Misissuineq: Imigassap kingunerisaanik misissuinerit kukkusut pissutsit allaanerunerinik takutitsipput

Misissuinernit qulequttat ilaanni annertunaarnagu imigassartorneq, soorlu ullut tamaasa immiartorfimmut ataatsimut viinnisorneq, sivisunerusumik peqqinnerusumillu inuunermik kinguneqarsinnaasoq paasititsissutigineqartarpoq — sapaatip-akunneratali tulliani ullut tamaasa imigassartornissaq mianersuuteqquneqartarpoq.

Canadami ilisimatuut aalakoornartortalinnik imigassartortarneq pillugu misissuinerit 107-it misissorsimalerpaat.

Misissuinermi paasiniarneqarpoq sooq ilisimatuut misissuinerisa arlallit siornatigut paasisimaneraat ullormut imigassat annerpaamik immiartorfiit marluk imertarneri sivisunerusumik inuuneqalersitsisartoq peqqinnerulersitsisartorlu.

„Isumaqarpugut misissuinerit ilaanni (ingasaassinngitsumik imigassartorneq pillugu, aaqq.) peqqissutsimut iluaqutaaneranik eqqunngitsumik isummertoqartartoq,“ misissuinermik allaaserinnittuusoq professori Tim Stockwell Videnskab.dk-mut oqarpoq.

„Angusatta uppernarsarpaat peqqissutsimut iluaqutaasunik takussutissaqangitsoq."

Imigassartornaveersaarnerup oqaluttuassartaa amigaataasoq

Misissuinerit arlallit naapertorlugit ingammik sapaatip-akunneranut ataasiarlutik ullormullu marloriarlutik imigassartortartut imigassartortanngivissunit inuuneqqortunerupput.

Tim Stockwell suleqataasalu allaaserisaanni Journal of Studies on Alcohol and Drugs-imi saqqummeqqammersumi allaatigineqarpoq „misissuinerit arlallit pingaarutilinnik arlalinnik ilanngussaqannginnerat pissutaasoq“.

Assersuutigalugu paasivaat misissuinerit arlallit imerpallaannginnerup imerpallaannginnermit peqqinnarneruneranik ersersitsisut utoqqarnik kisimi misissuisut, utoqqaanerusut siusinnerusukkut imertarsimanerat eqqarsaatiginagu.

Tassa misissuinerni arlalinni eqqarsaatigineqarsimanngilaq imerneq ajortut ilaat siornatigut imerajuttuunersut allanillu nappaateqarnersut.

Ingasaassinngitsumik atuineq peqqinnarnerusumik inooriaaseqarnermut ersiutaasinnaavoq

Anette Søgaard Nielsenip, Syddansk Universitetimi (SDU) professorip, misissuineq atuarsimavaa inerniliinerillu tupaallaatiginngilluinnarlugit:

„Sivisuumik oqallisigisimavarput: Misissuinerit inerneri qanoq assortuutsigippat?“

Anette Søgaard Nielsen naapertorlugu „imerpallaanngitsunik“ imertartup peqqinnerusutut isikkoqalerneranut pissutaasoq alla ilanngunneqarsinnaavoq:

"Ilisimavarput kiserliorneq siusissukkut toqqutaasinnaasoq. Imigassartortillutit allanik peqateqakkajupputit, immaqa nerisassanik mamartunik nereqateqartillutit imigassartorsinnaallutit. Tamanna peqqinnarnerusumik inooriaaseqarnermut aamma takussutissaasinnaavoq,“ Videnskab.dk-mut oqarpoq.

Aalajangersimasumik kukkussuteqarneq kukkusumik isiginnittaaseqalersitsisarpoq

Tim Stockwellip neriuutigaa ilisimatuut siunissami misissuinerminni assigiinngitsunik misissuinerulissasut:

„Neriuppunga siunissami nappaalanersuaqarneq pillugu ilisimatuut imigassamik atuineq pillugu amerlanerusunik pitsaanerusunillu apeqqusiinerusalissasut,“ Videnskab.dk-mut allappoq nangillunilu:

„Neriuutigineqarpoq tamanna aaqqiissutissaassasoq kukkussutit aaqqissuussaasumik pilersinneqarsimasut maannakkut ilisimatusarnermik ajornartorsiortitsilersimasut imigassallu peqqissutsimut sunniutai pillugit eqqunngitsumik isummertitsisut ikinnerulersinniarlugit."