Meeqqanut tarnimikkut erloqissutilinnut ulloq unnuarlu angerlarsimaffik nutaaq Nuummi sananeqalerpoq
Inatsisartut Aningaasaqarnermut Akileraartarnermullu Ataatsimiititaliaata meeqqat tarnimikkut erloqissutilinnut ulloq unnuarlu angerlarsimaffiup Nuummiittussap sananeqarnissaanut aningaasanik atugassanngortitsinissamut Naalakkersuisut qinnuteqaataat akueraat. Akuersissuteqartoqarneratigut suliarinnittussanut isumaqatigiissutit inaarutaasut atsiorneqarsinnaalissapput suliarlu aallartissinnaalissalluni. Ulloq unnuarlu angerlarsimaffiup nutaap 2026-mi aggustimi piareernissaa naatsorsuutigineqartoq, Ineqarnermut Attaveqaasersuutinullu Naalakkersuisoqarfik nalunaaruteqarpoq.
Foto: Departementet for Boliger og Infrastruktur.
Meeqqat arfineq-pingasuniit 18-it tikillugit ukiullit pisariaqartitsinerup nalaani ulloq unnuarlu angerlarsimaffimmut inissinneqarnissamik, imaluunniit perorsaanikkut tarnikkullu misissorneqarnissamik pisariaqartitsisunut periarfissaqalerpoq.
Ineqarnermut attaveqaasersuutinullu naalakkersuisoqarfik nalunaaruteqarpoq sullinneqartussat pisariusussaasut, tamarmik immikkut assigiinngitsunik tapersersorneqarnissamut katsorsarneqarnissamullu pisariaqartitsisuussallutik.
- Ulloq unnuarlu angerlarsimaffeqarneq artorsarfiuvoq, aammalu meeqqat ulloq unnuarlu angerlarsimaffinnut inissinneqartartut amerliartortut takusinnaavarput. Meeqqanut tarnimikkut erloqissutilinnut ulloq unnuarlu angerlarsimaffiup Nuummiittussap sananeqarneratigut ulloq unnuarlu angerlarsimaffinni pisinnaasat amerlissapput.
- Ulloq unnuarlu angerlarsimaffik ullutsinni avatangiisinut sinaakkutissanut atortunullu, meeqqat inuusuttullu inissitat ulluinnarni toqqissisimanissaannik, isumannaatsuunissaannik perorsaanermillu pingaartitsiffiusunut qitiusussanut assersuutitut sananeqassaaq, Meeqqanut, Inuusuttunut, Ilinniartitaanermut, Kulturimut, Timersornermut Ilageeqarnermullu Naalakkersuisoq Aqqaluaq B. Egede (IA) oqarpoq.
Inissat 20-it
Meeqqanut tarnimikkut erloqissutilinnut angerlarsimaffik Nuummiittussaq ulloq unnuarlu inissitanut 20-nut, immikkoortortanut pingasunut agguagaasunut imaqassaaq, kiisalu allaffissornermut aammalu sammisaqartitsinermut ilinniartitsinermullu immikkoortortaqassalluni. Ulloq unnuarlu angerlarsimaffik Nuussuarmi Mannguani inissinneqassaaq.
- Nuannaarutigaara, Nuummi ulloq unnuarlu angerlarsimaffissap nutaap suliarineqarnissaa maanna aallartissinnaalermat. Suliassaq pisariusoq, avatangiisitigut sinaakkutissanik, meeqqat immikkut pisariaqartitaannut naleqqussakkanik pitsaasunik pilersitsinissamik annertuumik pingaartitsiffiusoq matumani pineqarpoq. Ulloq unnuarlu angerlarsimaffik nutaaq meeqqat toqqissisimasumik peroriartornissaannut iluaqutaassasoq neriuutigaara, Ineqarnermut Attaveqaasersuutinullu Naalakkersuisoq Hans Peter Poulsen oqarpoq.
Illut illunut avatangiisunut naleqqussarneqassapput, taamaalillunilu ulloq unnuarlu angerlarsimaffik inissiaqarfiup ilaatut isikkulerneqassalluni. Tamarmiulluni 1.300 m²-it missaannik annertussuseqassaaq.
Ulloq unnuarlu angerlarsimaffik meeqqat immikkut pisariaqartitaat aallaavigalugit ilusiligaassapput, aammalu sullissivinnik allanik sanaartornissamut assersuutitut sananeqassalluni.
Avatangiisitigut sinaakkusiussani pisinnaasat annertusitinnissaat, meeqqat inuusuttullu inissitat akornanni toqqissisimanerup ineriartornerullu annertusarnissaat, ilaqutariit pinaveersaartitsiffiusumik sullinneqarnerinik nukittorsaanissaq, ikaarsaarfinnut ajornakusoortunut tapersersuinissaq aammalu suliatigut pisinnaasat immikkullu ilisimasassat annertusarnissaat aallaavigineqarput.
