Mette F.-ip nerisassat akiisa qaffasinnerat qulaajartikkusuppaa– akitsuutit appasinnerulersinneqarsinnaapput
Danmarkimi nerisassat akii EU-mi qaffasinnerpaat aappaattut inissisimapput, Danmarkimilu naalakkersuisut akitsuutinik appaanissamik isumaliutersuuteqarput.
- Piffissami matumani aningaasarsiornerulersoqarsimassaaq, tamannalu pillugu oqaloqatigiittariaqarpugut, piffissamimi nalaatatsinni ilaqutariit danskit nerisassanik pisiniarneq akisunerulersimasutut isumaqarfigimmassuk, Mette Frederiksen oqarpoq.
Assiliisoq: Thomas Lekfeldt/Ritzau Scanpix
Nerisassanut imeruersaatinullu akit maanna qaffasingaarmata, Danmarkip naalakkersuisuisa pissutaasut suuneri paasiniarlugit misissuisitsinialerput.
Akiitsut appartinneqarnissaat aningaasanut inatsimmut ilanngunneqarsinnaavoq, ministeriuneq Mette Frederiksen (S) Politikenimit apersorneqarluni erseqqissaavoq.
- Aningaasanut inatsit qanittunnguami saqqummiutissavarput, tassanilu takuneqarsinnaassapput iliuusissatut pilersaarutit ilaat, taanna oqarpoq.
Danmarkimi nerisassat akii EU-mi qaffasinnerpaanut tulliupput Luxemborgimiit kisimi qaangerneqarlutik, tamanna Danmarkip Naatsorsueqqissaartarfiata kisitsisaataasa takutippaat.
Danmarkimi inuussutissat a´akii EU-mi ilaasortat 27-t akornanni agguaqatigiissitsinermiit 19 procentimik qaffasinnerupput.
Nerisassanut soorlu neqinut sukkulaatinullu akit 20 procentimik qaffariarput, kaffimullu akit ukiup ataatsip iluani 32 procentimik qaffariarlutik.
Danskit naalakkersuisuisa aamma misissortinniarpaat unammilleqatigiinneq naammaginartumik ingerlanneqarnersoq. Tamanna atuuppoq ulluinnarni pisiassanut taamaallaat tunngatinneqarani, aammali aningaasaqarnikkut ingerlatsivinnut tunngassuteqarpoq, ministeriuneq aviisimut oqaluttuarpoq.
Partiit arlallit aasap ingerlanerani kissaateqarput akitsuutinik apparsaasoqassasoq, soorlu assersuutigalugu sukkulaatit kaffilu akitsuutaannik appaanissamik kissaateqarlutik, taakkumi qaffariarnerpaanut ilaammata.
Danmarkimi akit nalinginnaasumik nunanit allanit qaffasinnerupput, tamanna pissutigalugu akissarsiat qaffasinnerusut akileraartarnermilu qaffasinnerit akinut qaffariartitsisartut.
Iluanaaruteqartorujussuusoqarsimassappat, ministeriunerup taakku toqqaannartumik saaffiginnittussaassaa.
- Pissutsit taamaanneranni maannakkut aningaasarsiornerulersut arlaqarsimassapput, taakkulu uagutsinnut oqaloqatiginnittariaqarput, piffissami matumani danskit ilaqutariit isumaqarmata nioqqutissat akisunerulersimasut, Mette Frederiksen oqarpoq.
Danskit naalakkersuisui, nunalerinermik inuussutissarsiuteqartut aammalu pinngortitap illersorneqarnissaanik suliniuteqartut peqatigiillutik suleqatigiiffiat, den grønne trepart - naalakkersuisut peqataaffigisaat - ukiuni aggersuni immuit nersussuillu neqaasa akiisa qaffanneqarnissaat siunertarivaat.
Nersussuup neqaa kiilup affaanut akia 2030-mi koruunimik ataatsimik qaffassaaq, 2035-milu koruuninik marlunnik qaffassalluni, tamanna danskit naalakkersuisuisa isumaqatigiissut naapertorlugu naatsorsuutigaat, danskit nunalerinerisa annersaat pinngortitamut ikaarsaarteqqinneqarnissaa siunertarineqarmat.
