Misilittagaqarluartut akornanni eqqissisimasoqarlunilu eqqissiviittoqartoq

Nunarput nunarsuarmi piffissami kingullermi sammineqarluarpoq. AG-p Nikolaj Heinrich, 87-inik ukiulik, politikeri, kattuffilerisimasoq ukiorpassuarnilu aalisartuusimasoq oqaloqatigaa, piffissaq pisoqarfiulluartoq tamanna qanoq isumaqarfigineraa paaserusullugu.

- Trumpip Nunatsinnik niuernikkut soqutiginnilersitsinera iluaraara, tamannalu ilassilluarpara, Nikolaj Heinrich oqarpoq.

Donald Trumpip Nunarput pillugu piffissami kingullermi oqaaserisai innersuussutigai, taannami siullermik 2019-imi Nunatsinnik pisinissaminik kissaateqarnerminik oqaaseqarpoq, qanittukkullu Amerikamiut Nunarput aqussinnaalerusullugu pigilerniarlugulu sakkutooqarnikkut aningaasaqarnikkullu pinngitsaaliilluni iliuuseqarusunnini ilumuunnginnerarsimanngisaannarpaa.

Tamanna Nunatsinni innuttaasunit qisuariarfigineqangaatsiarpoq, inuit arlallit nittartakkatigut attaveqaqatigiittarfinni ernumanerminnik oqaaseqarlutik piviusorsiunngitsunillu siulittuuteqarlutik.

Nikolaj Heinrich inuit isumakuluutaat ernumanerallu, inoqatinut attaveqaqatigiittarfinni ersersinneqartut, paasilluarpai.

- Soorunami inuit ernumapput, tamannalu paasisinnaavara. Oqaaseq „pisiniarneq“ ernumassutigineqarpoq, ilaallu isumaqarlutik, ingerlaannartumik tamanna pisinnaasoq. Kisianni isumaqarpunga Nunarput pisiariinnarsinnaanngikkaa. Inuit eqqissisimanerusariaqarput, Nikolaj Heinrich oqarpoq nangillunilu:

- Pinngitsaaliillunilu sakkutuuliiniarnera piviusorsiortuunngilaq. Kalaallit Nunaat sakkutooqarfeqanngilaq, nunalu tiguarneqarsinnaanngilaq. USA Danmarkilu NATO-mut ilaapput, tamannalu sumiginnarneqarsinnaanngilaq. Tamakku tamaasa tusaatissatut tiguakka, oqarpoq.

Tamatumunnga taarsiullugu Nunatsinni Danmarkimilu inuit 'eqeertariaqarput' nunallu isumalluutai isiginiarlugit, isumaqarpoq.

- Isumaqarpunga Trumpip præsidentiunera Nunatsinnut iluaqutaasorujussuussasoq, eqqortumik atorluarutsigu. Taamaaliunngikkuttami pisiariniarluta oqaatigisaqattaartuassavaa,

Nikolaj Heinrich oqarpoq.

Itersaasoq

Nikolaj Heinrichimut ikinngutaannullu allaanerusumik sunniuteqarput. Taassuma Trumpip oqaasii pitsaasumik isigilerpai.

Isumaqarpormi Donald Trumpip kalaallit qallunaallu kisiisa killinngikkai, immaqalu aamma nunarsuarmiut sinneri killissimagai.

- Trump aningaasaqarnermut angakkuuvoq. Danmarkimi Nunatsinnilu inuiaqatigiit eqeersarpai oqallitsitsilerlunilu, pisuussutitsinnik akisuunik eqqumaffiginnilersinniarsaraluta, USA-mik niueqateqarnitsinnik patajaatsumik tunngaviliisinnaaniassagami, oqarpoq.

Taamaattumik nunap pisuussutai misissortariaqarpavut nunanullu allanut imminut nittarsaanniarluta iliuuseqarnerusariaqarluta, tamannami uagutsinnut aamma iluaqutaassammat, Nikolaj Heinrich nassuiaavoq.

Taanna isumaqarpoq, Naalagaaffeqatigiinnerup nalaani Nunarput ukiuni arlalinni „unittooqqasimasoq“, qallunaanit kalaallinillu ingerlatsiniartoqarnerani.

„Uagut utoqqaat soorunami Nunatsinnik ukiorpassuarni ilisimasaqarpugut ukiunilu taakkunani ineriartornera malinnaaffigalugu, maannalu Trumpip itertippaatigut oqarfigalutalu: ”Iteritsi! nunarsi pisoorsuuvoq, Nikolaj Heinrich oqarpoq.

Nunamik imaaliallaannarluni pisisoqarsinnaanngilaq

Nunap nunarsuup avannaaniittup pisiariniarneqarnera pillugu Nikolaj Heinrich ima oqarpoq:

- Tamanna ajornarluinnarpoq. Danmarkimi naalagaaffiup ataaniippugut taamaammallu Inatsisit Tunngaviusut ataaniilluta taannalu avaqqutiinnarneqarsinnaanngilaq. Taamaattumik isumaqarpunga Trumpip oqaatigisani piviusunngortissinnaanngikkaa, Nikolaj Heinrich oqarpoq.

Sapaatip akunnerani kingullermi pingaartorsiornartumik præsidentinngortitsisoqarnerani, Donald Trump præsidentitut siullermik oqalugiarmat, inuppassuit isiginnaartut millionikkaat pissangasorujussuupput.

Præsidentinngortinneqarnerani malinnaasut ilagaat Asii Chemnitz Narup, politikeri nuimasoq, Nunatsinni politikimi, siorna tunuarniarluni nalunaaruteqartinnani, ukiut 30-t sinnerlugit politikeriusimasoq.

- Præsident Trumpip ivertinneqarnermini oqalugiarnerani pissangallunga tusarnaarpunga, Asii Chemnitz Narup Facebookimi quppernermini allappoq.

Oqalugiaataa tamaat ajuusaarnartutut isigaa, aamma naak Nunarput eqqaaneqanngikkaluartoq imaanngilaq ernummatissaaruttugut.

- Toqqaannartumik eqqaaneqanngilagut, taamaammallu eqqissiallalaarpunga. Kisianni ingasanngitsumik. Oqalugiarnermini eqqaavaa, USA-p nunatani annertusiniaraa. Marsimi? Panamami? Imaluunniit Kalaallit Nunaanni? Piffissaq ernumanartuuvoq. Ataatsimoortariaqarpugut, nunarsuarmi attaveqaqatigisavut paarisariaqarpavut. Eqqarsarluartariaqarpugut, Asii Chemnitz Narup quppernermini allappoq.