Niviarsiaqqat nakorsamiit anisut tamarmik qiasut eqqaamavakka, uangalu tullinnguunnissara annilaangatigalugu. Nakorsamiinnera eqqaaqqikkusunnagu matoornikuuara.
Nakorsameereerlunga ilunnut ikkussisoqarnikoq anniaqalunga anivunga. 14-inik ukioqarpunga, Paamiunut atuariartornikuullunga sulilu atoqateqartalernikuunanga
Niviarsiaqqat nakorsamiit anisut tamarmik qiasut eqqaamavakka, uangalu tullinnguunnissara annilaangatigalugu. Nakorsamiinnera eqqaaqqikkusunnagu matoornikuuara.
Nakorsameereerlunga ilunnut ikkussisoqarnikoq anniaqalunga anivunga. 14-inik ukioqarpunga, Paamiunut atuariartornikuullunga sulilu atoqateqartalernikuunanga
Kollegiami aqutsisup qallunaap napparsimmaviliaqquaatigut. Naluarput susoqalernersoq. Oqartussaasut tatigaagut peqqussutillu malillugit iliorluta, tamannalu atornerlunneqarpoq. Niviarsiaqqat ineqativut tamarmik nakorsameereermata ingiaqatigiilluta kollegiamukarpugut. Oqaloqatigineqanngilagut. Aliasullutalu anniarpugut. Qulit aqqaneq-marlullu akornannik amerlassuteqarpugut. Niviarsiaqqat ineqatigiit tamarmik. Kingorna ilukkut anniartaqaanga.
Tamatuma kingorna allaannginnami suna tamarmi tujorminarsisoq. Arsummukarusuppunga anaanannut angerlarlunga. Kollegiami naalanngisaartalerpunga. Siornatigut taamaaliorsimanngisaannarpunga. Isumaqarpunga pisumut aqutsisumullu napparsimmaviliaqqusisumut pikitsitsinerusoq.
Angajoqqaakka ilisimasaqanngillat. Anaanaga naaggaarsinnaasarpoq illersorlutalu. Meeraaninni aappariit meerartaarsinnaanngitsut orsugassiorfimmeersut aallunga ornigupput. Anaanaga naaggaarpoq. Anaanama nalunngitsuuguniuk qanoq pineqarsimanersunga qanoq qisuariassagaluarnera pillugu qatanngutikka aperaakka. Kamassimassagaluaqisoq marluullutik oqaatigaat. Qanoq pisoqarsimanera nalullugu qimaguppoq. Paasitissimassagaluarpara.
Ukiuni arfineq-pingasuni spiraleqarpunga. Qaqugu peerneqassanersoq oqaatigineqanngilaq. Qujanartumik siullermeerlunga naartulernera ajornaquteqanngilaq. Aappassaanik naartuninni illissap paavatigut pivoq. Toqungajappunga. Panikka inuusuttuaraalermata naartunaveersaatit atoqatigiinnerlu pillugit aatsaat oqaloqatigaakka, tassanilu qanoq pineqarsimanerma naapertuutinnginnera aatsaat eqqarsaatigilerpara. Panimma misigissanngilaat.
Aqqusaarsimasavut arlaannaataluunniit misigisussaanngilai. Naapertuutinngitsumik pineqarnikuunerput akueriinnartussaanngilarput, taamaattumillu taarsiiffigitikkusuppunga. Ukiuni 49-ni anniartuarpunga, oqaasinngoraangakkulu oqiliallattaraluartoq qaangiinnagassaanngilaq.
Arnat allat taamatut aqqusaagaqarsimasut ataatsimoorfeqalernerput nuanneqaaq, aamma arnat allat naqinnernik ilisarsisinnaanngikkaangata taarsiiffigitinnissamik piumasaqaammut atsiorsinnaanngitsut ikiortarpakka.
Meeraallunga ikinngutigilluagara akuersiteqqaarnagu aamma spiralilerneqarnikuuvoq. Kræfterluni peerunnikuuvoq. Taanna sinnerlugu aamma ilungersoqataavunga. Taassuma angajua napparsimmavimmiit anillakkami qianerpaasoq eqqaamavara.
Hedvig Frederiksen
