Moskva: Putin piareerpoq piumasaqaatitaqanngitsumik isumaqatigiinniarnissamut
USA-p immikkut ittumik aallartitaa Putinip naapeqqammerpaa. Tamatuma pinerani Trumpip præsidenti isornartorsiorpaa saassussisitsinera pillugu.
Pave Fransip toqukkut qimagunnermi kingorna ilisaanissaa sioqqullugu Romimi arfininngornermi ullaakkut Volodymyr Zelenskyj Donald Trumplu ataatsimeeqatigiipput.
Assi: Handout/Ritzau Scanpix
Ruslandip præsidentia, Vladimir Putin, Ukrainemut isumaqatigiissuteqarnissamut piumasaqaatitaqanngitsumik piareersimavoq.
Putin taamak oqariartuuteqarpoq tallimanngornermi USA-p immikkut ittumik aallartitaata, Steve Witkoffip, ataatsimeeqatiginerani.
Taamak oqarpoq Ruslandip præsidentiata oqaaseqartartuutitaa, Dmitrij Peskov. Nutaarsiassaqartitsivik AFP taamak allappoq.
- Ippassaq Trumip aallaartitaanik Witkoffimik oqaloqatiginninnermini Vladimir Putin uteqqiivoq, Rusland piareersimasoq siumoortumik piumasaqaatitaqanngitsumik Ukraine eqqissinissaq pillugu isumaqatigiinniaqatigissallugu, Peskov oqarpoq.
Taassuma ilanngullugu oqaatigaa Putinip tamanna arlaleriarluni siusinnerusukkut oqaatigisareeraa.
Reuters naapertorlugu Witkoffip Putin nalunaaquttap akunnerini pingasuni ataatsimeeqatigaa Ruslandip illoqarfiisa pingaarnersaanni, Moskvami, tassanilu oqaluuserineqarpoq Ukrainemi sorsunnerup unitsinneqarnissaanut amerikamiut pilersaarutaat.
Time Magazinemi apersorneqarluni, tallimanngornermilu saqqummiunneqartumi, USA'p præsidentia, Donald Trump, erseqqissaavoq, "Krim Ruslandip nunataaniilissasoq".
Ilanngullugu taassuma oqaatigaa, nammineq anguniagarigini Rulandip Ukrainep nunataata 20 procentia eqqisseqatigiinnissamut isumaqatigiinniarnernut atatillugu pigisarilissagaa.
Krim Ruslandimit 2014-mi tiguarneqarpoq, taamaattorli Ukrainemit aammalu nunanit killernit isigineqarpoq nunap immikkoortua taanna Ukrainemut atasuusoq.
Moskvami ataatsimiinnerup aqaguani, tassa ullumikkut Trumpip, præsidenteqatini, Ukrainemiut præsidentiat, Volodymyr Zelenskyj ataatsimeeqatigivaa.
Italiap illoqarfiata pingaarnersaanni, Romimi, pisut, præsidentit taakku marluullutik Pave Fransip toqukkut qimagutereernermi kingorna ilisaanerani najuunnerini.
Ukrainemi sorsunneq aallartippoq 24. februar 2022, Rusland nunap sanilerisami killeqarfia qaangerlugu saassussilermat.
Arfininngornermi ataatsimeeqatigeereermi Zelenskyjip ataatsimiinneq taavaa "takussutissiinerusoq". Taamak naliliinini attaveqaqatigiittarfimmi X-mi allaaserivaa, ilanngullugulu oqaatigalugu, ataatsimiinneq "oqaluttuarisaanermut ilanngunnissaminut periarfissaqartoq".
Zelenskyj ilanngullugu allappoq, oqaluuserisat assigiinngitsut arlallit aamma ilanngullugit oqaluuserinnissimallutik, namminerlu neriuutigigini, oqaasiinnaanatik tigussaasumik angusaqarnernik kinguneqarumaartut.
Ullumi siusinnerusukkut Zelenskyjip Reuters naapertorlugu, ataatsimiinneq minutsini 15-ni pisimanerarpaa.
Ataatsimeeqatigiinnerup kingorna Trump nammineq attaveqaqatigiittarfimminut, Truth Socialimut allaaserinnippoq.
Ilaatigut allappoq, nammineq siulimi Joe Bidenip sorsunneq taanna piliarigaa, namminerlu sapinngisaminik "tukattuliaq taanna iluarsaanniarsagini", Bidenip taassumalu siuliata præsident Barack Obamap imminut "qimararisimagaat".
- Taamatulli oqareerlunga, pissutissaqarpoq, at Putin ulluni kingullerni qaartartunik igeriuttakkanik inuit nunaqarfinni illoqarfinnilu najugaqarfiinut eqqaassineranut. Taamaattoqarnerata eqqarsalersippaanga, inuk taanna sorsunneq unitsissallugu ilumut piumassuseqarnersoq, Donald Trump allappoq.
Sisamanngormat Ukrainemi illoqarfiit pingaarnersaat Kyiv sakkortuumik saassunneqarpoq. Inuit aqqaneq marluk toqutaapput 0-illu ikiligaallutik.
Tamatuma saniatigut Trumpip oqaatigaa, Putin "allatut iliugassaasoq". Tassani ilaatigut "bankeqarneq" aammalu "pillaatit sakkukinnerumaartut " ilanngullugit innersuussilluni.
