Disko Linep ilaasartaat marloqiusamik ingerlatilik Maliina Ittuk, poorski sioqqullugu tuninialerpaa.
Ilaasartaat angisooq 113-inik ilaasoqarsinnaasoq maannakkut Qaqortup Narsarsuullu akornanni angalasarpoq, Qaqortumili mittarfik nutaaq apriilip 16-ianni ammarneqarpat, Narsarsuarlu taamaallaat qulimiguulinnut mittarfinngorpat, angallassinera unitsinneqassalluni.
Disko Linep ilaasartaat marloqiusamik ingerlatilik Maliina Ittuk, poorski sioqqullugu tuninialerpaa.
Ilaasartaat angisooq 113-inik ilaasoqarsinnaasoq maannakkut Qaqortup Narsarsuullu akornanni angalasarpoq, Qaqortumili mittarfik nutaaq apriilip 16-ianni ammarneqarpat, Narsarsuarlu taamaallaat qulimiguulinnut mittarfinngorpat, angallassinera unitsinneqassalluni.
Disko Linep Maliina Ittuup Ilulissanut Qeqertarsuullu Tunuanut nuunneqarnissaa siullermik pilersaarutigigaluarpaa, tassa Ilulissat Qeqertarsuullu akornanni angallassilersussatut. Ilulissanili aalajangersimasumik talittarfeqalernissaa anguneqarsinnaanngimmat, pilersaarut tamanna februaarimi taamaatiinnarneqarpoq.
104 millionit koruuninik akilerlugu tuniniarneqartoq
Maliina Ittuk umiarsuarnik niuerfimmit Atlantic Shippingimit Københavnimeersumit tuniniarneqarpoq. Suliffeqarfiup taassuma nittartagaani tuniniarneqartoq 104 millionit koruuninik akeqartoq oqaatigineqarpoq.
Maliina Ittuk Qaqortumut siorna oktobarimi tikimmat.
Assi: Hans-Peter N. Bay - Alluitsup Bay
- Tuniniaaneq aatsaat aallartinneqaqqammerpoq, Atlantic Shippingilli Kalaallit umiarsuaatileqatigiiffii allat Maliina Ittummik soqutiginninnersut misissoqqaarniarpaa, Mogens Fynbo Atlantic Shippingimi qullersap tullia oqarpoq.
- Nunarsuaq tamakkerlugu pisisartutsinnut aalajangersimasunut tuniniaaneq pillugu nalunaaruteqareerpugut, kisiannili taakkunani pisisoqarnissaa ilimanaateqanngilaq. Tassami ilaasartaat kilisaatinit assartuutinillu nalinginnaasumik tuniniartakkatsinnit allaanerulluinnarpoq, taamaattumik tuniniaaniarluta immikkut iliuuseqartariaqassaagut.
- Ilaasartaat angallassiunnaarsinneqarpat Nuummut aqqusaarunneqarsinnaassasoq neriuppunga. Maliina Ittuk illersornissamut oqartussanut saqqummiunniarparput, immaqa sakkutuunik assartuinermi atorneqarsinnaassammat – immaqalu aamma allanik umiarsuup periarfissaqarneranik takunnittoqarsinnaassalluni.
- Maliina Ittuup Kalaallit Nunaanniikkunnaarnissaa ajuusaarnartuussasoq aamma isumaqarpunga. Nunatsinni pissutsinut naleqqussarlugu sikumut sakkortusarneqarsimavoq, taamaattumik Kalaallit Nunaanni periarfissanik misissuinissaq pissusissamisuuginnarpoq. Kisianni soorunami umiarsuup sumiiffinni allani sikulimmi tuninissaanut periarfissaqarpoq – assersuutigalugu Norgemi Østersømilu.
- Qanorluunniit pisoqassagaluarpat Nuuk Maliina Ittuup tuniniarneranut inissiiffigissallugu pitsaanerussaaq, illoqarfiimmi pingaarnersaat nunanit tamalaanit mittarfik pissutigalugu tikikkuminarnerussammat, Mogens Fynbo oqarpoq.
