KL

DK

Mittarfik pillugu Illersornissaqarfimmut isumaqatigiissut kiisami takusinnaalerparput

Naleqqap siulittaasuata Pele Brobergip qaammatini arlalinni ilungersorluni sulissutigereeraalu Kangerlussuarmi mittarfik pillugu danskit illersornissaqarfiannut isumaqatigiissut tamanut saqqummiunneqarpoq. Isumaqatigiissutip imarisai politikerip apeqquserpai.

Mittarfik pillugu Namminersorlutik Oqartussat Illersornissaqarfiullu isumaqatigiissutaat Naalakkersuisut nalunaarutiginikuusaannut naapertuutinngillat, Naleqqami siulittaasoq Pele Broberg isumaqarpoq.
Tusagassiortoq
Saqqummersinneqarpoq

Kangerlussuup mittarfiata atorneqarnissaa pillugu Namminersorlutik Oqartussat Illersornissaqarfiullu isumaqatigiissutaanni immikkoortoq qitiusoq Pele Brobergip allaaseraa.

- Naalakkersuisut qanoq ilillutik oqarsinnaappat Kangerlussuup imarpik qulaallugu timmisartuussinermut ammatinneqartuarnissaa niuernikkut tunngavissaqarluartoq, uffa isumaqatigiissummi imarpik qulaallugu angallassinerup nuunneqarnissaa piumasaqaatigineqartoq, Pele Brobergip isumaqatigiissut qaammatini arlalinni isertuunneqarsimasoq pillugu tupigalugu apeqquserpaa.

Isumaqatigiissummi immikkoortoq aalajangersimasoq innersuussutigaa:

“Imarpik qulaallugu timmisartuussisarnerup tamakkiisumik nuunneqareersimanissaa timmisartoqarfimmilu ingerlanneqarunnaarsimanissaa tunngavissaatillugu, isumaqatigiissut 1. december 2024 atuutilerpoq, aammalu tamanna tikitsinnagu Illersornissaqarfiup timmisartoqarfimmik atuinerata ingerlaannarnissaa pillugu sivisunerusumut isumaqatigiissut matuma siuliani taaneqartoq isumaqatigiissutigineqareersimanngippat, 2027-p naanerata tungaanut atuutissalluni.”

Pele: Naapertuutinngilaq

Air Greenlandip piffissap ilaani Kangerlussuup Imarpik qulaallugu timmisartuussinermut atorneqarnissaanik pilersaarutaanut naapertuutinngitsoq Pele Broberg isumaqarpoq.

Illersornissaqarfiup 2027-p tungaanut ukiumut 24 millionit koruunit missaanniittut aningaasartuutigisassagai allassimavoq

Aningaasartuutit ilanngaatigineqartut Greenland Airportsimut (nunap ilaani mittarfinnut) tunngapput (2810 m takitigisumut) 2023-mut Aningaasaqarnermut ilusiliami ilanngunneqarlutik, taakku Illersornissamut attuumassuteqanngillat. Upalungaarsimanerup CAT5/CAT8 assigiinngissutaat = 4,2 mio. kr., Talittarfik = 0,3 mio. kr., Timmisartumik aqutsineq = 3,2 mio. kr., Talittarfiup allaffia = 2,2 mio. kr., aamma Ernianut aningaasartuutit = 0,7 mio. kr., katillugit 10,6 mio. kr.

Isumaqatigiissummi aningaasaqarneq pillugu erseqqissarneqarpoq Illersornissamut ministereqarfik "Illersornissaqarfiup timmisartoqarfimmik atuinerata ingerlaannarnissaanut, sullissinermut ukiumoortumik akiliuteqassaaq, Greenland Airports Regional A/S-ip ingerlatsinermut aammalu mittarfiup takissusaa (2810 m) maannakkut akuerineqartoq tikillugu, mittarfimmik aserfallatsaaliuinermut aningaasartuutaasa ilaannut matussutaasussamik. Timmisartoqarfimmi aningaasartuutit isertitallu tamarmiusut, ingerlatsinermut mittarfimmillu aserfallatsaaliuinermut tunngassuteqartut, aammalu ukiumoortumik naatsorsuinermut atatillugu naatsorsorneqartartut, malillugit akiliutissaq iluarsineqartassaaq. Tassunga atatillugu, taanna akiliutissap annertussusissaanik iluarsiinermik malitseqarsimappat, Illersornissaqarfimmut aserfallatsaaliuinissamut pilersaarut iluarsineqartoq saqqummiunneqassaaq".

