Meeqqat oqaaseqartartuata ajornartooqqaneq massakkorluinnaq nassuerutigeqquaa

Ullumi ulloq tassaavoq nunarsuaq tamakkerlugu imminut toquttarnermik pinaveersaartitsinissamut ullorititaq.

Imminut toquttoqartarnera nunatsinni suli ajornartorsiutaangaatsiarpoq, aamma meeqqat inuusuttullu akornanni. Taamaattumik Meeqqat Oqaaseqartartuat Stina Sværd iliuuseqartoqarnissaanik kaammattuivoq.

Allakkamini ammasuni Naalakkersuisut Inatsisartullu ajornartooqqaneq erngertumik nassuerutigeqqullugu kaammattorpai.

Imminut toqunnissamik sioorasaarinerit pisarnermit amerlanerusut

- Pisut peqqinnissaqarnikkut inunnillu isumaginninnikkut ataasiakkaatut iliuuseqarfigissallugit naammakkunnaarsimapput. Pisariaqarpoq ataatsimoortumik nassuerutiginninnissaq ajornartorsiutip annertussusaa tamatta nassuerutigissallugu ingerlaannartumillu massakkorluinnaq ajutooqqasutut killissimalluta nassuerutigalugu. Taamaliornitsinni tungavissiissagatta atituumik, pisussaaffilimmik ataqatigiissakkamillu iliuuseqarnissamik, pisortat, oqartussaasut inuiaqatigiinnilu sumiiffinni arlalinni akimorlugit, allappoq.

Imminut toqunnermut ajornartorsiut nassuiaruminaatsumik inuttullu ajornartoorfiusutut, inuiaqatigiillu aaqqissuussaanerannut nunamut tamarmiusumut ajornartorsiutinngorsimasutut taavaa.

- Nunatsinni Meeqqat Oqaaseqartartuattut pisariaqarsorivippara ilungersunangaatsiartumik ernumassuteqarnissamik killiffipput unamminartoq ataavartutullu allaat killiffeqalernerput oqaatigissallugu, inuiaqatigiittut imminut toquttartut imminullu toqoriaraluartartut qaffasilluinnartumik inisseqqalernerat eqqarsaatigalugu – minnerunngitsumik meerartatta inuusuttortattalu akunnerminni, kisitsisitigut ajoraluartumik qaffakkaluttuinnarput.

Imminut toqunnissamut pinaveersaartitsinermut periusissiaq Qamani

Namminersorlutik Oqartussat periusissiaq Qamani 2024-mi saqqummiuppaat. Taanna Stina Sværd naapertorlugu Kalaallit Nunaanni imminut toquttarneq pillugu ajornartorsiummik akiuiniarluni politikkikkut piumassuseqarnermut takussutissaavoq.

Ajunngitsumilli siunertaqaraluartoq ataavartumik aaqqiissutissiinissamut pisariaqartut amigaataasut taassuma tikkuarpai.

- Periusissiaq annertunerusumik pereersunut atuutiinnarpasippoq, imaappoq sunniuteqanngivippoq – aalajangersimaqqissaartumik pinaveersaartumik, siusittumik tamakkiinerusumillu isiginnittaaseqarluni pullaveqarnissaq amigaataavoq, tamannami siunertaammat; meeqqat inuusuttullu inuunerminni ulorianartorsiorlutik ajutooqqanaveersaartittariaqarmata, allappoq.

Stina Sværdip paasissutissiinera naapertorlugu Tusaannga 2024-mi 5.000-ingajannik imminnut toqunissamik eqqarsaateqartunit saaffigineqarsimavoq, taakkunannga meeqqat 238-t 18-it ataallugit ukiullit, ilaat quliinnarnik ukiullit.

Isumalluutit amerlanerusut, politikki maluginninniarnerlu

Kalaallit Nunaat Naalagaaffiit Peqatigiit meeqqat pisinnaatitaaffii pillugit isumaqatigiissutaannik ilanngunnikuugaluarluni, meeqqat inuusuttullu ajunnginnerpaamik atugassaqartinnissaat qulakkeerneqanngitsoq, Meeqqat Oqaaseqartartuat isumaqarpoq.

Eqqarsartaatsikkut peqqissusermik meeqqallu atuagassarititaannik ajutooqqasutut nassuerutiginninnissaq taassuma ujartorpaa. Nassuerutiginninneq iliuuseqarnissamik nassataqartoq – isumalluutitigut politikkikkut maluginninniarnikkullu.

- Nunatsinni meeqqat inuusuttullu akuerineqarsinnaanngitsumik ulorianartorsiorput – uagut inuiaqatigiittut akisussaaffigaarput qanoq iliuuseqassalluta. Ajornartoornermik killeqqalluta nassuernitsinni aamma pinaveersaartitsinikkut ataatsimut isiginninneq atorlugu iliuuseqartitsineq ukkataralugit neriuummik tunisillutalu qanoq iliuuseqarnissamik kinguaariit tullinnguuttunut tunniussaqarsinnaavugut, allappoq.

Paarisamit ajornartorsiut ukkatariniarlugu, nunarsuaq tamakkerlugu imminut toquttarnerup pinaveersaartinnissaanut ullorititami, "Yellow September“ peqataaffigineqarpoq – Imminut toquttarnerup pinaveersaartinnissaanut eqqumaffiginninnermik malunnartitsiarneq. Nuna tamakkerlugu sumiiffinni assigiinngitsuni septembarip ingerlanerani aaqqissuussisoqartassaaq.