Aalajangeruminaatsoq
Disko Linemi pisortaaneq Michael Højgaard oqaluttuarpoq, Maliina Ittuup tuniniarneqarnissaanik aalajangernissaq ajornaatsuinnaanngitsoq.- Periarfissat misissorluarpavut, teknikikkut iliuusissatullu periarfissat ilanngullugit, inuttavullu immikkut ittumik iliuuseqarsimapput. Umiarsualivimmili periarfissat qulakkeerneqarsinnaanngippata, isumannaatsuunissaq ingerlatsinermilu akisussaaffik aallaavigalugit iliuuseqartariaqaratta.
Maliina Ittuk Disko Linemut ajornartorsiutaangaatsiarsimavoq. Umiarsuup sananeqarnera ilungersunartoqaqigami, umiarsuarlu marloqiusamik ingerlatilik sananeqarnissaannit aalajangernermiit aatsaat ukiut arfinillit ingerlareersut kiisami Nunatsinnut apuunneqarluni.Umiarsuup sananeqarnera 2019-imi aallartippoq. Tamatuma kingorna coronap tuniluunnera ajutoornerillu arlallit pissutigalugit umiarsuaq aatsaat 2025-mi ukiakkut atorneqalerpoq.
Kinguaattoornerit umiarsuarmillu sanaartorneq akisusimapput. Topas Explorer Groupillu ukiumoortumik naatsorsuutaani 2025-moortumi ilaasartaat sanaartornermi pigisatut suliarineqartut’-ni katillugit 101.724.911,00 koruuninik nalilerneqarsimavoq.
Maliina Ittuk Disko Linep umiarsuaataasa annersaraat marloqiusamik ingerlasinnaasunngorlugu immikkut sanaaq – tassa dieselimik innaallagissamillu ingerlateqarsinnaasoq. Nunatsinni erngup nukinganik nukissiorfiliortiternerit naammassippata, taamaallaat innaallagissamik ingerlateqalersussatut, tamatumani eqqarsaatigineqarluni.
Batteriinik ingerlateqarsinaanera, 8 knobimik sukkassuseqarluni nalunaaquttap akunnerisa marluk missaannut naammappoq. Maliina Ittuup immikkut nukissaqarluartuunissaa Disko Linep immikkut naatsorsuutigisimavaa.
- Kangerlunnut sikulinnut aamma arfernik takuniaasitsinernut atorneqarsinnaassaaq. Takornariat avatangiisinik mianerinninneruleriartorput, tamannalu ukiuni aggersuni unammillernartunut pingaaruteqartorujussuussalluni, Michael Højgaard Sermitsiamut 2024-mi taama oqarpoq.
Kiffartuussinermut isumaqatigiissut isumaqatiginninniutigineqartoq
Qaqortumi mittarfik ammarlunilu Narsarsuarmi mittarfik matuneqarpat Kujataani ilaasunik angallassineq qanoq aaqqissuunneqarumaarnersoq suli ilisimaneqanngilaq.
”Ineqarnermut, Attaveqaasersuutinut Isorliunerusunullu Naalakkersuisoqarfiup angallassinissami suliassamut kiffartuussinissamik isumaqatigiissutissaq mittarfiup 2026-mi ammarneranit ukiumi ataatsimi atuuttussaq isumaqatigiissutigissallugu Air Greenland A/S peqatigalugu sulissutigaa. Naalakkersuisoqarfik neqeroorummik Air Greenlandimiit pissarseqqammerpoq, aammalu Air Greenland A/S suleqatigalugu isumaqatigiissumi ukiumi ataatsimi atuuttussami pissutsit inaarutaasussat sularileruttorlugit, Isumaginninnermut, Suliffeqarnermut, Ineqarnermut, Attaveqaasersuutinut, Isorliunerusunullu Naalakkersuisoq, Aqqaluaq B. Egede, februaarimi tusagassiutitigut nalunaaruteqarpoq.
Disko Linep piginnittuata Topas Explorer Groupip Kujataani angallatinik attartortitsiniarluni takornariartitsinermigut ingerlatani aammattaaq ingerlatiinnarpaa. Suliffeqarfiup Qaqortumi mittarfik nutaaq ammarpat pissutsit nutaat eqqarsaatigalugit ingerlatsineq pisariillisarniarlugu umiarsuaatileqatigiiffiit marluk, Disko Line aamma Blue Ice Explorer, siorna kattutitippai.
