ILISIMATUSARNEQ NUTAAQ
Meeqqat ikippallaat atualinnginnerminni isigisinnaassusaat misissortittarput
Nick Duelundip tallimanngormat ph.d.-nngorniarluni allaatigisani illersorpaa. Nunatsinni meeqqat isigisinnaassusaat misissoqqissaarneqartillugit isaruaarniat peqataatinneqartalernissaat ilisimatusartup kajumissaarutigaa.
Nick Duelundip ph.d.-tut imminut taasinnaalerneranut assersuutaasumik Naalakkersuisut siulittaasuata Múte B. Egedep (IA) uligualerpaa.
Assilisaq pigineqartoq
Allattarfissuarmi allassimasut takusinnaanngikkaanni allatigulluunniit isigiarsukkaanni atuarfimmi angusaqarluarnissaq ajornakusoornerungaartarpoq.
Taamaattumik meeqqat atualertinnagit atuarnerisalu nalaanni isigisinnaasaat misissorneqartariaqarput, assersuutigalugu isaruartaarnikkut katsorsarneqarsinnaaniassammata. Ullumikkulli taamaattoqartuaannanngilaq:
- Meeqqat misissorneqartartut ikippallaarput, ernumanarnerusorlu tassaagunarpoq meeqqat isigiarsuttut paasineqartut tamakkeratik nakorsamit misissorneqartarnerat.
- Peqqinnissaqarfiup aaqqissuunneqarnerani periutsit ilaat pitsanngorsarneqarsinnaagunarput, Nick Duelund oqarpoq, taassumalu Kalaallit Nunaanni meeqqat isigiarsuttarnerat pillugu misissuinermik sammisaqartumik ph.d.-nngorniarluni allaaserisaminik illersueqqammerpoq.
Meeqqat katsorsarneqanngitsut
Nick Duelundip paasisimasani pingaarnerit pingaarutillillu ilaat nassuiaatigaa, tassaasoq isarualerisut namminersortut sulinermut peqqinnissaqarfiup peqataatippagit meeqqat isigisinnaasaannik misissuinerit pitsanngoriarujussuarsinnaasut, isinut nakorsat, Kalaallit Nunaanni aalajangersimasumik suliffeqanngitsut, kisiisa apeqqutaatinnagit.
Isarualerisut nuna tamakkerlugu angalasarnermikkut meeqqat tamaasa misissorsinnaavaat, tassa imaappoq meeqqat isit nakorsaanit misissorneqartariaqartut katsorsarneqartariaqartullu tamaasa misissorsinnaavaat.
- Meeqqat atuarfinniittut ilaat qanimut isiginiarnerminnut katsorsarneqarsimanngitsut misissuinermi paasivarput, Nick Duelund oqarpoq, meeqqallu ilikkagaqarniarnerannut atugarissaarnerannullu isigiarsuttarneq sunniuteqangaarsinnaasoq erseqqissarpaa, taamaattumillu meeqqat ikiortariallit paasinissaat pingaaruteqarnerarlugu.
Aningaasat pissarsiaqaataangaartussat
Peqqinnissaqarfik isarualerisullu suleqatigiittuuppata aningaasartuuteqarneq imminut akilersinnaassasoq, Nick Duelund oqarpoq:
- Taamatut misissueriaatsimik pilersaarusiorniaraanni qanoq akeqassanersoq aamma qanoq iluaqutaatigissanersoq eqqarsaatigiuartariaqarpoq.
- Meeqqat atualertinnagit isarualerisut meeqqerivimmi meeqqanik misissuisassasut siunnersuutigaarput. Nunami tamakkerlugu angalasarput, taamaammat sooq atorluassanngilagut?
Misissuinermi periuseq taanna misilinneqarsimasoq nunamilu isarualerisunik angalaqateqarsimalluni Nick Duelund nangilluni oqarpoq, taakkualu ajornartorsiuteqaratik suliaq naammassivaat.
Ilisimatusartup nalunaarusiaq ph.d.-mik ilinniakkami inernera peqqinnissaqarfimmut Inatsisartullu peqqissutsimut ataatsimiititaliaannut nassiuppaa, meeqqallu amerlanerusut isigisinnaassusaannik misissuititsisoqartalernissaanut allannguisoqartariaqarnersoq aalajangiisartut aalajangissavaat.
