Google-ad
Format:
2018-Artikelbanner-KL
Ilisimatusarfimmi ph.d.-inngorniartoq Manumina Lund Jensen issittup amarui pillugit ilisimatuusaamminik allaaserisamik saqqummersitsivoq. Inuit, qimmit amaqqullu ukiut 4.000-it ingerlaneranni naapitarnerat pillugu misissuinermi paasisani pillugit allaaserisaqarpoq. Taannalu paasiniaaffigaarput.
Qanoq ilillutit sammisaq taanna soqutigilersimaviuk?
- Meeraaninniit aallartippoq. Avanersuarmi eqqaanilu piniartut akornanni peroriartorpunga. Taakku oqaluttuarisartagaat, ilaatigut amaqqunik naapitsisimanilikkersaartarnerat, tusarnaartarnikuullugit, Manumina Lund Jensen oqaluttuarpoq.
Taassuma qimmit amaqqullugu pillugit meeqqat atuarfianni 4. klassimi atuartuulluni danskisut allaaserisani suli paaraa. Sammisaq inersimasunngoreerluni maanna ilisimatusaatigaa, Kalaallillu Nunaanni sumiiffinni assigiinngitsunit misissuisarluni.
- Oqaluttuarineqartut naapertorlugit amaqqut qimminut qimuttunut assut qaasuttarsimapput, ilaannilu toqoriarlugit nerisarsimallugit. Taamaattoqartarnerata aamma inuit, qimmit amaqqullu akornanni attaveqaqatigiinneq sunnersimavaa, Manumina Lund Jensen oqarpoq.
Amaqqut immikkut ittumik ajornartorsiutaasumik oqaluttuani oqaluttuatoqqanilu inissisimaffeqarsimasut taanna itisiliivoq.
- Ilaatigut oqaluttuani amaqqut anersaarsiornermut attuumassuteqartarsimapput. Tassani amaroq immikkut ittumik uumassusilittut isigisarsimavaat, ilaatigut uumasutut inuttullu isikkoqalersarsimaneragaalluni. Amaqqup inuk eqqortumik iliorsimanngippat tarnera tigusinnaasarpaa. Oqaluttuat ilaanni angut amaqqup piaraannik toqoraasimavoq, amaqqullu akiniaalluni taassuma tarnera tigusivaa.
Kigutaa
Manumina Lund Jensen issittup amaruinik ilisimatusaatigalugu misissuinermini assigiinngitsorpassuarnik paasissutissanik katersivoq, ilaatigut atuakkat, oqaluttuat, apersuinerit 43-it, aammalu attakusiuut nassaavi pillugit paasissutissat ilanngussimallugit.
Suliarisanni immikkuullarissumik tupigusuutigisannik naammattoorsivit? 123
- Aap, tupigusuutigisama ilaat tassaavoq nunatta kitaani amaqqut pillugit oqaluttuarineqartartut. Taakku ersersippaat amaqqut tassani najugaqarsimasut, inunnullu sunniuteqartarsimallutik.
- Amaroq Saqqaq-kulturimut, tassa ukiut 4.000-it matuma siorna, piusimanera aamma soqutiginarpoq, Manumina Lund Jensen ilanngullugu oqarpoq.
- Kapisillit qanittuani Itinnerata nalaani amaqqup kigutaanik nassaartoqarnikuummat tamanna nalunngilarput. Qallunaatsiaat nunatsinniinnerminni amaqqut aamma assut soqutigisimagaat takussutissaqarpoq, ilisimatusartoq oqaluttuarpoq.
- Qallunaatsiaat uumasuutitik amaqqunut illersorniartarsimavaat. Pullatit taamanernisat, teriannianut angivallaartut nannunullu mikivallaartut nassaarineqarnikuuneranit tamanna takusinnaavarput,. Taamaattumik amaqqunut pullataasimassasut ilimagineqarput.
Amaroq qimuttussatut pitunneqartoq
Amaqqut qimussinut qimuttussatut pitullugit aamma misilinneqarnikuusimasut, Manumina Lund Jensen oqaluttuarpoq:
- Piniartoq amaqqup piaraanik uumasuuteqalersimasoq qimmiminullu qimuttunut akuliullugu qimuttussatut misiliutigisimagaa uumasorsiooq Christian Vibe 1948-imi allappoq. Tamanna iluatsinngilaq, amaqqummi qimuttussatut pitunneqarsinnaanngillat, ullullu ilaanni amaroq taanna toqusimavoq. Kisianni qimmimik amaqqunillu akuleriisitsiniarnermi piaqqiortitassatut atorneqartarsimapput.
Amaroq Kalaallit Nunaanni sumiiffinni assigiinngitsuni takussaajuaannarsimasoq Manumina Lund Jensensip misissuinermini paasivaa. Peroriartorfigisaanili Avanersuarmi suli takussaalluni, Manuminap nammineq peroriartorfiani.
- Sumiiffimmi tassani amaqqut qimminut inunnullu maanna qanillattortarpoq, piniartullu takusinnaavaat, amaqqut umimmaat amerlassusaannut sunniuteqarput. Inunnullu qanilliallaqqissimammat, amaqqunik toqutsisinnaanissamut pisinnaatitsinertalimmik 2020-mi malittarisassat nutaat atuutilersinneqarput, taanna oqarpoq.
Taamaattumik issittumi amaqqup qimminut inunnullu attaveqartarnera pillugu misissuineq suli naammassineqanngilaq.
Uumasut akornanni assigiinngisitaarneq inuillu toqqissisimanissaat anguniarlugu Issittumi uumasut nujuartat pillugit aqutsinissaq pisariaqartoq Manumina Lund Jensensip allaaserisaani tikkuarneqarpoq.
