MTU: KNR suli ajornartorsiortoq - siulersuisulli piffissaq takoqqaarusuppaat

KNR-imi sulisut oqariartorput - aappaluttumillu oqalupput.

Sulisut iluarisimaarinninnerannut siorna misissuinerup (MTU) takutippaa KNR'-imi pisortaqarfimmi ajornartorsiortoqartoq.

Kisitsisit Sermitsiap pissarsiarisaani tamanna uppernarsarneqarpoq.

Kisitsisit nammineq oqaluttuarput

Kisitsisit aappaluttut qimerluulaariartigit, sulisut naliliisimaneri:

• Pisortaq: 44 point, appariaatigalugu 20 point.
• Pisortaq suliffeqarfiup periusissiaanik anguniagaanillu attaveqarluarpoq: 43 point, appariaatigalugu 18 point.
• Pisortaq maligassiuilluarnermikkut siuttuuvoq: 43 point, 20 pointinik appariarsimalluni.
• Pisortap aalajangiineranut tatiginnippunga: 44 point, 25 pointinik appariangaatsiarsimalluni.

Tupaallannanngitsoq

Kisitsisit inernerit siulersuisut tupaallaatiginngilaat, nalunngereerpaat kisitsisit naammaginarnavianngitsut:

- Siulersuisuni uagut ilimagikannereerparput sulisut taamatut suliffimminnut iluarisimaarinninnerat misissuinerup aamma takutikkumaaraa pitsaanerusumut nikikkiartortoqanngitsoq, Nukaaraq Eugenius, KNR-imi siulersuisuni siulittaasoq Sermitsiamut oqarpoq.

Siulersuisummi taava qanoq iliorniarpat?

Siulersuisut immikkut ittumik tallimanngornermi ullaakkut qulinut ataatsimiissapput. Tassani pisortap sulinera isornartorsiorlugulu piumasaqaatit sukateriffiginialikkersaarpaat.

-   KNR-imi pisortap sulinera, soorunalimi isornartorsiortussaavarput, aammalu piumasaqarfigisussaavarput, taamaaliulersaarpugullu. Imaluunniit taamaalioreerpugut.  Suliassarput tassaavoq pisortamut piumasaqaatigut, piumasaqaatitta sukateriffiginissaat. Aammalu taamaaliorpugut.

Tatiginninneq tammariartorpoq - piffissarli utaqqineqaqqaassaaq

- Naak pisortamut piumasaqaateqartoqartaraluartoq, pissutsit ajunngitsumut suli saanngillat, piffissanngunngila pisortap taarsernissaa?

- Pisortamut piumasaqaatigut sukateriffigissavagut, tamatumalu kingorna qanoq kinguneqarnersoq aatsaat takoqqaartariaqarparput.

Siulersuisut tallimanngornermi januaarip ulluisa 31-anni nalunaaqutaq ullaakkut qulinut immikkut ittumik ataatsimiinniarlutik pilersaaruteqarput.