Mittarfiit marluk 5 milliardit koruuningajannik akeqassasut
Greenland Airports Nuummi Ilulissanilu mittarfiliornissamut taarsigassat qaavatigut 1,1 milliard koruuninik taarsigassarsinissaq pillugu Namminersorlutik Oqartussanik isumaqatiginninniarpoq.
Toqqorsivimmiit assi: Morten Okkels
Sanaartornerit angisuut ilimagisamit akisunerukkajuttarput, Nuummi Ilulissanilu mittarfiliornerit aamma taamaapput.
Greenland Airportsip suliffeqarfissuarmi ingerlatseqatigiiffiit ukiumoortumik nalunaarusiaat saqqummiuteqqammerpai, tassanilu Ilulissani mittarfiliornerup naammassinissaanut 1,1 milliard koruuninik aningaasaliisoqaqqittariaqartoq takuneqarsinnaavoq.
Nunani tamalaani mittarfiit nutaat marluk aningaasalersorneqarnissaat 2019-imi pilersaarutit naapertorlugit 3 milliarder koruunit missaannik naleqartussaagaluarput.
Akit qaffakkiartuinnarput, naatsorsueqqissaarnermilu maannakkut akiligassat 4,8 milliarder koruuninik naleqartussaasut takuneqarsinnaavoq.
Tabel: Greenland Airports
Oqartussanit piumasaqaatit sanaartornermullu piumasaqaataat sukannernerulersut
Greenland Airports International mittarfinnik marlunnik sanaartortussaallunilu ingerlatsisuussaaq.
Piginnittut, tassa Namminersorlutik Oqartussat aamma danskit naalagaaffiat, 1,1 milliarder koruuninik aningaasaliisoqarnissaanik isumaqatigiinniartoqartoq ingerlatseqatigiiffiup aqutsisuisa nalunaarusiaanni allassimavoq:
- Ingerlatseqatigiiffiup Ilulissani mittarfiliornerup siunissamut ungasissumut aningaasalersornissaanut sinaakkutissat sinneruttut pillugit piginnittut oqaloqatigai. Siunissamut ungasissumut aningaasalersornissaanut sinaakkutissat 1.100 mio. kr.-it pisariaqartinneqarput, kiisalu sanaartornernut angisuunut nalinginnaasumik attuumassuteqartunut aarlerinartut isumagineqarsinnaaqqullugit sinaakkutissat pisariaqartinneqarput, aqutsisut nalunaarusiaanni allassimavoq.
Namminersorlutik Oqartussanit qallunaalluunniit naalagaaffiannit aningaasaliissuteqartoqarani taarsigassarsisoqarniartoq Greenland Airports Sermitsiamut ilisimatitsivoq.
Greenland Airportsip suliniutit aningaasaqarnikkut inuiaqatigiinnullu iluaqutaasumik tunngavissaqarluartuusut qularinagu, Kalaallit Nunaannullu iluaqutaasinnaasut aningaasartuuteqarnerunerannit annerungaartut Sermitsiamut ilisimatitsivoq.
- Nuummi mittarfiup nutaap sunniutai takusinnaalereerpagut, tassani mittarfissuartaaq nunanit tamalaanit tikinneqarsinnaanerulersitsilluhnilu innuttaasunut inuussutissarsiortunullu periarfissanik nutaanik ammaassisimavoq, Greenland Airports allakkatigut akissuteqarluni allappoq.
2,6 milliardit koruunit Nuummi aningaasaliissutigineqartut — ammarneqarnera ilungersunartoq
Greenland Airportsip Nuummi mittarfimmik 2024-mi ammaanera angusaqarluarfiuvoq.
Timmisartortitseqatigiiffiup Nuummi mittarfiliornermut 2,6 milliarder koruunit maannamut atorsimagai ukiumoortumik nalunaarusiami takuneqarsinnaavoq.
- Illunut 464 millionit koruunit, mittarfimmut 1.691 millionit koruunit, atortunut atortorissaarutinullu 442 millionit koruunit aamma programminut akuersissutinullu 8 millionit koruunit atorneqarsimapput, tassani allassimavoq.
Nuummi mittarfiup ammarneqarnera Greenland Airportsimut tamarmut sunniuteqarsimasoq aamma suliffeqarfimmi sulisunut tamanut – aamma mittarfinni allani tamanut – piumasaqaaterpassuaqartoq, pisortaaneq Jens Lauridsen oqarpoq:
- Nunani tamalaani timmisartoqarfiliornissaq suliassarujussuuvoq. Sulisut hundredellit suliassallu assigiinngitsorpassuit isumagisassaapput, aammalu ilikkagassarpassuaqarlunilu ileqqunik arlalinnik ilanngussisariaqarsimasugut isertuukkusunngilara, pisortaq oqarpoq nangillunilu:
- Sulisugut, suleqatigut angalasullu annertuumik piumasaqarfigineqarput. Suliagut arlallit pitsanngorsarneqarsinnaasut qaammatini kingullerni paasivarput. Kikkullu tamarmik angalanerat ajornannginnerulersinniarlugu tamakku suliarinerat ingerlatiinnassavarput.
Ilulissat Qaqortullu 2026-mi ammarnissaat suli naatsorsuutigineqartoq
Greenland Airports Ilulissani Qaqortumilu mittarfiliornermik suli suliaqarpoq. Mittarfiit taakku marluk 2026-mi ammarnissaat suli naatsorsuutigineqarpoq.
- Ilulissani Qaqortumilu mittarfiit takornariaqarnermut, inuussutissarsiornermik ineriartortitsinermut angallannermullu iluaqutaalluassapput – soorlu Nuummi mittarfik nutaaq taamaalereersoq. Ullumikkumut taamaallaat sanaartornata, aammali kinguaariinnut tulliuttunut sanaartorpugut, Kalaallit Nunaannilu periarfissanik ammaasseqataasinnaagatta Greenland Airportsimi tulluusimaarutigaarput, Jens Lauridsen oqarpoq.
Qaqortumi mittarfik 1 milliard koruuninik akeqartussatut missingersorneqarpoq, mittarfiillu pingasut taakkua tamarmik 5,8 milliard koruuninik akeqartussaasut naatsorsuutigineqarput.
