KL

DK

Mittarfiup nutaap ammarneqarnissaanut aqutsisoqarfik akuersivoq

Greenland Airports nalunaarpoq, Nuummi mittarfiup ammarneqarnissaanut angallannermut aqutsisoqarfimmit akuersissutit kingulliit pissarsiarineqarsimasut. Angallannermut aqutsisoqarfik ilisimatitsivoq aallartisarnermi isumannaallisaanermut piumasaqaatit ilassutaasut naammassineqassasut piumasarineqarsimasoq.

Nuuk International Airport akuerineqarpoq ammarneqarnissaminullu piareerpoq.
Thomas Munk Veirum
Tusagassiortoq
Saqqummersinneqarpoq

Ukiuni arlalinni annertuumik sanaartortoqareersorlu, ilaatigut millionilikkaanik kuubikmeterinik qaarsumit nuussisoqareersorlu, maanna Angallannermut Aqutsisoqarfimmit Nuuk International Airport akuersissummik tunineqarneranik inerneqarpoq.

Akuersissut tunniunneqarpoq ammaanersiorluni nalliuttorsiornissamut nalunaaquttap akunneri arlalialuinnanngortullu aammalu Air Greenlandip timmisartorsuata Tuukkap pilersaarutit malillugit nal. 12.35 missaani tikinnissaa sioqqullugu.

Greenland Airportsip Facebookimi nalunaarutigaa, Trafikstyrelsenip mittarfik akuerisimagaa:

- Angallannermut aqutsisoqarfiup sukumiisumik misissuereerluni akuersissutigaa, Nuuk International Airportip novembarip 28-ani ammarneqarnissaa, Greenland Airportsip pisortaanera, Jens Lauridsen oqarpoq, nangillunilu:

- Oqaluttuarisaanermi alloriarneruvoq pingaarutilik, nunap illoqarfiisa pingaarnersaannut atlantikoq qulaallugu toqqaannartumik timmisinnaalernerup malitsigisaanik periarfissarpassuit ammartussaammata. Tassunga kilinnissaq Greenland Airportsimi sulisut suleqatigisartakkattalu sivisuumik, tunniusimalluinnarlutillu annertuumik sulinerisa malitsigisaa. Sulisut suleqatigisallu tunniusimalluinnarlutik anguniagarlu siunnerfigalugu sulinerat qujassutigaara.

Aallarnisarnermi aqutsisoqarfimmit piumasaqaatit ilaneqarput 

Angallannermut aqutsisoqarfimmit sisamanngornerup unnuaani tusagassiuutitigut nalunaaruteqarnikkut erseqqissaatigineqarpoq akuersissuteqartoqarsimasoq, tassanilu erserpoq mittarfiup aallarnisarneqarnerani aqutsisoqarfimmit piumasaqaatit ilaneqarsimasut.

Angallannermi aqutsisoqarfimmi allaffimmi pisortap, Henrik Ellermannip, tamanna nassuiarpaa:

- Akuersissutigivarput, mittarfiup nutaap 2.200 meteriusup isumannaallisaanikkut upalungaarsimaneq ajunngitsuusoq. Akuersissummik tunniussinermi atugassarititaasussat arlallit piumasaqaatigineqarput, taakkulu aqqutigalugit erseqqissaatigineqarpoq, mittarfik aallarnisartuusoq, taamaammallu pisariaqartoq immikkut ittumik pissutsit arlallit isumannaallisaanermut tunngasut killilersuutitallit atuutsinneqassasut, mittarfiup nutaap periusissiaminik atortulersuutiminillu naammassinninnissaata tungaanut, allaffimmi pisortaq oqarpoq nangillunilu:

- Tamanna isumaqarpoq, assersuutigalugu silarlutsillugu isumannaallisaanikkut periutsit sukaterneqassasut piumasarigipput, aammalu mittarfik ulloq unnuarlu aputaajarneqarsimassasoq, taamaalilluni asfaltimut assakaasut tukkaangata pissutsit pitsaanerpaatinneqarnissaat qulakkeersimaneqaqqullugu. Piumasaqaat alla tassaavoq, silaannaq timmiffigisaq taamaallaat ingerlatseqatigiiffinnit Kalaallit Nunaata silaannartaani timmisartuussisartunit pioreersunit atorneqarsinnaassasoq, tassalu Air Greenlandimit aammalu Icelandairimit.

Allaffimmi pisortaq naapertorlugu akuersissummik tunniussinermut atatillugu, piumasaqaatit akuersissutip tunniunneqarnerani naammassineqartussatut erseqqissaatigineqartarnerat, aammalu erseqqissaatigaa piffissami aggersumi aqutsisoqarfiup nakkutilliinini suli ingerlatissagaa.

jens lauridsen inuiaqatigiit greenland airports erhverv air greenland ny lufthavn i nuuk nuuk international airport trafikstyrelsen

ATORFIIT Se alle jobs

Powered by Labrador CMS