillu Nunaanni paasissutissanik maannakkut pissarsisoqassasoq.

- Taamatut suleqatigiinnissaq pissusissamisuunngilaq, taamaattumik tamanna ilungersunartutut isigaara, Lars Løkke Rasmussen oqarpoq.

USA-p aallartitaqarfiata pisoq Ritzauimut pingasunngornermi oqaaseqarfigiumanngilaa.

Namminiilivinnissamik suliniuteqartut pillugit paasisaqarnerunissaq amerikamiullu pisuussutinik piiaasinnaanerannik qanoq isumaqarfigineqarnersut Amerikamiut Kalaallit Nunaannut kilitsissiaqarusunnerannik tuungaveqartoq Wall Street Journal allappoq.