Aningaasaqarneq oqimaaqatigiissoq

- Kangerlussuarmi Timmisartoqarfimmi aningaasaqarneq tamarmiusoq ukiumi ataatsimi oqimaaqatigiissinneqassaaq. Taamaalilluni Illersornissaqarfiup akiliutissaa, timmisartoqarfiup isertitai aningaasartuutaalu apeqqutaatillugit, allanngorartuussaaq. Illersornissaqarfiup isumaqatigiissutaagallartup piffissami atuuffissaani akiliutissaannik naatsorsuineq, Mittarfeqarfiit A/S-imi Aningaasaqarnermut ilusiliami naatsorsorneqarpoq, står der under punkt 13 i det fire sider lange dokument.

Isumaqatigiissummi allassimavoq Greenland Airportsip “mittarfiup aserfallatsaaliorneqarneranut akisussaasuuvoq, taannalu ukiunut arlalinnut aserfallatsaaliuinissamut pilersaarut, isumaqatigiissutaagallartoq manna atuutilerpat Illersornissaqarfimmi qullersanut (Arktisk Kommando) tunniunneqartussaq, tunngavigalugu ingerlanneqassaaq. Timmisartoqarfiup maannakkut inuiaqatigiinni sakkutuujunngitsunik timmisartoqarfittut ingerlanneqaannarsinnaanngorlugu, aammalu Illersornissaqarfiup timmisartuisa maannamut pisartutut mittarfimmik atuisinnaanissaannut, aserfallatsaaliuineq ingerlanneqassaaq ”.

Ingerlaavartumik aserfallatsaaliuinermut aammalu ukiunut arlalinnut aserfallatsaaliuinissamut pilersaarut naapertorlugu Illersornissaqarfiup atuisinnaanerata ingerlaannarnissaanut mittarfiup atoruminartuunissaata qulakkeerneqarneranut, aningaasartuutit Illersornissaqarfiup Greenland Airports Regional A/S-imut akilissavai aamma paasissutissiissutigineqarpoq.

Brobergi arlalinnik apeqquseeqqittoq

Pele Brobergip isumaqatigiissut inuiaqatigiit aningaasaqarnerannut qanoq kinguneqarsinnaanersoq apeqquserpaa. Pele Brobergip oqaasii naapertorlugit "Mittarfeqarfiit ukiumut 35 millionit koruuniinnaanik tapiiffigineqartartussaasut maannakkut 102,5 millionit koruuninik aningaasaliiffigineqarmata“.

- Kangerlussuup atorneqaannarnissaa niuernikkut tunngavissaqarpat taava Greenland Airportsip Kangerlussuarmut angalasut akiliisittariaqarpai, Naleqqami siulittaasoq oqarpoq, apeqquseeqqillunilu:

- Illersornissaqarfiup 24 millionit koruunit aningaasaliissutai mittarfimmut 2810 meterisut takitigisup ingerlanneqarnissaanut taamaallaat atugassaapput. Imarpik qulaallugu timmisartuussinerit annertusineqarnerat qanoq aningaasalersorneqarpat? 2025-mut aningaasanut inatsimmi tamanna allassimanngippat 50 millionit koruunit missaanniittut kiap akilissagamigit?

Isumaqatigiissut Greenland Airports Regional A/S-imi siulersuisuni siulittaasumit Kjeld Zacho Jørgensenimit, ingerlatseqatigiiffimmi tassani pisortamit Henrik Estrupimit aamma Illersornissamut ministereqarfimmi pisortamit Kasper Høeg-Jensenimit atsiorneqarpoq.

greenland airports forsvaret aftale inuiaqatigiit samfund kangerlussuaq pele broberg

ATORFIIT Se alle jobs

Powered by Labrador CMS