Mimi Karlsenip Inatsisartut pingasunngornermi matoqqasumik ataatsimiinnissamut aggersarpai
Inatsisartut ukiakkut ataatsimiinnerat pilersaarutit malillugit ataasinngornermi februarip pingajuani nangeqqinneqassaaq. Inatsisartulli siulittaasua aalajangerpoq Inatsisartut pingasunngornermi matoqqasumik ataatsimiisinneqaqqaassasut. - Maanna politikkikkut pissutsit oqaluuserissavagut, Sermitsiamut oqarpoq.
Inatsisartut siulittaasuat aalajangerpoq Inatsisartunut ilaasortat pingasunngornermi ataatsimiinnissamut qaaqquniarlugit.
Assi: Leiff Josefsen
Oqartoqarsinnaavoq kalaallit tamarmik Trumpip silarsuaanut igitaasimasut, aqagussaq qanoq ikkumaartoq qulakkeerlugu ilisimaneqarsinnaanani.
Inatsisartut siulittaasuata Mimi Karlsenip aalajangerpaa Inatsisartunut ilaasortat ataatsimoorlutik politikkikkut pissutsit maannakkut atuuttut oqaluuserissagaat:
- Nalunngisatsitut ataasinngorpat (februaarip pingajuanni, aaqq.) aatsaat ataatsimiinneq nanginneqartussaavoq, aalajangerpungali Inatsisartut pingasunngornermi ataatsimiinnissaannut aggersassallugit, tassani politikkikkut pissutsit maannakkut atuuttut oqaloqatigiissutigineqassallutik.
- Ataatsimiinnermi aalajangersimasumik oqaluuserisassaqarpa?
- Naagga, pilersaarutigaara issiaqatigiissasugut pissutsillu pillugit ataatsimoorluta ilisimatitseqatigiissasugut. Assersuutigalugu Inatsisartunut ilaasortat nunap immikkoortuinit assigiinngitsuneersuupput, innuttaasullu Inatsisartunut ilaasortat nunaqqatigisai maanna qanoq innersut tusarniarusuppakka, Inatsisartunut siulittaasoq Mimi Karlsen (IA) akivoq.
Erseqqissaassut: Qinigaasimaneq sumiluunniit atuuppoq
Inatsisartut siulittaasuata Inatsisartunut ilaasortat ataasiakkaat pillugit apeqqutit akiumanngilai, nalinginnaasumilli oqarpoq Inatsisartunut qinigaasup akisussaaffini iperaannarsinnaasanngikkaa:
- Inatsisartunut ilaasortat inersimasuupput, ilisimavaallu akisussaaffitsik unitsikkallaannarsinnaanagu. Inatsisartuni ilaasortaaneq ulloq unnuarlu, ullut tamaasa ukioq kaajallallugu atuuppoq suliffiullunilu, taanna erseqqissaavoq.
- Assersuutigalugu nammineq soqutigisani aallullugit ingerlaguni, sunngiffimminilu soqutigisani suliarinerarunigit, akissarsiatigut ilanngaatsinneqarsinnaava?
- Naagga, assersuutigalugu naalagiarusukkama innuttaasullu ilaat naalagiartarninnik apeqqusiippata, Inatsisartunut ilaasortaanera tunuartikkallarsinnaanngilara aningaasarsiassakkalu ilanngaatsikkumallugit. Taamaaliorneq ajornaqaaq, soorlu oqareersunga Inatsisartunut ilaasortaaneq qinigaaffiup naanissaanut atuuppoq, allanngortinneqarsinnaananilu.
