KL

DK

Múte B. Egede: Siunissaq nunarpullu pigaarput

Naalakkersuisut siulittaasuata ukiortaami oqalugiaammini namminiilivinnissaq aaqqissuusseqqinnissallu pisariaqartut ilaatigut eqqartorpai.

Naalakkersuisut siulittaasuat Múte B. Egede (IA) ukiortaami oqalugiarnermini.
KASSAALUK KRISTENSEN
Digitalimik aaqqissuisoq
Thomas Munk Veirum
Tusagassiortoq
Saqqummersinneqarpoq

Ukioq nutaaq innuttaasunut Kalaallit Nunaannullu pissanganartunik arlalinnik pisoqarfiussaaq, Naalakkersuisut siulittaasuat Múte B. Egede (IA) ukiortaami oqalugiarnermini oqarpoq, tassanilu innuttaasut Inatsisartunut kommunimullu 2025-mi qinersisoqarnissaa ilaatigut eqqaasitsissutigalugu.

- Ukioq manna kommuninut aamma Inatsisartunut qinersisussaavugut. Taasinitsigut inuiaqatigiinni sammivissaq sumut kikkunnillu ingerlanneqassanersoq tunngavilertarparput. Qinersineq ineriartornissatsinnut tunngaviit pingaarnersaraat, Múte B. Egede oqarpoq, taassumalu kajumissaarutigaa inuusuttut utoqqaallu qinersiartoqqullugit.

- Siunissaq uagut nammineq pigaarput. Siunissaq ersisaarutiginagu siunissaq periarfissiisoq atorluarniartigu. Siunissaq nunarpullu pigaarput. Nunarpummi qaqugumut pigiuassavarput kinguaattalu siunissaraat, oqarpoq.

Múte B. Egedep qinigaaffimmi matumani oqalugiaataa unnuk manna kingullersaavoq. Oqalugiarnermini Kalaallit Nunaata namminiilivinnissaanik suliniuteqarneq inatsisillu tunngaviusup suliarineqarnera sumut killinnersoq oqaatigaa:

- Kalaallit Nunaat Danmarkip inatsisaanut tunngaviusumut ilaavoq, naalagaaffeqatigiinnemi suleqatigiittoqarpoq. Kalaallit Nunaat Danmarkip ataani nammineq oqartussaassuseqarluni inissisimanerani suliassat suliarineqartarnerat arriitsumik ingerlasarpoq. Tamakkua aaqqinnissaat pisariaqarluinnarpoq, nunatsinnilu pitsaanerusumik suleriuseqartoqalerluni.

- Qinigaaffimmi uani Kalaallit Nunaata inatsisaanut tunngaviusumut missingiut suliarineqarnissaa aallartissimavarput, suleqatigiissitallu suliaq ingerlateqqissallugu. Kalaallit Nunaatali inatsisaata tunngaviusup suliarineqarnerani pingaarnerpaat ilanngunneqassapput. Tassalu nunatsinni innuttaasut.

Kigaatsumik suleriuseqarneq ingerlaannarsinnaanngilaq

Múte B. Egede naapertorlugu qinigaaffimmi tulliuttumi namminiilivinnissaq anguniarlugu annertuumik alloriartoqartariaqarpoq:

- Nunatut namminersortunngornissamut alloriarnissaq piffissanngorpoq. Kigaatsumik suleriuseqarneq ingerlatiinnarneqarsinnaanngilaq, tassa inatsisiliornerit Kalaallit Nunaanni atuuttussat Danmarkimi suliarineqaqqaartariaqartarnerat ingerlatiinnarsinnaanngilarput.

- Kalaallit innuttaasut namminiilivinnissamut alloriaqqinnissaq isummerfigalugulu aalajangiiffigissavaat. Taamaattumik qinigaaffimmi tulliuttumi Kalaallit Nunaata siunissaa qanoq issanersoq aamma aaqqissuussaaneq qanoq ittuussanersoq kalaallit innuttaasut isummerfigisariaqarpaat, Múte B. Egede oqarpoq.

Mittarfiit nutaat — periarfissat nutaat

Múte B. Egedep namminiilivinnissamut apeqqutip saniatigut aamma mittarfiit nutaat suliarineqarnerat sammivaa. Nuummi mittarfiup novembarimi atulernera kingornalu Ilulissani Qaqortumilu mittarfissat atulertussaanerat.

Takornariaqarnermut iluaqutaanissaasa saniatigut nunanik allanik suleqateqarnissamut periarfissarpassuaqalersitsipput:

- Nunanik allanik suleqateqarnerput ingerlatiinnassallugulu annertusarnissaa pilersaarutigaarput, ingammik sanilitsinniittunik. Kalaallit Nunaat nunanik allanik suleqateqarnerunermigut iluaqutissaqassaaq, soorlu nunat allat aamma taamaassasut.

Múte B. Egedep oqalugiarnermini aamma takornariat pillugit, akileraartarnermut ineqarnermullu inatsisit aaqqissuunneqaqqinnissai annertuumik sammivai.

Suliniutit Kalaallit Nunaata siunissaanut piujuartitsisumik pilersitseqataassapput namminiilivinnissamullu ingerlariaqqinnissap ajornannginnerulernissaanut iluaqutaassallutik:

- Unammilligassat kinguaatta kingornutissanngilaat. Nunami innuttaasut piujuartitsisumik siunissaqarnissaat anguniarlugu iliuuseqartariaqarpugut. Inuppassuit kissaatigisaannik aalajangiiniaannarluta issiassanngilagut, pitsaanerusumik siunissaqarnissaq anguniarlugu uaguttaaq ajornakusoortunik pisariaqartunillu aalajangiisariaqarpugut, Múte B. Egede oqarpoq.

samfund valg lufthavne selvstændighed múte b. egede inuiaqatigiit

ATORFIIT Se alle jobs

Powered by Labrador CMS