EU-PARLAMENTIMUT QINERSINEQ 2024
Motzfeldt: EU-p pisariaqartippaatigut - aamma uagut EU pisariaqartipparput
Europaparlamentimut qinersineq nunatsinnit malinnaavigineqarluarpoq, qinersinerlu ullumikkut sapaammi naammassisussaavoq. Naalagaaffinngornissamut nunanullu allanut naalakkersuisoq, Vivian Motzfeldt (S), neriuuteqarpoq qinersinermi inernerit suleqatigiinnerup nanginneqarluarnissaanut periarfissiiumaartoq. - Ukiut ingerlanerini suleqatigiinneq pitsaasoq inerisarnikuuarput, taamaammat maani nunatsinni neriuutigiinnarsinnaavarput EU-parlamentimi ilaasortat nutaat suleqatigiinnitta ingerlaqqinnissaanut soqutiginnilluartuujumaartut, taanna Sermitsiamut oqarpoq.
Kalaallit Nunaat EU-mi ilaasortaanngikkaluartoq qanittumik suleqatigiinneq pilersinneqarsimavoq. Suleqatigiinneq aalisarnermut isumaqatigiissutip saniatigut ilinniartitaaneq, ilisimatusarneq, aatsitassarsiorneq kiisalu silap pissusaanut tunngasut aammalu nukissiuutinik mingutsitsinngitsunik atuinerup siuarsarneqarnissaanut siunertaqarpoq. - Suleqatigiinnerput ataqqeqatigiinnermik tunngaveqarpoq ineriartorfiusumillu pitsaasumik ingerlanneqarluni, kissaatigaarput tamanna ullumikkut qinersinerup naammassinerani kisitsisit takutinneqartut qinersinerullu inernerata kingorna ingerlateqqinnikkumaaripput, Vivian Motzfeldt (S) Sermitsiamut oqarpoq.
Assiliisoq: Leiff Josefsen
Europami nunat ilaasortat 27-t EU-parlamentimut qinersinerminni naggataasersuleruttorput. EU-parlamentimut inuit 720-it qinerneqartussaapput, taakkunannga 15-it Danmarkimit qinerneqartussaallutik.
Kalaallit Nunaata EU-llu suleqatigiinnerat toqqaannartumik pisarpoq, tassami Kalaallit Nunaat EU-mut attuumassuteqarpoq nunat imarpimmiut nunasiaataasimasullu (OLT) aqqutigalugu.
EU-mi qinigaaffimmi matumani maannalu qaangiutilersumi suleqatigiit (Kalaallit Nunaat aamma EU) suleqatigiinnerat annertusiartuinnavissimavoq, tamannalu ilaatigut kinguneqarpoq maanna EU-p Kalaallit Nunaanni allaffeqalerneranik aamma 2021-miit 2027-mut 1,7 milliardit koruuninik aningaasaliisimaneranik.
Motzfeldt: Suleqatigiinnerup ingerlaannarnissaa tunngavissinneqassasoq neriuutigaarput
EU-parlamentimi ilaasortat nutaat qinigaaqqittullu 720-it pingaarnersiuinerat qanoq ilusilerneqarumaarnersoq aammalu minnerunngitsumik politikkikkut soqutigisaqaqatigiillutik eqimattat sorliit pisaanermik tigusiumaarnerat tunngavigalugit aalajangiisuussaaq Kalaallit Nunaata EU-llu suleqatigiinnerat siunissami qanoq ittuussanersoq.
Naalakkersuisoq namminersulivinnissamut nunanut allanut tunngasunut, Vivian Motzfeldt (S), Kalaallit Nunaata EU-llu akornanni isumaqatigiissutinut atuuttunut innersuussivoq.
- Pingaartumik nunarsuarmi mingutsitsinnginnerusumik ineriartortitsinermi Kalaallit Nunaat pisuussutinik pisariaqartinneqartunik peqarluarpoq. Assersuutigalugu uagut aatsitassat pisariaqartinneqavissut suleqatitta iligisattalu pisariaqarteqisaat nunatsinni pigivagut, uagullu nunarput issittorlu tamaat silap pissusiata allanngoriartorneranut atatillugu illersuuteqarnissamut pisariaqartitsivugut.
