Manuminap angajoqqaavi: Akisussaaffimmik tigusisoqartariaqarpoq

AAMMA ATUARUK

6-årig pige døde efter operation – Sundhedsvæsenets Disciplinærnævn kritiserer sundhedspersonale for fejl

- Ilumoortuusinnaanngilaq taama annertutingisumik annaasaqarnitsinni akisussaaffimmik tigusiumanngitsigisoqarnera. Meeqqamik annaasaqarpugut, arlaannaataluunniit tamanna akisussaaffigiumanngilaa. Angajoqqaat kikkulluunniit taama peqqinnissaqarfimmi kukkusoqarneratigut annaasaqaqqunanngikkaluarput.

Manumina Olsenip arfinilinnik ukioqarluni toqqusaamigut neqaajartereernermi kingorna toqusup, ataataa taama oqarpoq.

Manumina Olsenip toqunera juunip pingajuani 2023-mi nalunaarsorneqarpoq, tassa aammik annaasaqarujussuarnerup kinguneranik uummamminik unittoorami. Pisumi ilaqutaasut pinartoqartillugu nakorsiartarfimmut siarngussigaluarneri ilaatigut naammaginartumik kinguneqanngillat.

Suliaq peqqinnissaqarfiup maalaarutinik aalajangiisartunit naliliiffigineqarsimavoq, tamatumanilu peqqinnissaqarfiup angajoqqaajusunut attaveqarnera nalunaarsuineralu aalajangiisartunit misissuisoqarsimavoq.

Peqqinnissaqarfiup maalaarutinik aalajangiisartunit aalajangiinerminni Dronning Ingridip Napparsimmavissuani sulisut marluk uparuarpaat. Tassani nalunaarsuiffimmi pisariaqanngitsunik nalunaarsuisimaneq, napparsimasup nalunaarsuiffianut naammaginanngitsumik nalunaarsuisimaneq, Manumina Olsenillu ilaatigut naammaginanngitsumik passunneqarsimanera pillugu sulisut marluk isornartorsiorneqarlutik.

Suliaq sivitsuuttumik suliarineqartoq

Ilaqutariit isornartorsiorpaat meeqqap 2023-mi aasakkut toqunerata kingorna suliamut tunngatillugu sullissinerup kigaannera, taamatullu paasissutissanik pissarsiniarnerup arriippallaarnera.

Suliami naammagittaalliuutit, maalaaruteqartarfimmi aalajangiisartut suliaa kiisalu politiinut suliakkiunneqartut ingerlanneqarsimapput. Manumina Olsenip angajoqqaavi naapertorlugit, peqqinnissaqarfimmi maalaarutinut aalajangiisartut suliaq naammassimmassuk, politiit suliamik misissuinertik taamaatissimavaat. 

- Sulisut isornartorsiuinerisa kingorna suliap matuneqarnera naammanngilaq. Qitornatta annaanerata kingorna sumulluunniit saaffiginnikkaangatta matoqqasumik pineqarpugut suliallu qanoq ingerlasimanera pillugu paasissutissanik piniartarnerput ilungersunarluinnarsimavoq. Panitta taama alianartigisumik annaanerata kingorna suliap naammassinissaa suli amigaatigisutut ipparput, Frederik Olsen oqaluttuarpoq.

Aliasunneq naassaanngitsoq 

Manumina Olsenip angajoqqaavi, Frederik Olsenip aamma Justine Eipe suliaq politiinut suliassanngortissimavaat sulinerup nalaani pisussaaffimmik sumiginnaasimasutut sulisut nalunaarutigisimallugit. Peqqinnissaqarfimmili maalaarutinik aalajangiisartut aalajangereernerisa kingorna suliaq politiinit matuneqarsimavoq.

- Isumaqarpunga suliap politiinit matuneqarneranut tunngavigineqartoq suunngippallaartoq. Peqqinnissaqarfimmi suliaq eqqortumik suliarineqarsimanngitsoq uppernarsaatissaqarpoq. Pisariaqartutuaq tassaavoq aalajangiisoqarnissaa meeqqamillu annaasaqarnitsinnut akisussaatitsisoqarnissaa, Frederik Olsen oqarpoq.

- Kinaluunniit qitornaminik annaasaqartussaanngikkaluarpoq. Aliasunneq nassuiaruminaapporluunniit. Angajoqqaat kukkusoqarsinnaanera annilaangaginagu nakorsiussisinnaasariaqarput meeqqaminnillu suliaritittussanik nakorsamut tunniussisinnaasariaqarput. Taamaattumik isumaqarpunga kukkunermut taama annertutingisumut akisussaaffimmik tigusinissaq naleqquttoq, ilami panipput takoqqittussaajunnaarparput, Manuminap arnaa Justine Eipe oqarpoq.

Politi: Suliaq unitsipparput

Kalaallit Nunaata Politiivi Sermitsiamut nassuiaapput suliaq maalaarutinut aalajangiisartunit aalajangiiffigineqareersorlu, taamatullu peqqinnissaqarfimmi sulisut suliamik ilaannut isornartorsiorneqareersullu, suliaq unitsissimallugu:

- Ilisimatitsissutigisinnaavara suliaq maalaaruteqartarfimmi aalajangiisartunit aamma suliarineqarsimasoq, peqqinnissaqarfimmilu sulisunut aalajangersimasunut tunngasoq politiinit unnerluutiginnittartunillu unitsinneqarsimasoq. Tamatumunnga pissutaavoq suliami inuit pineqartut pinerluuteqarsimanermut inatsimmi §55 unioqqutissimasinnaanerannut paasiniaanitsinni paasigatsigu tunngavissaqanngitsoq, taamatuttaaq pinerluuteqarsimanernut allanut tunngatillugu akisussaatitsisinnaanata paasisimallugu, politidirektør Bjørn Tegner Bay oqarpoq.

Politiit ilisimatitsipput Kalaallit Nunaata Politiivisa suliamik unitsitsissallutik aalajangernerat Naalagaaffiup eqqartuussisuinut naammagittaalliuutigineqarsimasoq, taakkuli politiit aalajangernerannut isumaqataasut.