Maannakkut EU-kommissionsformandiusoq, Ursula von der Leyen ukioq manna marsimi Kalaallit Nunaannut tikeraarpoq. Kommissionimi siulittaasutut ingerlaqqinnissani taassuma sassarnermini sulissutigaa.
Assiliisoq: Leiff Josefsen
- Ursulap (von der Leyen, aaqq.) Nuummi tikeraarnerani oqaluttuuuppara, aatsitassat pisariaqartinneqartut (kritiske råstoffer) amerlanersaasa nunatsinni nassaassaanerisa saniatigut sermersuup aakkiartornerani suli amerlanernik saqqummertoqarsinnaalluartoq, aatsitassallu pineqartut nunat EU-mi ilaasortat allallu iligisatta pisariaqartippaat.
- Tamanna assersuutigalugu taavara, tassami issittumi silap pissusaata allanngorneratigut allanngoriartornerit annertuut pisut, nunarsuup sinneranut sunniuteqartussaasut sunniuteqalereersullu nalunnginnatsigu. Taamaattumik nukittuumik suleqatigiinneq tamatta pisariaqartipparput, tassami silap pissusiata allanngoriartornera nunarsuarmi annertoorujussuarmik kalluaammat. Tassungalu tunngatillugu Nunatta EU-llu suleqatigiinnerat ingerlalluarpoq siuarsimalluarlunilu, Vivian Motzfeldt Sermitsiamut oqarpoq.
Kalaallit Nunaata EU-mut niuernera
Motzfeldt erseqqissaavoq, EU-p Kalaallit Nunaat pisariaqartikkaa, kisianni aamma Kalaallit Nunaata EU pisariaqartikkaa.
- Suleqatigiinneq, aalisarnermut isumaqatigiissutip saniatigut, ilinniartitaaneq, ilisimatusarneq, aatsitassarsiorneq aammalu pingaarnerpaamik silap pissusaata allangorneranut tunngasutigut aammalu mingutsitsinngitsunik nukissiuutinut ikaarsaarnermut tunngassuteqarput.
- Suleqatigiinnerput ataqqeqatigiinnermik aallaaveqarpoq aamma pitsaasumik ineriartortinneqarluni. Kissaatigaarput ingerlaqqissasoq ullumikkut qinersinerup inernerata kingorna, Vivian Motzfeldt (S) Sermitsiamut oqarpoq.
Kalaallit Nunaata EU-llu suleqatigiissutigisaasa maanna amerliartorlutillu annertusiartortut saniatigut, nunatsinniit pisariaqartinneqarpoq nunanut EU-mi ilaasortanut avammut nioqquteqartarnerminik ingerlatsisinnaanerminik.
- EU-mut akitsuutitaanngitsumik niuerniarpugut, tamannalu EU-parlamentimut qinersereernerup kingorna ingerlaannassasoq soorunami kissaatigaarput.
Vivian Motzfeldt erseqqissaavoq, suleqatigiinneq suli ineriartortoq, aamma nutaamik EU-parlamentimik qinersisoqareernerata kingorna tamanna ingerlaannassappat, taava Kalaallit Nunaat issittorlu tamaat immikkut sammeqarnerat aamma ingerlaannassasoq ilimagisariaqartoq, taamaalillunilu suleqatigiinneq ingerlaannassasoq.
- Kisianni EU-mi ilaasortaanngilagut, taamaammat utaqqiinnartariaqarpugut takullugu, EU-parlamentimut qinersineq qanoq kinguneqassanersoq aamma Kalaallit Nunaata EU-llu akornanni attaveqatigiinnermut tunngatillugu allannguisoqassanersoq, namminiilivinnissamut nunanut allanut Naalakkersuisoq, Vivian Motzfeldt (S) oqarpoq.
